ស្ត្រេស គឺជាជំងឺមួយប្រភេទដែលកើតមានឡើងដោយសារតែការគិតច្រើន ហើយវាបង្កឲ្យមានផលប៉ះពាល់ដល់សុខភាពទាំងបុរស និងស្ត្រី។ ទោះជាយ៉ាងណា ការសិក្សាថ្មីមួយបានបង្ហាញថា ស្ត្រេសអាចកាត់បន្ថយឱកាសនៃការមានកូនចំពោះមនុស្សស្រី។
អ្នកស្រាវជ្រាវ មកពីសាកលវិទ្យាល័យបូស្តុន នៅសហរដ្ឋអាមេរិក បានរកឃើញថា ស្ត្រីដែលកើតជំងឺស្ត្រេស ច្រើនពេកអាចបណ្តោលឲ្យវដ្តរដូវដើរមិនទៀងទាត់។
ស្ត្រេស បង្កឲ្យមានការបញ្ចេញអ័រម៉ូនជាច្រើននៅក្នុងខ្លួន ដែលនាំឲ្យអតុល្យភាពនៃប្រព័ន្ធ endocrine។ បន្ទាប់មកវានឹងប៉ះពាល់ដល់ការផលិតអូវុល ការបញ្ចេញអូវុលយឺតក្នុងពេលមករដូវ ឬគ្មានការបញ្ចេញអូវុលសោះ ដែលធ្វើឲ្យឱកាសនៃការមានកូនត្រូវបាត់បង់។
មិនតែប៉ុណ្ណោះ ការផ្លាស់ប្តូរអ័រម៉ូនក្នុងរាងកាយ អាចរំខានដល់មុខងារមួយចំនួនដូចជា គេងមិនបានត្រឹមត្រូវ ប៉ះពាល់ដល់ការរំលាយអាហារ អស់កម្លាំង ឡើងទម្ងន់ ដែលអាចជះឥទ្ធិពលអាក្រក់ទៅលើប្រព័ន្ធបន្តពូជ។
ដូច្នេះហើយ នៅពេលដែលអ្នកមានគ្រោងចង់មានកូន គួរតែកាត់បន្ថយបញ្ហាស្ត្រេស ហើយព្យាយាមធ្វើអ្វីដែលសប្បាយៗនៅក្នុងឆាកជីវិត៕
