អ្នក​ម្តាយ​មានគភ៌ ប្រយ័ត្ន…គ្រោះថ្នាក់ បែប​នឹកស្មាន​មិន​ដល់!!​

0

រឿង​ដែល​នឹកស្មាន​មិន​ដល់​តែងតែ​កើតឡើង​គ្រប់ពេលវេលា…ដូច្នេះ​អ្នក​ម្តាយ​មានគភ៌​គួរតែមាន​ការប្រុងប្រយ័ត្ន​ជាប់​ជានិច្ច ព្រោះ​ធ្លាប់​បានឃើញ​ឧទាហរណ៍​ជាច្រើន​មកហើយ ដូចជា មាន​មិត្តភក្តិ​ជិតដិត​ម្នាក់ នាង​មាន​ផ្ទៃពោះ 5 ខែ​ទៅហើយ តែ​ក៏​នៅតែ​ចូលចិត្ត​ធ្វើ​ការងារ​ប្រចាំថ្ងៃ​ដូច​មនុស្ស​ទូទៅ​ធម្មតា​អញ្ចឹង រហូតមកដល់​ថ្ងៃមួយ​ក៏បាន​ដឹងថា…រឿង​ដែល​នឹកស្មាន​មិន​ដល់ និង​ធ្លាប់តែ​ធ្វើជា​ប្រចាំ​នោះ បាន​ហុច​ផល​មិនល្អ​ដល់​ខ្លួន ហើយ​ថែមទាំង​មាន​ផល​អាក្រក់​ទៅដល់​កូន​នៅក្នុង​ផ្ទៃ​ទៀតផង រឿង​ទាំងនោះ​គឺ…

គ្រាន់តែ​ការ​ទំពា​អាហារ​សោះ…

ដឹង​ទេ​ថា រឿង​ដ៏​តូចតាច​មួយ​នេះ បើ​អ្នក​ម្តាយ​មើលរំលង រឿងនេះ​អាច​នាំមក​នូវ​ផល​អាក្រក់​ជាច្រើន​ដល់​អ្នក​ម្តាយ​និង​កូនតូច​បាន ។ អ្នក​ម្តាយ​មានគភ៌​ដែល​ទទួលទាន​អាហារ​បែបប្រញាប់ៗ ទំពា​អាហារ​តែមួយ​ភ្លែត​ហើយ​លេប​នោះ ផល​អាក្រក់​ដែល​តាម​មក​គឺ អាហារ​ដែល​អ្នក​ម្តាយ​លេប​ចូលទៅក្នុង​ក្រពះ​នោះ​នឹងមិន​រំលាយ ធ្វើ​ឲ្យ​មាន​អាការ​ណែន​ឆ្អល់​ក្នុង​ពោះ អាច​បណ្តាល​ឲ្យ​ការទទួល​ទាន​អាហារ​លើក​ក្រោយ​ថយចុះ កូនតូច​នៅក្នុង​ផ្ទៃ​ក៏​ទទួលរង​នូវ​ផលប៉ះពាល់​នេះ​តាម​ដែរ ។

ដូច្នេះ​ក្នុងការ​ទទួលទាន​អាហារ ទោះជា​ពេលណា​ក៏ដោយ សូមអ្នក​ម្តាយ​នឹក​ក្នុង​ចិត្ត​ជាប់​ជានិច្ច​ថា ត្រូវ​ទទួលទាន​ឲ្យ​បាន​ទៀងទាត់​ពេលវេលា  ហើយ​ត្រូវ​ទំពា​អាហារ​ឲ្យ​បាន​ល្អិត ព្រោះនេះ​គឺជា​រឿង​ល្អ​មួយ ដើម្បី​ឲ្យ​កូនតូច​របស់​អ្នក​បានទទួល​សារធាតុ​អាហារ​បាន​ពេញលេញ​តាម​នោះដែរ។

រហ័ស​ទាន់​ចិត្ត ដល់​ណា​ដល់​ហ្នឹង​ដែរ…

អ្នក​ម្តាយ​មានគភ៌​ខ្លះ​ច្រើនតែ​ភ្លេច​ថា ខ្លួនឯង​កំពុង​ពពោះ ធ្វើ​ឲ្យ​ការដើរ ក្រោក អង្គុយ រត់ រួមទាំង​ការធ្វើ​ចលនាផ្សេងៗប្រព្រឹត្ត​ទៅតាម​ធម្មតា  ចំពោះ​រឿងនេះ សូម​ជំរាប​ថា បើ​អ្នក​ម្តាយ​ដែលមាន​អាយុ​គភ៌​នៅ​តិច អាច​គ្មាន​គ្រោះថ្នាក់​អ្វី​ធ្ងន់ធ្ងរ​ទេ តែ​បើជា​អ្នក​ម្តាយ​ដែល​អាយុ​គភ៌​ស្ថិត​ក្នុងអំឡុងខែក្រោយៗ ហើយ​មាន​ការធ្វើ​ចលនា ដូចជា ក្រោក ដើរ រត់ បែបរហ័សៗនោះ ប្រាកដ​ណាស់ ពិតជា​មាន​ផលប៉ះពាល់​ដល់​កូនតូច​ដែល​នៅក្នុង​ផ្ទៃ​មិន​ខាន អាច​ដល់​ថ្នាក់​មានកា​បុក​ប៉ះ​នឹង​សាច់​ជញ្ជាំង​ស្បូន​ក្នុង​ពោះ ទៅ​ជំរុញ​ឲ្យ​ស្បូន​បង្រួញ​ខ្លួន ធ្វើ​ឲ្យ​អ្នក​ម្តាយ​មាន​អារម្មណ៍​ឈឺពោះ និង​បើសិនជា​ស្បូន​កើតការ​បង្រួញ​ខ្លួនខ្លាំងៗនោះ កូន​អាច​នឹង​ប្រសូត​ចេញមក​មុនពេល​កំណត់​បាន ។ ដូច្នេះ​អ្នក​ម្តាយ​ត្រូវធ្វើ​ចលនា​ឲ្យយឺតៗ ដើម្បី​ឲ្យ​កូនតូច​ក្នុង​ផ្ទៃ​មាន​សុវត្ថិភាព មិន​ដូច្នោះ​ទេ បេះដូង​នឹងធ្វើ​ការ​ខ្លាំង អុក​ស៊ី​ហ្ស៊ែ​ន​ដែល​ត្រូវ​បញ្ជូនទៅ​កូនតូច​នឹងត្រូវ​ថយចុះ តែ​ផល​អាក្រក់​ដែល​ខ្លាំង​ជាង​ហ្នឹង​ទៅទៀត​នោះ​គឺ កូនតូច​នៅក្នុង​គភ៌​អាច​នឹងមិន​សូវ​រឺ​ង​មាំ និង​ធំធាត់​យឺត ។

សត្វ​ចិញ្ចឹម​គួរ​ឲ្យ​ស្រឡាញ់…

ជាពិសេស​ឆ្កែ និង​ឆ្មា អ្នក​ម្តាយ​ខ្លះ​កើតរោគ​ប្រ​ត្តិ​កម្ម​ចាញ់​ជាមួយ រោមសត្វ ល្អងធូលី កេសរផ្កា តែ​ក៏​នៅតែ​ចូលចិត្ត​ចិញ្ចឹមសត្វ​នៅក្នុង​ផ្ទះ និង​ចូលចិត្ត​លេង​ជាមួយ​ពួកវា ដោយ​មិនបាន​គិតដល់ សត្វ​ចៃ​ដែល​នឹង​នាំ​មេរោគ​ចូល​មករក​ទាំង​អ្នក​ម្តាយ និង​កូនតូច​ដោយ​មិនបាន​ដឹងខ្លួន​ឡើយ។ ដូច្នេះ​អ្នក​ម្តាយ​មានគភ៌​គួរ​មើលថែ​រទាំ​សម្អាត​សត្វ​ចិញ្ចឹម​ដែល​ក្នុងផ្ទះ​ឲ្យ​បាន​កាន់តែខ្លាំង​ឡើង ដើម្បី​សុខភាព និង​អនាម័យ​ដ៏​ល្អ​របស់​អ្នក និង​កូន​ក្នុង​ផ្ទៃ។

ធ្មេញ​ពុក…

អ្នក​ម្តាយ​ខ្លះ អាច​គិតថា​ជា​រឿង​តូចតាច រហូត​បណ្តោយ​ឲ្យ​កើត​អាការ​អញ្ចាញធ្មេញ​ឡើង​ហើម មាន​ខ្ទុះ ឬ​មិន​ព្រម​ព្យាបាល ព្រោះ​គិតថា អនាម័យ និង​ភាព​ស្អាត​ក្នុង​ប្រអប់មាត់​មិនចាំបាច់​យកចិត្តទុកដាក់​ខ្លាំងពេក​ទេ រហូត​ធ្វើ​ឲ្យ​កើតមាន​មេរោគ​បាក់តេរី​កើនឡើង​ច្រើន រាលដាល​ទៅដល់​ឬ​ស​ធ្មេញ ធ្វើ​ឲ្យ​អញ្ចាញ​ឡើង​ខ្ទុះ​ជាដើម។ រឿង​តូចតាច​ក៏​ក្លាយជា​រឿង​ធំ​ឡើង ផលប៉ះពាល់​ដែល​តាម​មក គឺ​មេរោគ​ឆ្លង​ចូលទៅក្នុង​ក្រសែ​ឈាម ហើយ​ឆ្ពោះទៅរក​កូនតូច រហូតដល់​ថ្នាក់​អាចធ្វើ​ឲ្យ​បាត់បង់​ជីវិត​បាន​ទៀតផង។ ដូច្នេះ​អ្នក​ម្តាយ​មានគភ៌​ត្រូវតែ​ថែរក្សា​អនាម័យ និង​ភាព​ស្អាត​ក្នុង​ប្រអប់មាត់​ឲ្យ​បានល្អ​ជាប់​ជានិច្ច ព្រោះនេះ​គឺជា​រឿង​តូចតាច​ដែល​អាចធ្វើ​ឲ្យ​កើត​ទៅជា​រឿង​ធំ​បាន ។

យួរ ឬ​លើក​របស់ធ្ងន់…

អ្នក​ម្តាយ​មានគភ៌ ត្រូវ​ប្រុងប្រយ័ត្ន​ជាប់​ជានិច្ច​ថា ខ្លួន​អ្នក​កំពុងតែ​មានគភ៌!! ចូរ​កុំ​លើក​របស់ធ្ងន់ៗជាដាច់ខាត តែមាន​ពេលខ្លះ អ្នក​ម្តាយ​មួយចំនួន​អាច​ភ្លេចខ្លួន​ពេល​ទៅ​ដើរ​ទិញ​ឥ​វ៉ាន់ ដែល​ត្រូវ​យួរ​របស់របរ​ឡើង​ជ្រែ​កដៃ ពេលនោះ​សាច់ដុំ​ខ្នង សាច់ដុំ​ជើង និង​សន្លាក់ផ្សេងៗត្រូវតែ​ធ្វើការ​ធ្ងន់​ទាំងអស់ រហូត​ជំរុញ​ឲ្យ​កើតរោគផ្សេងៗឡើង ដូចជា សម្ពាធ​លោហិត​ឡើង​ខ្ពស់ ដោយសារតែ​បេះដូង​ខំធ្វើការ​ខ្លាំងពេក ឈឺ​ខ្នង ឈឺ​ស្មា និង​សន្លាក់​ជាដើម ។

បើក​សំឡេង​បទ​ភ្លេង ឮខ្លាំងៗពេក…

ក្នុង​ចំណុច​នេះ​ចង់​បានន័យថា អ្នក​ម្តាយ​មានគភ៌​ចូលចិត្ត​បើក​បទ​ចម្រៀងឮៗខ្លាំង​ជាង​ប្រក្រតី ព្រោះតែ​យល់ច្រឡំ​ថា កូនតូច​នៅក្នុង​ផ្ទៃ​នឹង​បានឮ​ច្បាស់ ដែល​ការ​ពឹត​ទៅ នេះ​ជា​គ្រោះថ្នាក់​សម្រាប់​កូនតូច​ទៅវិញ​ទេ ព្រោះ​ជាការ​រុក​គួ​ន​រំខាន​កូនតូច​នៅក្នុង​ផ្ទៃ​ដោយ​ត្រង់​តែម្តង  ដោយសារតែ​ស​សៃ​ប្រសាទ​ត្រចៀក​របស់​កូន​មិនទាន់​វិ​វ​ឌ្ឍ​បាន​ពេញទំហឹង​នៅឡើយ​ទេ អាចធ្វើ​ឲ្យ​កូនតូច​កើតក្តី​ធុញថប់​មួម៉ៅ មាន​ផល​ធ្វើ​ឲ្យ​ការវិវឌ្ឍ​ន៍​របស់​កូន​ថមថយ​ចុះ​បាន។ ការបើក​បទ​ចម្រៀង​ដើម្បី​ជួយ​ជំរុញ​ការ​វិវឌ្ឍន៍​របស់​កូនតូច​នៅក្នុង​ផ្ទៃ​នោះ គ្រាន់តែ​ចាក់​បទ​ភ្លេង​ដែលមាន​ចង្វាក់ស្រាលៗ ពីរោះៗ ដូចជា​បទ​ភ្លេង​ក្លា​ស៊ី​ក ឬក៏​បទ​ចម្រៀង​ធម្មតា​ទូទៅ​ណា​ដែលមាន​ចង្វាក់ និង​ទំនុកភ្លេង​ងាយស្រួល​ស្តាប់ មាន​ទំនុកច្រៀង និង​អត្ថន័យល្អៗ ប៉ុណ្ណឹង​ក៏​គ្រប់គ្រាន់​ណាស់​ទៅហើយ៕