ជារឿងធម្មតាទៅហើយ នៅពេលមានផ្ទៃពោះស្ត្រីជៀសមិនផុតពីបញ្ហាក្អួតចង្អោរ ឈឺពោះ លេចនោម ឬហូរឈាមតិចតួចនោះទេ ព្រោះរាងកាយកំពុងតែធ្វើការផ្លាស់ប្តូរ។ ក៏ប៉ុន្តែប្រសិនបើអាការប្រែជាធ្ងន់ធ្ងរខុសប្រក្រតី វាជាការព្រមានថា កូនក្នុងផ្ទៃរបស់អ្នកកំពុងតែប្រឈមនឹងបញ្ហាហើយ។
ទារកមានចលនាតិច៖ នៅពេលទារកមានអាយុចន្លោះពី ១៦ ទៅ ២៤សប្តាហ៍ នឹងមានការកម្រើកខ្លាំង ប៉ុន្តែប្រសិនបើដំណាក់កាលនេះកូនមានចលនាតិច អ្នកគួរតែប្រញាប់ទៅជួបគ្រូពេទ្យភ្លាម ព្រោះពួកគេកំពុងតែមានសុខភាពទន់ខ្សោយ។
ហូរឈាមច្រើនហួសប្រមាណ៖ ការហូរឈាមទ្វារមាសតិចតួចក្នុងអំឡុងពេលមានផ្ទៃពោះ ត្រូវបានគេចាត់ទុកជារឿងធម្មតា ប៉ុន្តែបើការហូរឈាមច្រើនហួសប្រមាណ គឺជាសញ្ញានៃការរលូតកូន ឬសុខកំពុងតែបាំងជិតមាត់ស្បូន។ បើមានករណីបែបនេះកើតឡើង ស្ត្រីមានផ្ទៃពោះគួរតែប្រញាប់ទៅពិគ្រោះជាមួយគ្រូពេទ្យភ្លា។
ឈឺចុកចាប់ក្នុងពោះខ្លាំង៖ នៅពេលពពោះ ស្ត្រីគ្រប់រូបត្រូវតែមានការឈឺចាប់ខ្លះ ព្រោះរាងកាយមានការប្រែប្រួល។ ទោះជាយ៉ាងណា បើការឈឺចាប់នោះមានសភាពធ្ងន់ធ្ងរ ហើយមានការធ្លាក់ឈាមទៀតនោះ អាចជាសញ្ញានៃការរលូតកូន ឬកូននៅក្រោស្បូន។
ស្បូនមានការកន្ទ្រាក់ខ្លាំងនៅសប្តាហ៍ទី៣៖ អ្នកម្តាយដែលទើបនឹងពពោះលើកដំបូង អាចច្រឡំថាជាសញ្ញានៃការសម្រាលកូនមុនពេលកំណត់។ ក៏ប៉ុន្តែនេះជារឿងមិនពិតទេ បើស្បូនកន្ទ្រាក់ខ្លាំងៗនៅដើមត្រីមាសទី ៣ ត្រូវប្រញាប់សុំជំនួយពីគ្រូពេទ្យភ្លាម ព្រោះកូនអាចប្រឈមនឹងបញ្ហារលូត។
បែកទឹកភ្លោះ៖ អំឡុងពេលមានផ្ទៃពោះ ស្បូននឹងរីកធំបន្តិចម្តងៗធ្វើឲ្យប្លោកនោមត្រូវរងនូវសម្ពាធខ្លាំង ដូច្នេះពេលខ្លះស្ត្រីមានផ្ទៃពោះអាចលេចនោម។ ទោះជាយ៉ាងណា ប្រសិនបើសារធាតុរាវចេះតែហូរបន្តមកមិនព្រមឈប់ ត្រូវប្រញាប់ទៅជួបជាមួយគ្រូពេទ្យ ដើម្បីរកវិធីដោះស្រាយភ្លាម៕
