ជាទូទៅរាងកាយរបស់កុមារមានកម្តៅចន្លាះពី ៣៧ទៅ៣៧,៥អង្សាសេ តែប៉ុណ្ណោះ ប៉ុន្តែបើកម្តៅឡើងដល់ ៣៨អង្សាសេត្រូវបានគេចាត់ទុកជាជំងឺគ្រុនក្តៅ។ កម្តៅដែលឡើងដល់ ៣៨,៥អង្សាសេ រាងកាយកុមារអាចទ្រាំទ្របាន តែបើវាឡើងខ្ពស់រហូដល់ទៅ ៣៩ទៅ៤០អង្សាសេ ក្នុងរយៈពេលយូរ អាចបង្កឲ្យកុមារមានបញ្ហាប្រកាច់ព្រោះខ្វះអុកស៊ីសែនទៅកាន់ខួរក្បាល ដួលសន្លប់ ឬក៏ស្លាប់បាន។
ចំពោះរោគសញ្ញាដែលបង្ហាញថា កូនរបស់អ្នកកំពុងតែកើតមានជំងឺគ្រុនក្តៅ គឺ ចេះតែអស់កម្លាំង ស្រែកយំ ងងុយគេង ផ្ទៃមុខឡើងពណ៌ក្រហម រងាញ័រ និងកម្តៅក្នុងរាងកាយកើនឡើងខ្លាំងខុសធម្មតា។
នៅពេលមានជំងឺគ្រុនក្តៅ ឪពុកម្តាយភាគច្រើនតែងតែរកវិធីសាស្ត្រព្យាបាលដោយខ្លួនឯងមុនឹងទៅមន្ទីរពេទ្យ ក៏ប៉ុន្តែអ្នកជំនាញបានណែនាំថា មានរឿងមួយចំនួនអ្នកមិនត្រូវធ្វើនៅពេលកុមារមានអាការក្តៅខ្លួនខ្លាំងឡើយ។
១.កុំស្លៀកពាក់ខោអាវក្រាស់ ឬរុំភួយឲ្យសោះ ព្រោះវាអាចធ្វើឲ្យកម្តៅកើនឡើងកាន់តែខ្លាំង។
២.មិនត្រូវយកទឹកកកងូតឲ្យកុមារនោះឡើយ ព្រោះវាអាចធ្វើឲ្យកម្តៅឡើងខ្លាំងនឹងនាំឲ្យខូចសរសៃឈាម។
៣.កុំប្រើក្រូចឆ្មារ ជូតខ្លួនប្រាណកុមារឲ្យសោះ។
៤.កុំប្រើថ្នាំបញ្ចុះកម្តៅតាមតែចិត្តឯង ព្រោះវាអាចធ្វើឲ្យកុមារប្រឈមនឹងបញ្ហាផ្សេង។
វិធីសាស្ត្រដ៏ល្អបំផុត គឺត្រូវប្រញាប់នាំកូនទៅជួបជាមួយអ្នកជំនាញជាបន្ទាន់ ដើម្បីពិនិត្យតាមដានជំងឺ និងប្រើប្រាស់ថ្នាំដែលត្រឹមត្រូវ៕
