ជាទូទៅមនុស្សភាគច្រើននៅតំបន់អាស៊ី មានកម្ពស់មិនសូវខ្ពស់ដូចជាមនុស្សនៅតំបន់អឺរ៉ុបនោះទេ ដោយសារតែកត្តាតំណពូជ រួមផ្សំជាមួយនឹងអាហារូបត្ថម្ភប្រចាំថ្ងៃផងដែរ។
ទោះជាយ៉ាងណា ក្រុមអ្នកជំនាញបានបង្ហាញថា កុមារតូចៗ ឬក៏ក្មេងវ័យជំទង់មានឱកាសអាចលូតកម្ពស់ត្រូវស្តង់ដារបាន បើសិនជាពួកគេទទួលទានអាហារ ដែលសម្បូរវីតាមីន ប្រូតេអ៊ីន និងសារធាតុខនិជប្រចាំថ្ងៃ។ ខាងក្រោមនេះ ជាប្រភេទអាហារដែលអ្នកគួរតែផ្តល់ឲ្យកុមារជារៀងរាល់ថ្ងៃ៖
១.ទឹកដោះគោ
ទឹកដោះគោត្រូវបានគេរកឃើញថា មានផ្ទុកជាតិកាល់ស្យូម ប្រូតេអ៊ីន ព្រមទាំងវីតាមីន A ដែលដើរតួនាទីយ៉ាងសំខាន់ក្នុងការជួយឲ្យឆ្អឹងលូតកម្ពស់បានល្អ។ ដូច្នេះហើយ កុមារគួរតែទទួលទានទឹកដោះគោ ឲ្យបានចំនួន ២កែវជាប្រចាំ។
២.អង្ករសំរូប និងស្រូវសាឡី
ជាតិកាឡូរី ដែលមាននៅក្នុងគ្រាប់ធញ្ញជាតិដូចជា អង្ករសំរូប និងស្រូវសាឡី មានទួនាទីសំខាន់បំផុតក្នុងការទ្រទ្រង់រាងកាយកុមារ។ លើសពីនេះវាមានផ្ទុកសារធាតុកាបូហៃដ្រាត ជាតិសរសៃ និងវីតាមីន B ដែលអាចជួយជំរុញដល់ការលូតកម្ពស់បានយ៉ាងល្អ។
៣.សណ្តែកសៀង
សណ្តែកសៀង ត្រូវបានគេចាត់ទុកជាអាហារដែលសម្បូរទៅដោយប្រូតេអ៊ីន ចាំបាច់បំផុតសម្រាប់ការលូតកម្ពស់ ជាពិសេសប្រសិនបើកុមារទទួលទានជាប្រចាំថ្ងៃ។
៤.ស៊ុត
វាមិនត្រឹមតែជាអាហារពេលព្រឹកដ៏ពេញនិយមបំផុតសម្រាប់មនុស្សទៅទូនោះទេ សូម្បីតែកុមារក៏អាចជួយជំរុញដល់ការលូតកម្ពស់ផងដែរ។ អាស្រ័យហេតុនេះ អ្នកម្តាយគ្រប់រូបគួរតែផ្តល់ស៊ុត ឲ្យកូនទទួលទានជាប្រចាំ ជាពិសេសស៊ុតស្ងោរ។
៥.បន្លែ និងផ្លែឈើ
អ្នកជំនាញរូបណាក៏ផ្តល់អនុសាសន៍ ឲ្យមនុស្សគ្រប់រូបព្យាយាមទទួលទានបន្លែ និងផ្លែឈើឲ្យបានច្រើនដែរ ព្រោះវាអាចជួយឲ្យរាងកាយមានសុខភាពល្អ។ អ្វីដែលពិសេសនោះ គឺវាមានផ្ទុកជាតិសរសៃ វីតាមីន និងសារធាតុខនិជ ដែលជាជំរុញដល់ការលូតកម្ពស់បានយ៉ាងល្អ។
ក្រៅពីអាហារដូចជាយើងបានបង្ហាញពីខាងលើនេះ ឪពុកម្តាយ គួរតែជួយជំរុញឲ្យកូនធ្វើលំហាត់ប្រាណជាប្រចាំ ដើម្បីពង្រឹងរាងកាយ និងឆ្អឹងឲ្យកាន់តែរឹងមាំល្អ៕
