កូន​ឈឺចាប់​ដោយសារ​ធ្មេញ​ទើបនឹង​ដុះ​ពន្លក អ្នក​ម៉ាក់​គួរ​ធ្វើបែបនេះ

0

ជាទូទៅ​ក្មេង​ចាប់ផ្តើម​ដុះ​ពន្លក​ធ្មេញ​នៅ​អាយុ៦ខែ ប៉ុន្តែ​មាន​ក្មេង​ខ្លះ​អាចមាន​ការលូតលាស់​យឺត​យ៉ាង​រហូតដល់​អាយុ​មួយ​ខួប​ជាង​ក៏មានដែរ។ ចំពោះ​រោគសញ្ញា​នៃ​ការចាប់ផ្តើម​ដុះ​ពន្លក​ធ្មេញ គឺ​ក្មេង​ចាប់ផ្តើម​រមាស់មាត់ ចេះតែ​ចង់​កកេរ​នេះ​កកេរ​នោះ អង្គៀ​ម​ដោះ​អ្នក​ម៉ាក់ខ្លាំងៗនៅពេល​មឹ​ម ឬ​មានការ​ឈឺចាប់​រហូតដល់​យំ​ជាដើម។

ដូច្នេះ​ដើម្បី​កាត់បន្ថយ​ភាពឈឺចាប់​ដោយសារតែ​ធ្មេញ​ទើបនឹង​ដុះ​ពន្លក ប៉ា​ម៉ាក់​គួរតែ​ស្វែងយល់​ពី​គន្លឹះ​មួយចំនួន​ដូចខាងក្រោម៖

១.ប្រើ​កូន​ក្រណាត់​ស្អាតទន់ៗមក​ជ្រក់​ក្នុង​ទឹក​ត្រជាក់ ហើយ​ម៉ាស្សា​ត្រង់​តំបន់​ដែល​ឈឺចាប់។ ភាព​ត្រជាក់​នឹង​ជួយ​កាត់បន្ថយ​ភាពឈឺចាប់​បន្តិចម្តងៗ ប៉ុន្តែ​អ្នក​ម៉ាក់​ត្រូវធ្វើ​អនាម័យ​ដៃ​ខ្លួនឯង​ជាមុនសិន ដើម្បី​បង្ការ​ការឆ្លង​មេរោគផ្សេង។

២.សូម​ព្យាយាម​ទិញ​ជ័រ​សម្រាប់​ក្មេង​បៀម​លេង​អំឡុងពេល​ក្មេង​កំពុង​ដុះ​ពន្លក​ធ្មេញ វា​នឹងធ្វើ​ឲ្យ​ក្មេង​សប្បាយចិត្ត​ហើយ​អង្កៀម​លេង​រហូត​ភ្លេច​ការឈឺចាប់។ ប៉ុន្តែ​មុននឹង​ប្រើ​អ្នក​ត្រូវដាក់​ក្នុង​ទូ​ទឹក​ក ទើប​អនុញ្ញាត​ឲ្យ​ក្មេង​អង្កៀម​លេង ព្រោះ​ភាព​ត្រជាក់​នឹង​ជួយ​បំបាត់​ការឈឺ​ចាប់បាន​យ៉ាង​ល្អ។

៣.ឲ្យ​កូន​លេបថ្នាំ​បំបាត់​ការឈឺចាប់ ប៉ា​រ៉ា​សេ​តា​ម៉ុ​ល  ក្នុងករណី​ក្មេង​មានការ​ឈឺចាប់​ទ្រាំ​មិនបាន ដោយមាន​ការពិគ្រោះ​ជាមួយ​អ្នកជំនាញ​មុននឹង​ទិញ​ថ្នាំ​នេះ​មក​ប្រើ។

៤.ព្យាយាម​ឲ្យ​កូន​បៅដោះ ព្រោះ​សុដន់​ជា​កន្លែង​បង្កើត​ភាព​ស្និត​ស្នាល និង​ភាពកក់ក្តៅ បើទោះជា​ក្មេង​ដុះ​ពន្លក​ធ្មេញ​ច្រើន​ក៏ដោយ។ ប៉ុន្តែ​ប្រសិនបើ​អ្នក​លួងលោម​ពី​ការ​បំបៅ​ដោះ ធានាថា​ការឈឺចាប់​របស់​កូន​នឹងត្រូវ​រំសាយ​អស់។

ទាំងអស់នេះ គឺជា​មធ្យោបាយ​ងាយស្រួល​បំផុត ដែល​ប៉ា​ម៉ាក់​ទាំងឡាយ​គួរ​អនុវត្ត ដើម្បី​កាត់បន្ថយ​ភាពឈឺចាប់​ដោយសារតែ​ការ​ដុះ​ពន្លក​ធ្មេញ របស់កូន។