8 រឿង​ដែល​អ្នក​ម្តាយ​គួរតែ​ធ្វើឱ្យបាន​ក្រោយពេល​ប្រសូត​បុត្រ​រួច

0

កុំ​បណ្តោយឱ្យ​ឆ្នាំ​ដំបូង ក្រោយពេល​ប្រសូត​របស់​អ្នក និង​កូន​កន្លងផុតទៅ​បែបធម្មតាៗអី អ្នក​ម្តាយ​ខ្លះ​អាច​នឹង​វីវក់​ជាមួយ​ការចិញ្ចឹម​មើលថែ​កូនតូច​រហូត​រក​ធ្វើ​អ្វី​ក៏​មិនបាន តែ​ពេល​ដល់​ថ្ងៃ​ខួបកំណើត​ឆ្នាំ​ដំបូង​របស់​កូន ទើប​អ្នក​ម្តាយ​មាន​អារម្មណ៍​ដឹងថា រយៈពេល​មួយឆ្នាំ​ពិតជា​កន្លងផុតទៅ​រហ័ស​មែនទែន និង​ថែមទាំង​ខកខាន​ភ្លាត់​បាត់​ឱកាសអ្វីៗជាច្រើន​យ៉ាង​អស់​ទៀតផង ដូច្នេះ​បើ​អ្នក​ម្តាយ​ថ្មោងថ្មី​មិន​ចង់​មក​អង្គុយ​នឹក​សោក​ស្តាយក្រោយ​នោះ យើង​នាំគ្នា​មក​មើ​លពី រឿង​ដែល​អ្នក​ម្តាយ​គួរតែ​ធ្វើឱ្យបាន​ក្រោយពេល​ប្រសូត​បុត្រ​រួច​ក្នុង​មួយឆ្នាំ​ដំបូង​ថា តើ​មាន​អ្វីខ្លះ​វិញ​ប្រសើរ​ជាង។

1 . ចិញ្ចឹម​កូន​ដោយ​ខ្លួនឯង

អ្នក​ម្តាយ​មួយចំនួន​ដែល​ត្រូវ​ត្រឡប់​ទៅធ្វើ​ការ​វិញ ក៏​ត្រូវតែ​កាត់ចិត្ត​ហើយ ព្រោះ​ការ​មាន​បុត្រ ធ្វើឱ្យមាន​ថ្លៃ​ចាយវាយ​កើន​ច្រើនឡើង​រហូត​មិនអាច​ឈប់​ធ្វើ​ការងារ​ដែល​ខ្លួន​ស្រឡាញ់​បាន​ដោយ​ហេតុផល​ច្រើនយ៉ាង តែ​សម្រាប់​អ្នក​ម្តាយ​ខ្លះ​ដែល​គ្មាន​ភារកិច្ច​អ្វី គួរតែ​នៅ​ចិញ្ចឹម​មើលថែ​កូន​ដោយ​ខ្លួនឯង​ឱ្យបាន​ពេញទំហឹង ដោយ​មិនចាំបាច់​ត្រូវ​ជួល​មេដោះ ឬ​ត្រូវមាន​អ្នក​នៅចាំ​ជួយ​ឡើយ។

2 . កុំ​រវល់​តែ​មើល​ថែកូន​រហូតដល់​ភ្លេច​យកចិត្តទុកដាក់​ស្វាមី

ក្នុង​ឆ្នាំ​ដំបូង អ្នក​អាច​នឹង​វីវក់​ជាមួយ​ការចិញ្ចឹម​មើលថែ​កូន ព្រោះ​នៅ​ជា​អ្នក​ម្តាយ​ថ្មោងថ្មី​នៅឡើយ តែ​កុំ​រវល់​តែ​មើល ឬ​ចាប់អារម្មណ៍​ជាមួយ​តែ​កូន​ជ្រុល​ពេក​អី ចូរ​បែរមក​មើល​គូជីវិត និង​យកចិត្តទុកដាក់​គេ​ឱ្យ​ដូច​ពីមុន​ផង ព្រោះ​គេ​គឺជា​ផ្នែក​មួយ​សំខាន់​ក្នុងការ​ធ្វើឱ្យ​ជីវិត​របស់​អ្នក និង​កូន​មាន​សេចក្តីសុខ​ច្រើនឡើង។

3 . ពុះពារ​ព្យាយាម​ចិញ្ចឹម​កូន​ដោយ​ទឹកដោះ​ម្តាយ

ការឱ្យ​កូនបៅ​ទឹកដោះ​ម្តាយ​ជា​រឿង​មហាអស្ចារ្យ​មួយ​រឿង​ទៀត​ដែល​មនុស្ស​ជា​ម្តាយ​ធ្វើបាន និង​ធ្វើបាន​យ៉ាង​ល្អ ដូច្នេះ​អ្នក​គួរ​សិក្សា​រឿង​ការចិញ្ចឹម​កូន​ដោយ​ទឹកដោះ​ម្តាយ ត្រៀមខ្លួន​ក្នុង​បំបៅ​ទឹកដោះ​កូន​ឱ្យ​បានល្អ​បំផុត​តាម​ដែល​អាចធ្វើ​ទៅបាន។

4 . ថតរូប​កូន​ទុកឱ្យ​បាន​រាល់​ខែ

ក្មេង​ក្នុង​រយៈពេល 1 ឆ្នាំ​ដំបូង​នឹង​ធំធាត់​លឿន​ណាស់ លឿន​រហូតដល់​អ្នក​នឹក​ជា​រូបភាព​មិនឃើញ​ឡើយ ដូច្នេះ​មិនថាតែ​នៅត្រង់ណា កំពុង​ធ្វើ​អ្វី​ក៏ដោយ ចូរ​កុំ​ខកខាន​ក្នុងការ​ថតរូប​កូន​ឱ្យសោះ លុះ​ដល់ពេល​គ្រប់​គម្រប់​ខួប 1ឆ្នាំ​ហើយ សាកល្បង​យក​រូបថត​ទាំង​នោះមក​មើល​ឡើងវិញ អ្នកនឹង​ច្បាស់​ជា​នឹក​ចម្លែក​ចិត្តនឹង​អ្វីដែល​បានឃើញ​មិន​ខាន។

5 . សុខចិត្ត​គេង​មិន​ឆ្អែត​ដើម្បី​កូន​ឱ្យបាន​ក្នុង​រយៈពេល​មួយ​ខួប​ដំបូង

រឿងនេះ​ជា​រឿង​មួយ​ដែល​ស្វាមី​អាចជួយ​ភរិយា​បាន ពេល​កូន​យំ​រករឿង​ខ្លាំង​នៅពេល​យប់​អ្នក​អាចជួយ​ពកូន​ដើម្បី​លួង​បំពេរ​បាន ដើម្បីឱ្យ​ភរិយា​បាន​គេង​លក់​សម្រាក​ឱ្យបាន​គ្រប់គ្រាន់ (ក្មេង​នឹង​យំ​ង​ង៉ក់​រករឿង​ឱ្យ​ព​ត្រឹមតែ​ប៉ុន្មាន​ខែដំបូងៗប៉ុណ្ណោះ)។

6 . កុំ​ព្រងើយកន្តើយ​រឿងនិទាន​សម្រាប់​ក្មេង

ក្មេង​ទើបនឹង​កើត 1 ឆ្នាំ​ដំបូង នឹងមាន​ការចងចាំ​ល្អ​ខ្លាំងណាស់ គួរ​អាន​រឿងនិទាន ឬ​សៀវភៅ​រឿង​សម្រាប់​កុមារ​ឱ្យ​កូន​ស្តាប់​រៀងរាល់ថ្ងៃ។

7 . យកចិត្តទុកដាក់​រាង​កាយ​ខ្លួនឯង

ក្នុង​ឆ្នាំ​ដំបូង​ដែល​ចិញ្ចឹម​កូន អ្នក​ម្តាយ​កុំ​ព្រងើយកន្តើយ​នឹង​ការមើល​ថែទាំ​រាងកាយ​ខ្លួនឯង​ឱ្យសោះ គួរ​ញ៉ាំ​អាហារ​ដែល​ល្អ​មាន​ប្រយោជន៍ និង​រក​ពេលវេលា​ហាត់ប្រាណ​ខ្លះ​ផង និង​កុំ​បន្ទោស​កូន​ថា ជា​មូល​ហេតុដែល​ធ្វើឱ្យ​អ្នក​គ្មាន​ពេល​មើលថែទាំ​ខ្លួនឯង​ជាដាច់ខាត។

8 . កុំ​ខ្មាស់អៀន​ក្នុងការ​ថតរូប​ស៊ែ​ល​ហ្វ៊ី

មិនចាំបាច់​អៀនខ្មាស់​ទេ​ពេល​ត្រូវ​ថតរូប​ជាមួយ​កូន​ពេលដែល​ផ្ទៃមុខ​របស់​អ្នក​ម្តាយ​យ៉ាប់យ៉ឺន​បំផុត​នោះ ព្រោះ​វា​ស្លក់​ក្រៀម​បែប​នោះ​មិនយូរប៉ុន្មាន​ទេ ព្រោះ​បន្ទាប់ពីនោះ​នៅពេល​កូន​ធំ​ឡើង​បន្តិច ផ្ទៃមុខ​របស់​អ្នក​ម្តាយ​នឹង​ស្រស់ស្អាត​ឡើងវិញ​ជាមិនខាន ហើយ​ការដែល​បាន​ថត​ស៊ែ​ល​ហ្វ៊ី​ទុកជា​មួយ​កូន​សម្លាញ់​ក្នុង​រយៈពេល 1 ឆ្នាំ​ដំបូង​នេះ គឺជា​ក្តី​ចងចាំ​ដែល​ល្អ​បំផុត​ក្នុងអំឡុងពេល​មួយ​នៃ​ជីវិត ដូច្នេះ​គួរតែ​បាន​ថតរូប​គូ​ជាមួយ​កូន​ទុក​មើល​ឱ្យបានច្រើន។

កូន​របស់​អ្នកនឹង​ធំធាត់​លឿន​ណាស់ ជាពិសេស​បំផុត​ក្នុង​ខួប​ឆ្នាំ​ដំបូង បើ​អ្នក​មិនបាន​ធ្វើ​អ្វី​ទុកជា​អនុស្សាវរីយ៍ ឬ​ទុកជា​ការចងចាំ​ទេនោះ ជួនកាល​អ្នក​អាច​នឹង​ភ្លេច ឬ​នឹក​មិនឃើញ​ពី​ភាព​គួរឱ្យ​ស្រឡាញ់​របស់​កូន​ក្នុងអំឡុងពេល​មួយ​យ៉ាង​គួរឱ្យ​ស្តាយ តែ​ក៏​កុំ​រវល់​ចាប់អារម្មណ៍​តែ​ជាមួយ​កូន​តែ​ម្យ៉ាង​អី គួរ​យកចិត្តទុកដាក់​លើ​ខ្លួនឯង និង​មនុស្ស​ក្បែរ​កាយ (ស្វាមី)របស់​អ្នកផង៕