ការស្រាវជ្រាវពីមុនពីមុនបានរកឃើញថា ទារកកើតមិនគ្រប់ខែអាចប្រឈមនឹងការរៀនមិនចេះ និងខ្សោយការគិតទៅថ្ងៃក្រោយ ដែលមានជាប់ទាក់ទងទៅនឹងការអភិវឌ្ឍខួរក្បាល។ ចំពោះការស្រាវជ្រាវថ្មីនេះបានបង្ហាញថា អ្នកម្តាយគួរតែផ្តល់ទឹកដោះដល់កូនតែមួយមុខគត់ឲ្យបានយូរបន្តិច សម្រាប់ទារកដែលកើតមិនគ្រប់ខែ។
អ្នកស្រាវជ្រាវមកពីសាកលវិទ្យាល័យ Edinburgh បានវិភាគលើការស្តេនខួរក្បាលរបស់ទារកចំនួន ៤៧នាក់ ដែលកើតមុនសប្តាហ៍ទី ៣៣ ហើយការស្តេននៅពេលដែលទារកឈានដល់វ័យ ៤០សប្តាហ៍។ លទ្ធផលបានបង្ហាញថា ទារកដែលបានបៅទឹកដោះម្តាយតែមួយមុខគត់ មានខួរក្បាលល្អជាងទារកដទៃទៀត។
លោកវេជ្ជបណ្ឌិត James Boardman បាននិយាយថា ទារកដែលកើតមិនគ្រប់ខែ ខួរក្បាលមិនទាន់វិវត្តបានពេញលេញនោះទេ ដូច្នេះក្រោយពេលប៉ុន្មានសប្តាហ៍បន្ទាប់ពីកើតមិនគ្រប់ខែ អ្នកម្តាយគួរបំបៅដោះកូនឲ្យបានច្រើន ព្រោះវាអាចជួយឲ្យខួរក្បាលវិវត្តបានល្អ។
នៅក្នុងការស្រាវជ្រាវ ដែលចេញផ្សាយនៅក្នុងកាសែត Neurolmage បានបង្ហាញថា អ្នកម្តាយគួរតែបំបៅដោះកូនឲ្យបានច្រើន មិនត្រឹមតែកូនកើតមិនគ្រប់ខែនោះទេ សូម្បីតែទារកធម្មតាក៏ដោយ ព្រោះវាអាចជួយជំរុញឲ្យខួរក្បាលទារកមានសុខភាពល្អ ឆ្លាតវៃ និងចង់ចាំបានល្អ៕
