ត្រចៀក គឺជាសរីរាង្គមួយដែលមានសារៈសំខាន់បំផុតក្នុងជីវិតរស់នៅប្រចាំថ្ងៃ តែបើត្រចៀកមានបញ្ហាស្តាប់លែងឮអ្នកច្បាស់ជាពិបាកក្នុងការទំនាក់ទំនងគ្នា។ ប្រសិនបើវាកើតឡើងចំពោះទារកវិញអាចប្រឈមនឹងបញ្ហាភាសារ ដោយសារតែមិនអាចស្វែងយល់ពីភាសារនៅពេលដែលឪពុកម្តាយបង្រៀននិយាយ។
បើយោងតាមអង្កការពិភពលោក WHO បានបង្ហាញថា ក្នុងចំណោមទារក ១,០០០នាក់ មាន ៣នាក់ ដែលកើតជំងឺថ្លង់បន្ទាប់ពីចាប់កំណើត។ ទារកដែលមានហានិភ័យថ្លង់ខ្ពស់ គឺទារកកើតមិនគ្រប់ខែ អ្នកម្តាយស្ត្រេសច្រើនពេលមានផ្ទៃពោះ ទារកថ្លោះជ្រុល ទារកស្រាលជាង ២,៥គីឡូក្រាម ការឆ្លងមេរោគក្នុងពេលមានផ្ទៃពោះ ឬឆ្លងជំងឺគ្រុនផ្តាសាយធ្ងន់ធ្ងរ…។
ជួនកាល ការប្រើប្រាស់ថ្នាំអំឡុងពេលមានផ្ទៃពោះ ឬឆ្លងវីរុសអំឡុងត្រីមាសទី ១ នៃការមានផ្ទៃពោះ ជាពិសេសមេរោគ Rubella ឬភាពមិនប្រក្រតីពីកំណើតដោយសារតែហ្សែន ក៏ធ្វើឲ្យទារកកើតមកមានបញ្ហាស្តាប់មិនឮដែរ។
អាស្រ័យហេតុនេះ ប្រសិនបើអ្នកសង្កេតឃើញភាពមិនប្រក្រតីចំពោះការស្តាប់របស់ទារក ត្រូវបញ្ចូនទៅកាន់មន្ទើរពេទ្យដើម្បីរកវិធីដោះស្រាយភ្លាម៕
