ថ្វីបើពងក្រួចមានមាឌតូចមែនពិត ក៏ប៉ុន្តែបើប្រៀបធៀបជាមួយនឹងស៊ុតធំៗវាមានអត្ថប្រយោជន៍ខ្លាំងជាងឆ្ងាយណាស់។ ការទទួលទានពងក្រួច អាចជួយបង្កើនកម្លាំងឈាម សម្អាតស្បែក បង្ការភាពស្លេកស្លាំង និងជំនួយដល់ការមានកូន។ អ្នកវិទ្យាសាស្ត្រនៅប្រទេសអង់គ្លេសបានណែនាំថា ការទទួលទានពងក្រួចមួយថ្ងៃ ៥ទៅ៦គ្រាប់ បន្ទាប់ពីស្ងោរក្តៅឧណ្ឌៗ ទើបអាចស្រូបយកសារធាតុចិញ្ចឹមបាន ១០០ភាគរយ។
ជាទូទៅពងក្រួចមួយគ្រាប់មានទម្ងន់ប្រហែលជា ១០ក្រាមប៉ុណ្ណោះ ប៉ុន្តែតម្លៃអាហារូបត្ថម្ភរបស់វាវិញខ្បស់ជាងស៊ុតដទៃទៀតដល់ទៅ ៣ដង។ ខាងក្រោមនេះគឺជាអត្ថប្រយោជន៍ដែលបានមកពីការទទួលទានពងក្រួចជាប្រចាំសម្របាប់ក្មេង និងមនុស្សស្រី៖
បង្កើនការចង់ចាំសម្រាប់កុមារ
សមាសភាពម៉ូលេគុលនៃសារធាតុចិញ្ចឹមរបស់ពងក្រួច អាចជួយឲ្យរាងកាយស្រូប និងរំលាយងាយជាងស៊ុតមាន់ទៅទៀត។ ពងក្រួចត្រូវបានគេទទួលស្គាល់ជាថ្នាំជំនួយខួរក្បាល ព្រោះវាមានផ្ទុកវីតាមីន D ខ្ពស់ជាងស៊ុតផ្សេង។ កាលពីមុន អ្នកវិទ្យាសាស្ត្របានសិក្សាទៅលើមនុស្សប្រមាណជា ៣០០០នាក់ នៅអឺរ៉ុបបានរកឃើញថា អ្នកដែលទទួលទានអាហារសម្បូរវីតាមីន D ខ្ពស់ មានការចង់ចាំ និងសមត្ថភាពក្នុងការគិតល្អជាងអ្នកដទៃ។ ដូច្នេះការទទួលទានពងក្រួចទៀងទាត់ គឺល្អបំផុតសម្រាប់មនុស្សគ្រប់គ្នា ជាពិសេសក្មេងៗតែម្តង។
ល្អសម្រាប់សុខភាពមនុស្សស្រី
ពងក្រួចមានប្រសិទ្ធភាពខ្លាំងបំផុតក្នុងការគ្រប់គ្រងការមករដូវ និងធ្វើឲ្យស្បែកស្អាត។ លើសពីនេះទៅទៀត ពងក្រួច ជាអាហារដែលអាចជួយការពារកង្វះឈាម ការកើតមុន និងជួយឲ្យស្ត្រីមានសុខភាពល្អក្រោយពេលសម្រាល។
