អាការៈចាញ់កូនច្រើនតែកើតមានលើអ្នកម្តាយអំឡុងពេល ៣ខែដំបូងនៃការមានផ្ទៃពោះ ហើយដើមហេតុចម្បង កើតឡើងដោយសារតែរាងកាយផលិតអ័រម៉ូនច្រើន។ ដូច្នេះក្នុងត្រីមាសទី ១នៃការមានផ្ទៃពោះ ៩០ភាគរយនៃអ្នកម្តាយនឹងទទួលរងពីការក្អួតចង្អោរ និងវិលមុខ។ អាការៈបែបនេះនឹងមានភាពប្រសើរឡើងវិញ ពេលឈានដល់ត្រីមាសទី២ ក៏ប៉ុន្តែក្នុងអំឡុងពេលចាញ់ ប្រសិនបើអ្នកម៉ាក់មានសភាពដូចខាងក្រោមនេះ ត្រូវប្រញាប់ទៅជួបគ្រូពេទ្យភ្លាម។
១.ក្អួតចង្អោរខ្លាំងរាល់ព្រឹក រហូតស្រកទម្ងន់មើលលែងស្គាល់។
២.ក្អួតមានលាយឈាម។
៣.បាត់បង់ជាតិទឹកច្រើនពីការក្អួត ហើយពេញមួយថ្ងៃស្ទើរតែមិនអាចទទួលទានទឹកបានសោះ។
៤.នោមតិចជាងធម្មតាមានពណ៌លឿងចាស់។
៥.ដួលសន្លប់ញឹកញាប់។
៦.មានអារម្មណ៍ញ័រទ្រូង ឬចង្វាក់បេះដូងលោតលឿន។
ទាំងនេះ គឺជាសញ្ញាដែលបង្ហាញថា អ្នកម្តាយមានការចាញ់ខ្លាំងខុសពីធម្មតា ហើយត្រូវការជំនួយពីគ្រូពេទ្យ ដើម្បីឲ្យកាត់បន្ថយការចាញ់៕