ការបំបៅដោះកូន ត្រូវបានគេចាត់ទុកជាបេសកម្មខ្វះមិនបាន បន្ទាប់ពីកំណើតរបស់ទារកទាំងអស់ ដូច្នេះអ្នកម្តាយត្រូវជ្រើសអាហារល្អៗមកទទួលទាន ដើម្បីជួយផ្គត់ផ្គងដល់ការផលិតទឹកដោះ ដែលជួយពង្រឹងប្រព័ន្ធភាពស៊ាំ និងសារធាតុចិញ្ចឹមគ្រប់គ្រាន់សម្រាប់ទារក។
ដូច្នេះដើម្បីពន្លឿនដល់ការផលិតទឹកដោះ បំពេញតម្រូវការរបស់កូនៗបានទាន់ពេលវេលា អ្នកម្តាយគួរបន្ថែមផ្លែឈើ៣មុខនេះទៅក្នុងរបបអាហារជាប្រចាំ។
១.ក្រូចពណ៌លឿង
ផ្លែឈើមួយមុខនេះ មិនត្រឹមតែសម្បូរទៅដោយវីតាមីន C ប៉ុណ្ណោះទេ វាថែមទាំងអាចជួយជំរុញដល់ការផលិតទឹកដោះដ៏មានជីវជាតិគ្រប់គ្រាន់ក្នុងការជួយរក្សាធ្មេញ និងឆ្អឹងរបស់កូនថែមទៀត។ ជាពិសេសវាអាចជួយបង្កើនមុខងារផលិតជាលិកា និងជួយជួសជុលរាងកាយអ្នកម្តាយផងដែរ។ ដើម្បីទទួលបានប្រយោជន៍ទាំងនេះ អ្នកម្តាយគួរតែទទួលទានផ្លែក្រូចយ៉ាងហោចណាស់ ២ផ្លែក្នុងមួយថ្ងៃ ឬប្រហែល ១២០មីលីក្រាមក្នុងមួយថ្ងៃ។
២.ល្ហុងទុំ
ល្ហុងទុំ ត្រូវបានគេរកឃើញថាមានផ្ទុកទៅដោយវីតាមីន A, C, ផូស្វ័រ, ជាតិសរសៃពីធម្មជាតិ។ ជាពិសេសជាតិដែក និងកាល់ស្យូម ពិតជាមិនអាចខ្វះបានចំពោះម្តាយ និងកូន។ មួយវិញទៀត ល្ហុងទុំក៏អាចជួយបង្កើនការផលិតទឹកដោះផងដែរ ប្រសិនបើអ្នកម្តាយទទួលទានវាបានទៀងទាត់។
៣.ផ្លែស្ត្របឺរី
ផ្លែឈើមួយប្រភេទនេះក៏ត្រូវបានគេរកឃើញផងដែរថា ពិតជាល្អខ្លាំងណាស់ សម្រាប់ម្តាយនឹងកូន។ ព្រោះវាសម្បូរទៅដោយវីតាមីន C និងជាតិទឹកច្រើនអាចជួយធ្វើឲ្យស្បែកទារកមានភាពស្រស់ស្អាត។ មិនត្រឹមតែប៉ុណ្ណោះការញ៉ាំផ្លែស្ត្របឺរីញឹកញាប់អាចជួយជំរុញដល់ការផលិតទឹកដោះក៏កាន់តែច្រើនដែរ៕
