តើអ្នកមានធ្លាប់ឆ្ងល់ទេ ហេតុអ្វីបានជាទារកទើបនឹងកើតត្រូវការគេងច្រើន ហើយដល់ពេលធំបន្តិចមិនសូវគេងសោះ បែរជាលេងច្រើនជាង? តាមពិតពេលវេលាដែលក្មេងៗត្រូវគេង វាអាស្រ័យទៅតាមការលូតលាស់ និងវ័យរបស់ក្មេងម្នាក់។ ចំពោះចំនួនម៉ោងដែលក្មេងៗត្រូវគេង អាចប្រែប្រួលបន្តិចម្តងៗ រហូតទាល់តែពួកគេពេញវ័យ។
ដូច្នេះ ដើម្បីឲ្យកូនៗគេងបានត្រឹមត្រូវទៅតាមអាយុ ឪពុកម្តាយគួរស្វែងយល់ពីចម្លើយដូចខាងក្រោម៖
ក្មេងមានអាយុ ០ ដល់ ៤ខែ
ដំណាក់កាលនេះ ពួកគេត្រូវការគេងថ្ងៃប្រមាណជា ៣ដង(ប្រហែលជា៤ម៉ោង) ចំណែកឯពេលយប់វិញ ចាប់ពី ៩ទៅ ១០ម៉ោង។ ដូច្នេះ ក្នុងមួយថ្ងៃ ពួកគេត្រូវការគេង ប្រហែលជា ១៤ម៉ោង។
ក្មេងមានអាយុ ៤ ទៅ៦ខែ
ដំណាក់កាលនេះ ក្មេងត្រូវការគេងថ្ងៃប្រមាណជា ២ ទៅ៣ដង(៤ទៅ៥ម៉ោង) ហើយពេលយប់វិញអាច ១០ម៉ោង។ ដូច្នេះរយៈពេលមួយថ្ងៃពេញ ទារកត្រូវការគេងប្រហែលជា ១៤ ទៅ ១៥ម៉ោង។
ក្មេងមានអាយុ ៦ ទៅ៩ខែ
ដំណាក់កាលនេះ ក្មេងត្រូវការគេងថ្ងៃប្រមាណជា ២ដង(២ទៅ៤ម៉ោង) ហើយពេលយប់វិញអាច ១០ ទៅ ១២ម៉ោង។ ដូច្នេះរយៈពេលមួយថ្ងៃពេញ ទារកត្រូវការគេងប្រហែលជា ១៤ ម៉ោង។
ក្មេងមានអាយុ ៩ ទៅ ១២ខែ
ដំណាក់កាលនេះ ក្មេងត្រូវការគេងថ្ងៃប្រមាណជា ២ ទៅ៣ដង(៤ទៅ៥ម៉ោង) ហើយពេលយប់វិញអាច ១០ម៉ោង។ ដូច្នេះរយៈពេលមួយថ្ងៃពេញ ទារកត្រូវការគេងប្រហែលជា ១៤ ទៅ ១៥ម៉ោង។
ក្មេងមានអាយុ ១២ ទៅ ១៨ខែ
ដំណាក់កាលនេះ ក្មេងត្រូវការគេងថ្ងៃប្រមាណជា ១ ទៅ២ដង ហើយពេលយប់វិញអាច ១១ ទៅ១២ម៉ោង។ ដូច្នេះរយៈពេលមួយថ្ងៃពេញ ទារកត្រូវការគេងប្រហែលជា ១៣ ទៅ ១៤ម៉ោង។
ក្មេងមានអាយុ ១៨ ទៅ ២៤ខែ
ដំណាក់កាលនេះ ក្មេងត្រូវការគេងថ្ងៃប្រមាណជា ១ដង ហើយពេលយប់វិញអាច ១១ម៉ោង។ ដូច្នេះរយៈពេលមួយថ្ងៃពេញ ទារកត្រូវការគេងប្រហែលជា ១៣ ទៅ ១៤ម៉ោង។
ក្មេងមានអាយុ ២ ទៅ ៣ឆ្នាំ
ដំណាក់កាលនេះ ក្មេងត្រូវការគេងថ្ងៃប្រមាណជា ១ដង ហើយពេលយប់វិញអាច ១០ ទៅ ១១ម៉ោង។ ដូច្នេះរយៈពេលមួយថ្ងៃពេញ កុមារត្រូវការគេងប្រហែលជា ១២ ទៅ ១៤ម៉ោង។
ក្មេងមានអាយុ ៣ទៅ ៥ឆ្នាំ
ដំណាក់កាលនេះ ក្មេងត្រូវការគេងថ្ងៃប្រមាណជា ១ដង ហើយពេលយប់វិញអាច ១០ ទៅ១១ម៉ោង។ ដូច្នេះរយៈពេលមួយថ្ងៃពេញ កុមារត្រូវការគេងប្រហែលជា ១១ ទៅ ១៣ម៉ោង។
ក្មេងមានអាយុ ៥ ទៅ ១២ឆ្នាំ
ដំណាក់កាលនេះ ក្មេងត្រូវចូលរៀនហើយ ដូច្នេះពេលថ្ងៃពួកគេអាចមិនបានគេងឡើយ ហើយពេលយប់វិញអាចគេងប្រហែលជា ១០ម៉ោង។ ដូច្នេះរយៈពេលមួយថ្ងៃពេញ ពួកគេត្រូវការគេងប្រហែលជា ១០ម៉ោង។
ប្រយ័ត្ន! ទារកគេងឥរិយបទដែលៗអាចបណ្តោលឲ្យក្រពឹត ឬសំប៉ែតក្បាល
អ្នកត្រូវដឹងថា ទារកទើបនឹងកើតឆ្អឹងលលាដ៍ក្បាលរបស់ពួកគេមានភាពទន់ខ្សោយណាស់ ដែលត្រូវការថ្នមដើម្បីជៀសផុតពីបញ្ហាផ្សេង។ ជាពិសេសឥរិយាបថក្នុងការគេងរបស់ទារក ដដែលៗអាចបណ្តោលឲ្យក្បាលរបស់ពួកគេត្រូវ សំប៉ែត ឬក្រពឹត ផ្នែកណាមួយ ប្រសិនបើអ្នកម្តាយមិនឧស្សាហ៍ប្រែខ្លួនរបស់ពួកគេ។
ក្នុងករណីដែលអ្នកបណ្តែតបណ្តោលឲ្យទារកគេងតាមអំពើចិត្ត ទម្រង់លលាដ៍ក្បាលរបស់ពួកគេអាចមានការប្រែប្រួលមួយចំនួន។
១.ទារកទម្លាប់គេងបែរឆ្វេង ឬស្តាំ
ក្នុងករណីដែលទារក ទម្លាប់គេងបែរទៅខាងឆ្វេង ឬខាងស្តាំ អាចបណ្តោលឲ្យក្បាលរបស់ពួកគេថត ឬក្រពឹតម្ខាងៗមិនស្មើគ្នាឡើយ។
២.ទារកទម្លាប់គេផ្ងារ
ប្រសិនបើទារកគេងផ្ងារ តម្រងក្បាលរបស់ពួកគេអាចត្រូវសំប៉ែតនៅពេលធំឡើង។
ដូច្នេះ អ្នកម្តាយគ្រប់រូបត្រូវចាំ ប្រសិនបើមិនចង់ឲ្យកូនមានក្បាលសំប៉ែត ឬក្រពិត គួរអនុវត្តដូចខាងក្រោម៖
-នៅពេលទារកគេង ត្រូវឧស្សាហ៍ប្រែទាំងខ្លួន និងក្បាលរបស់ពួកគេម្តងទៅស្តាំ ម្តងទៅឆ្វេង កុំឲ្យឥរយាបទនៅដែលៗយូរពេក។
-ក្នុងករណី ដែលអ្នកសង្កេតឃើញក្បាលរបស់ទារកក្រពឹតខាងឆ្វេង អ្នកគួរតែដាក់ឲ្យទារកដេកមកខាងស្តាំវិញ ។ ផ្ទុយទៅវិញ បើក្បាលរបស់ពួកគេក្រពឹត ខាងស្តាំ អ្នកត្រូវដាក់ឲ្យពួកគេគេងបែរទៅខាងឆ្វឹងវិញ។
-ចំពោះទារកដែលមានក្បាលសំប៉ែត ផ្នែកខាងក្រោយ អ្នកគួរឧស្សាហ៍ផ្លាស់ប្តូរឲ្យពួកគេគេងម្តងផ្អៀងទៅខាងឆ្វេង ម្តងផ្អៀងទៅខាងស្តាំ។
ការធ្វើបែបនេះ អាចជួយឲ្យកូនរបស់អ្នករួចផុតពីបញ្ហាក្រពឹត ឬសំប៉ែតក្បាល ប៉ុន្តែអ្នកម្តាយគួរតាមដាន ឬស្ទាបក្បាលទារកជាប្រចាំ ដើម្បីងាយស្រួលក្នុងការកែប្រែប្រសិនបើមានករណីដូចខាងលើ៕
