ធ្វើ​ដូចម្តេច​ដើម្បី​បង្កើន​ភាពស៊ាំ​កុមារ ១ដល់៣ឆ្នាំ ឲ្យ​រឹងមាំ​ក្នុងសម័យ COVID-19 ?

0

ទោះបីជា​កុមារតូចៗនៅ​អាយុ ១ដល់៣ឆ្នាំ មិនត្រូវ​បាន​គេ​ចាត់​ចូល​ជា​ជន​ងាយ​រងគ្រោះ​ពី​ជំងឺ COVID-19 ក៏ដោយ ប៉ុន្តែ​ពួកគេ​នៅតែ​រង​ផលប៉ះពាល់​ពី​ស្ថានភាព​រីក​រាលដាល​ដូច​មនុស្ស​វ័យ​ផ្សេងទៀត​ដែរ។ ហេតុនេះ មានតែ​ពង្រឹង​ប្រព័ន្ធ​ភាពស៊ាំ​កុមារ​ឲ្យ​មាន​ភាពប្រសើរឡើង​នោះទេ ទើប​អាច​ជៀស​ផុតពី​ជំងឺ​នេះ​បាន។

អ្នកជំនាញ​ផ្នែក​អាហារ​សម្រាប់​កុមារ បាន​បង្ហាញថា រាងកាយ​កុមារ​មាន​សុខ​ភាពល្អ​ត្រូវ​ផ្តល់​សារធាតុចិញ្ចឹម​ដែលមាន​ប្រយោជន៍ និង​ចាំបាច់​សម្រាប់​ការលូតលាស់។ អាថ៌កំបាំង​នៃ​ការរៀបចំ​អាហារ​សម្រាប់​ក្មេង​ទើបនឹង​ចេះ​ដើរ​តេះតះ​អាយុ ១ដល់៣ឆ្នាំ គឺ​ផ្តោតទៅលើ​អាហារ​មានគុណ​ភាពល្អ​ទាំង៣ពេល​ក្នុង​មួយថ្ងៃ និង​ទឹកដោះគោ២ទៅ ៣ពែង។

ប្រភេទ​សាច់៖ ក្រុម​អាហារ​ដែល​អាណាព្យាបាល​គួរតែ​ផ្តល់​ឲ្យ​កុមារ​មានដូចជា សាច់ជ្រូក សាច់​ក្រហម ត្រី សាច់មាន់ ស៊ុត និង​ថ្លើម។

ជាតិ​ដែក៖ អាហារ​ដែលមាន​ផ្ទុក​ជាតិ​ដែក អាចជួយ​ការពារ​ភាពស្លេកស្លាំង ដែល​ជះឥទ្ធិពល​ដល់​ការផ្គត់ផ្គង់​អុកស៊ីសែន​ដល់​កោសិកា​នៃ​រាងកាយ ជាពិសេស​កោសិកា​ខួរក្បាល ត្រូវបាន​គេ​រកឃើញ​នៅក្នុង​សាច់សត្វ បន្លែ​ពណ៌​បៃតង និង​អាហារ​សមុទ្រ។

សារធាតុចិញ្ចឹម៖ វីតាមីន និង​សារធាតុ​រ៉ែ អាចជួយ​ប្រយុទ្ធ​ប្រឆាំងនឹង​រ៉ាឌីកាល់​សេរី ប្រឆាំង​អុកស៊ីតកម្ម លើកកម្ពស់​ភាពស៊ាំ រក្សា​តុល្យភាព​ប្រតិកម្ម​រាងកាយ។ វីតាមីន និង​សារធាតុ​រ៉ែ​ទាំងនោះ​មាននៅ​ក្នុង​បន្លែ​ផ្លែឈើ​ដូចជា ផ្លែ​បឺ​រ សណ្តែកសៀង គ្រាប់​ផ្កាឈូករ័ត្ន ផ្លែ​ល្ហុង ប្រេង​អូ​លីវ ស្រូវ​សាលី និង​អាល់​ម៉ុង។

វីតាមីន C៖ វីតាមីន C ត្រូវបាន​គេ​រកឃើញ​នៅក្នុង​ផ្លែក្រូច និង​ត្របែក ដើរតួនាទី​យ៉ាងសំខាន់​ក្នុងការ​ប្រឆាំង​អុកស៊ីតកម្ម អាចជួយ​ការពារ​ការកើនឡើង​នៃ​ជំងឺ​ផ្លូវដង្ហើម និង​បង្កើនល្បឿន​នៃ​ការ​ជាសះស្បើយ​នៃ​ស្នាមរបួស​បាន​លឿន។

វីតាមីន​A៖ វីតាមីន A គឺជា​បេ​តា​ការ៉ូ​ទីន និង​អង់​ទី​អុកស៊ីដ​ង់ ដែល​អាចជួយ​ពង្រឹង​ប្រព័ន្ធ​ភាពស៊ាំ ធ្វើ​ឲ្យ​រាងកាយ​មាន​សុខភាព​ល្អ។ វីតាមីន​មួយ​នេះ​មាននៅ​ក្នុង​ក្រូច​ពណ៌​លឿង ផ្លែឈើ​ពណ៌​ក្រហម ការ៉ុត ប៉េងប៉ោះ ម្ទេស ឪឡឹក ផ្លែ​ស្ត្រ​បឺ​រី ផ្លែ​ឈី​រី ផ្លែ​ប៉ោម​ក្រហម។

ទឹកឃ្មុំ៖ ទឹកឃ្មុំ គឺជា​ប្រភព​អាហារ​ដ៏​ពេញនិយម​ពេល​បច្ចុប្បន្ននេះ ព្រោះ​វា​មាន​ផ្ទុក​សារធាតុ​ប្រឆាំង​អុកស៊ីតកម្ម ជួយ​ពង្រឹង​ប្រព័ន្ធ​ភាពស៊ាំ ធ្វើ​ឲ្យ​ផ្លូវដង្ហើម​មាន​សំណើម និង​មាន​ឥទ្ធិពល​ជា​បន្ត​ទៅលើ​ការ​ថែម​ទាំ​សួត។

ប៉ុន្តែ​អាហារ​ដែល​សម្បូរ​ទៅដោយ​ប្រភព​ប្រូតេអ៊ីន​ទាំងនេះ​គួរតែមាន​ការផ្លាស់ប្តូរ​ជា​រៀងរាល់ថ្ងៃ ហើយ​ក្នុង​មួយថ្ងៃ​ញ៉ាំ​ឲ្យ​បាន៣មុខ ដើម្បី​ជួយ​ជំរុញ​ដល់​ការលូតលាស់​កុមារ។