ការសម្រេចចិត្តបង្កើនចំនួនសមាជិកក្នុងគ្រួសារវាគឺជារឿងដ៏ល្អមួយ និងរីករាយបំផុត ជាពិសេសសម្រាប់អ្នកដែលទើបតែចាប់ផ្ដើមកសាងជីវិតជាគូ។ ជាមួយគ្នានេះ ការយល់ដឹងពីការមានផ្ទៃពោះ ក៏ដូចជាវិធីថែទាំសុខភាពក្នុងអំឡុងពេលកំពុងពរពោះ ក៏ជាបញ្ហាមួយយ៉ាងសំខាន់ផងដែរ ដែលស្ត្រីទាំងឡាយត្រូវតែស្វែងយល់ឲ្យបានច្បាស់លាស់ ដើម្បីបញ្ចៀសនូវបញ្ហាគភ៌មានវិបត្តិ ឬគ្រោះថ្នាក់ផ្សេងៗ ដែលអាចកើតមានជាយថាហេតុចំពោះសុខភាពរាងកាយរបស់ មាតា និងទារកក្នុងផ្ទៃ។
ស្ថានភាពទូទៅ
ផ្អែកតាមការសិក្សាស្រាវជ្រាវ និងការកំណត់ចំណាំរបស់អ្នកជំនាញកាលពីពេលកន្លងទៅបានឲ្យដឹងថា ជាទូទៅ ស្ត្រីដែលកំពុងត្រៀមខ្លួនក្លាយជាម្ដាយរបស់គេតែងមានភាពប្រឈមជាមួយជំងឺផ្សេងៗ ដែលភាគច្រើនអ្នកជំនាញអាចពិនិត្យឃើញមានចាប់ពីពេលមានផ្ទៃពោះរហូតដល់ពេលសម្រាល។ ម្យ៉ាងវិញទៀត ជំងឺទាំងនេះគឺជាដើមចមដ៏ចម្បងមួយ ដែលអាចបណ្តាលឲ្យស្ត្រីជាម្ដាយ ក៏ដូចជាទារកនៅក្នុងផ្ទៃមានគ្រោះថ្នាក់បានយ៉ាងងាយ ខណៈបើមិនបានពិនិត្យ និងទទួលបានការព្យាបាលទាន់ពេលវេលា។ នេះបើតាមការឲ្យដឹងពីលោកសាស្ត្រាចារ្យវេជ្ជបណ្ឌិត ហួត សេង អ្នកឯកទេសផ្នែកសម្ភព រោគស្ត្រី និងអេកូសាស្ត្រទារកក្នុងផ្ទៃ។
មុនពេលមានផ្ទៃពោះ
ប្រជាពលរដ្ឋខ្មែរមួយចំនួន ជាពិសេសអ្នកនៅតាមតំបន់ជនបទតែម្ដងតែងយល់ថា ការមានផ្ទៃពោះវាគឺជារឿងធម្មតាដែលអាចកើតឡើងរវាងមនុស្សប្រុស-ស្រីជាដៃគូជីវិតនឹងគ្នា ហើយភាគច្រើនក៏មិនបានកំណត់ពីពេលវេលាសមស្របក្នុងការទទួលយកបុត្រនេះដែរ ការយល់ឃើញបែបនេះវាគឺជារឿងមួយដែលខុសឆ្គង និងគ្រោះថ្នាក់បំផុត។ បើតាមអនុសាសន៍របស់លោកសាស្ត្រាចារ្យវេជ្ជបណ្ឌិត ហួត សេង អ្នកឯកទេសផ្នែក សម្ភព រោគស្ត្រី និងអេកូសាស្ត្រ ទារក ក្នុងផ្ទៃ បានឲ្យដឹងថាៈ ដើម្បីបញ្ចៀសនូវរាល់គ្រោះថ្នាក់ផ្សេងៗដែលអាចកើតមានក្នុងអំឡុងពេលកំពុងមានផ្ទៃពោះ ឬនៅពេលសម្រាល ស្ត្រីទាំងអស់គួរតែ មកពិគ្រោះជាមួយគ្រូពេទ្យឯកទេសជាមុនសិន ដើម្បីទទួលបានការពិនិត្យក៏ដូចជាយល់ដឹងពីព័ត៌មានសុខភាពជាក់លាក់មុនពេលសម្រេចចិត្តទទួលយកបុត្រ។
– ការលើសទម្ងន់ ឬធាត់ ៖ បើទោះជាមិនស្ថិតនៅក្នុងស្ថានភាពពរពោះក៏ដោយ ការឡើងទម្ងន់ ឬធាត់ខ្លាំងគឺជាបច្ច័យមិនល្អមួយចំពោះសុខភាព។ ក្រៅពីភាពមិនប្រក្រតីរបស់សរីរាង្គបន្តពូជ (ស្បូន និងក្រពេញដៃស្បូន) ការឡើងទម្ងន់ ឬធាត់ខ្លាំងក៏ជាបញ្ហាផងដែរ។ ប្រសិនបើចំពោះស្រី្តមានសភាពធាត់ខ្លាំង មានផ្ទៃពោះនោះវាអាចបណ្តាលឲ្យអ្នកប្រឈមមុខខ្ពស់ជាមួយនឹងជំងឺទឹកនោមផ្អែម, ជំងឺលើសឈាម ឬជំងឺលើសឈាមធ្ងន់ធ្ងរ ដែលវាអាចធ្វើឲ្យទារកក្នុងផ្ទៃលូតលាស់ខុសប្រក្រតី ជាពិសេស ប្រឈមមុខនឹងការវះកាត់នៅពេលសម្រាលតែម្ដង។
– ករណីធ្លាប់មានប្រវត្តិជំងឺប្រចាំកាយ៖ ប្រសិនបើស្ត្រីដែលធ្លាប់មានជំងឺទឹកនោមផ្អែម, ជំងឺលើសឈាម, ជំងឺបេះដូង ក៏ដូចជាជំងឺផ្សេងៗដទៃទៀតនោះ ចាំបាច់ត្រូវតែទៅពិគ្រោះជាមួយគ្រូពេទ្យដែលមានជំនាញ និងឯកទេសច្បាស់លាស់ ដើម្បីបានដឹងពីព័ត៌មានលម្អិតយល់ច្បាស់ពីបញ្ហាសុខភាព ជាពិសេសបានដឹងពីលទ្ធភាពក្នុងការមានបុត្រ ដែលមិនប៉ះពាល់សុខសុវត្ថិភាពមាតា និងទារក។
– ស្ថានភាពសុខភាព និងជំងឺឆ្លង៖ មេរោគមួយចំនួនដូចជា HIV, Rubéole(ស្អូច), Toxoplasmose, CMV, Virus B19 …អាចឆ្លងពីម្ដាយ ដល់កូន ក្នុងផ្ទៃនៅពេលកំពុងមានផ្ទៃពោះ និងនៅពេលឈឺពោះសម្រាល ដែលអាចបង្កឲ្យទារកក្នុងផ្ទៃមានកាយសម្បទាមិនគ្រប់គ្រាន់។ ដូចនេះ មាតាគ្រប់រូបត្រូវស្គាល់នូវស្ថានភាពរបស់មេរោគទាំងនេះ (Status Sérologique) ឲ្យបានច្បាស់នៅមុនពេលមានផ្ទៃពោះ។
– ជំងឺតំណរពូជ៖ ជំងឺតំណរពូជមួយចំនួនដូចជា Thalassèmie, Mucoviscidose… អាចបន្តពីឳពុក-ម្ដាយ ទៅកូនក្នុងផ្ទៃ ដែលចាំបាច់ដៃគូ(ប្ដី-ប្រពន្ធ) ត្រូវស្វែងយល់ផងដែរ។
អំឡុងពេលមានផ្ទៃពោះ
នៅក្នុងអំឡុងពេលមានផ្ទៃពោះ ការពិនិត្យផ្ទៃពោះ និងការពិនិត្យទារកក្នុងផ្ទៃដោយម៉ាស៊ីនអេកូសាស្ត្រ គឺជារឿងដ៏សំខាន់ដែលមិនអាចខកខានបាន។
ការពិនិត្យនៅត្រីមាសទី1(11-14សប្ដាហ៍) អាចឲ្យយើងដឹងអំពីអាយុកូន, ថ្ងៃគ្រប់ខែបានច្បាស់ លើសពីនេះទៅទៀត ក៏អាចឲ្យដឹងពីភាពមិនប្រក្រតីមួយចំនួន។ ការវាស់កម្រាស-ក-របស់កូនក្នុងផ្ទៃ រួមជាមួយការធ្វើតេស្តឈាមក្នុងអំឡុងពេលនេះ អ្នកជំនាញអាចរកឃើញនូវហានិភ័យនៃជំងឺបាន (Down Syndrôme)។ ការពិនិត្យនៅត្រីមាសទី2 (22-24សប្ដាហ៍) អាចឲ្យដឹងពីការវិវត្តន៍របស់ទារកក្នុងផ្ទៃ និងភាពមិនប្រក្រតីនៃកាយសម្បទារបស់ទារក។ ការពិនិត្យនៅត្រីមាសទី3 អាចឲ្យដឹងពីការលូតលាស់, ទម្ងន់របស់ទារក, ទីតាំងសុក, បរិមាណទឹកភ្លោះ ងាយស្រួលវាយតម្លៃនៃការសម្រាល។
ផលប៉ះពាល់
មិនថានៅក្នុងរាងកាយរបស់ស្ត្រីកំពុងពរពោះមានផ្ទុកនូវប្រភេទនៃជំងឺណាមួយក្នុងចំណោមជំងឺទាំងអស់ខាងលើនោះទេ គឺសុទ្ធតែជាបច្ច័យមិនល្អចំពោះសុខភាពរបស់មាតា និងទារកក្នុងផ្ទៃទាំងអស់។ ភាពអាក្រក់ដែលបណ្តាលមកពីជំងឺទាំងនោះ ក្រៅពីធ្វើឲ្យសុខភាពមាតាមានភាពទ្រុឌទ្រោមទៅតាមអនុភាពរបស់ជំងឺ ថែមទាំងអាចបង្កផលអាក្រក់ចំពោះសុខភាពទារកក្នុងផ្ទៃ ដូចជា មានការលូតលាស់មិនប្រក្រតី, ពិការភាពកាយសម្បទា, ទារកមានជំងឺប្រចាំកាយតាំងពីកំណើត, ពិបាកក្នុងពេលសម្រាល, អាចសម្រាលមិនគ្រប់ខែ ឬធ្វើឲ្យទារកមានប្រាជ្ញាស្មារតីមិនប្រក្រតីក្រោយពេលកើត ហើយប្រការសំខាន់បំផុតនោះ វាអាចឆក់យកអាយុជីវិតទាំងស្ត្រីជាម្ដាយ និងទារកនៅក្នុងផ្ទៃក៏មាន។
អនុសាសន៍អ្នកជំនាញ
ជាមួយនឹងការណែនាំ និងពន្យល់ត្រួសៗពាក់ព័ន្ធទៅនឹងការថែទាំសុខភាពមាតា និងទារក ជាពិសេសយល់ដឹងពីភាពប្រឈមរបស់ស្ត្រីពេលមានផ្ទៃពោះ លោកសាស្ត្រាចារ្យ វេជ្ជបណ្ឌិត ហួត សេង បានគ្រើនរំលឹកដល់បងប្អូនដែលជាស្ត្រីទាំងអស់ ជាពិសេសអ្នកដែលកំពុងប្រាថ្នាចង់បានបុត្រតែម្ដងថាៈ វិធីបង្ការគ្រោះថ្នាក់ប្រកបដោយប្រសិទ្ធភាពខ្ពស់បុំផុត ស្ត្រីដែលមានបំណងចាង់បានកូន គួរទៅសុំជូបពិគ្រោះជាមួយអ្នកជំនាញ មុននឹងសម្រេចចិត្តចង់កូន ចៀសវាងពេលមានបញ្ហាទើបស្វះស្វែងរកដំណោះស្រាយតាមក្រោមវាមិនមែនជារឿងដែលល្អនោះឡើយ។ កាលដែលចេះការពារមុនពេលមានបញ្ហា ក្រៅពីអាចថែរក្សាបាននូវធនធាន មានសុខភាពល្អមាំមួយ ថែមទាំងអាចជួយឲ្យទារកមានការលូតលាស់ល្អ គួរជាទីស្រឡាញ់សមដូចបំណងប្រាថ្នាទៀតផង៕
