ទារកម្នាក់មានឈ្មោះថា Theo ត្រូវបានគេចាត់ទុកជាទារកតូចបំផុតនៅក្នុងប្រទេសអង់គ្លេស ព្រោះនៅពេលដែលគាត់កើតមកមានទម្ងន់ត្រឹមតែ ៣៤០ក្រាម ឬប្រហែលជាមួយភាគបួននៃទម្ងន់ទារកធម្មតា។
វេជ្ជបណ្ឌិតបានប្រកាសថា ទារកនេះមិនអាចរស់បាននោះទេ ដោយសារតែការអេកូសាស្ត្ររយៈពេល ១៩សប្តាហ៍ ទារកមានការលូតលាស់យឺត ហើយបន្ទាប់មកក៏ឈប់លូតលាស់ទាំងស្រុង។ អស់រយៈពេលជាង ២៦សប្តាហ៍ នាង Katie Rhodes អាយុ 24 ឆ្នាំត្រូវជាម្ដាយ ត្រូវបានគ្រូពេទ្យប្រាប់ឲ្យកាត់ចិត្ត ព្រោះកូនក្នុងផ្ទៃរបស់នាងបានស្លាប់ហើយ។
ទោះជាយ៉ាងណាប៉ុន្មានថ្ងៃបន្ទាប់ នាងបានត្រលប់មកជួបគ្រូពេទ្យវិញ ដោយសារតែនាងមានអារម្មណ៍ឈឺពោះខ្លាំង ហើយបន្ទាប់មកក៏សម្រាលកូននៅមន្ទើរពេទ្យ Royal Victoria Hospital តែម្តង។ ក្មេងប្រុសនេះមានអាយុត្រឹមតែ ២៦សប្តាហ៍ ៥ថ្ងៃប៉ុណ្ណោះ ដែលមានទម្ងន់ស្រាលដូចជាទឹកសុទ្ធមួយដបមានទម្ងន់ ៣៤០ក្រាមប៉ុណ្ណោះ។
ក្រោយពេលកើតលោក Jay Rhodes វ័យ ២៧ឆ្នាំត្រូវជាឪពុក ត្រូវបានគ្រូពេទ្យណែនាំទៀតថា ទារកនេះទារកនេះកើតមកមានស្ថានភាពអាក្រក់ ដូច្នេះគាត់មិនអាចរស់បានយូរជាង ២ ទៅ៣ថ្ងៃទៀតឡើយ។
តែទោះជាយ៉ាងណា ពួកគេមិនបោះបង់កូនចោលឡើយ ពួកគេនៅតែមើលថែទាំកូនយ៉ាងយកចិត្តទុកដាក់បំផុត រហូតដល់ទារកមានអាយុ ៤ខែ ហើយមានទម្ងន់ជិត ៣,៣គីឡូក្រាម គឺកើនឡើងជិត ១០ដងឯណោះ។ ឥឡូវនេះទារកនោះ មានអាយុជិត ៦ខែ ហើយមានសុខភាពល្អដូចទារកធម្មតាដែរ។
វេជ្ជបណ្ឌិតដែលបង្កើត ទារកដ៏តូចម្នាក់នេះមិនជឿថា គាត់អាចរស់រាន្តមានជីវិត ហើយមានសុខភាពល្អបែបនេះឡើយ៕
