គ្រប់ម្តាយទាំងអស់ តែងសង្ឃឹមថានឹងទទួលបានកូនមួយមានសុខភាពល្អក្រោយការសម្រាល។ ប៉ុន្តែការសម្រាលទារកតែងប្រឈមមុខនឹងបញ្ហាមួយចំនួន ដែលអាចប៉ះពាល់ធ្ងន់ធ្ងរដល់សុខភាព។ បញ្ហាមួយគួរឱ្យចាប់អារម្មណ៍គឺត្រង់ការឈ្លក់ទឹកភ្លោះមានលាមកព្រៃ ដែលបង្កផលប៉ះពាល់ធ្ងន់ធ្ងរដល់ទារក។ ផលលំបាកនោះ គឺកើតចេញពីការឈ្លក់ ដែលធ្វើឱ្យទារកអាចលេបទឹកភ្លោះមានលាមកព្រៃកំឡុងពេលមុនសម្រាល កំឡុងពេលសម្រាល ឬកំឡុងពេលកំពុងសម្រាល។
១)អ្វីទៅជាការឈ្លក់ទឹកភ្លោះមានលាមកព្រៃ ហើយវាបង្កផលវិបាកអ្វីខ្លះ?
ជាការលេបទឹកភ្លោះមានលាមកព្រៃចូលក្នុងផ្លូវដង្ហើមរបស់ទារកមុនពេលសម្រាល កំឡុងពេលសម្រាល ឬកំឡុងពេលកំពុងសម្រាល ដែលអាចបង្កផលវិបាកឱ្យទារកស្ទះផ្លូវដង្ហើម រលាកផ្លូវដង្ហើម និងលំបាកដកដង្ហើម។
២)កត្តាអ្វីខ្លះដែលធ្វើឱ្យទឹកភ្លោះមានលាមកព្រៃ?
មូលហេតុដែលធ្វើឱ្យទឹកភ្លោះទៅជាលាមកព្រៃ៖
– កង្វះអុកស៊ីសែនក្នុងឈាមទារក(ទារកខ្សោយ)
– ការសម្រាលមានរយៈពេលយូរ
– ទារកមានអាយុលើសខែ(> ៤១អាទិត្យ)
– ម្តាយមានជម្ងឺទឹកនោមផ្អែម ជម្ងឺលើសឈាម ជម្ងឺបេះដូង ជម្ងឺសរសៃឈាម វិបត្តិផ្លូវដង្ហើម និងមានទម្លាប់ជក់បារីច្រើន
– វិបត្តិការលូតលាស់ក្នុងផ្ទៃម្តាយ។
៣)តើរោគសញ្ញាអ្វីខ្លះដែលបញ្ជាក់ថាទារកលេបទឹកភ្លោះមានលាមកព្រៃ?
– ទឹកភ្លោះមានល្បាយលាមកព្រៃ ឬមានពណ៌បៃតង ឬទឹកភ្លោះមានពណ៌ខុសធម្មតា
– ទារកកើតមកមានពណ៌សម្បុរស្វាយ
– មានវិបត្តិផ្លូវដង្ហើមដូចជា ដកដង្ហើមញាប់ខុសធម្មតា លំបាកដកដង្ហើម ឬមិនដកដង្ហើម
– ចង្វាក់បេះដូងរបស់ទារកដើរយឺតមុនពេលកើត
– ពិន្ទុនាទីមាសទាប(ពិន្ទុអាប់ហ្គារ ជាពិន្ទុវាយតម្លៃទារកទើបកើត)
– ទារកទារកមានអាយុលើសខែ(> ៤១អាទិត្យ)
៤)តើត្រូវព្យាបាលការឈ្លក់ទឹកភ្លោះមានលាមកព្រៃយ៉ាងដូចម្តេច?
ការព្យាបាលការឈ្លក់ទឹកភ្លោះមានលាមកព្រៃ មានច្រើនសណ្ឋានទៅតាមកម្រិតធ្ងន់ធ្ងរនៃការលេបទឹកភ្លោះមានលាមកព្រៃនោះ។ជាទូទៅ គ្រូពេទ្យជំនាញព្យាបាលដោយដាក់ទារកឲ្យសំរាកនៅផ្នែកសង្គ្រោះបន្ទាន់ដោយ៖
– ផ្តល់អុកស៊ីសែន
– ផ្តល់ថ្នាំផ្សះ ដើម្បីព្យាបាលការឆ្លងរោគ
– ផ្តល់ Surfactant (ថ្នាំជំនួយសូត)
– ផ្តល់ Nitric Oxide
– ក្នុងករណីធ្ងន់ធ្ងរ ត្រូវប្រើម៉ាស៊ីនជំនួយផ្លូវដង្ហើមលើទារក។
«មន្ទីរពេទ្យកាល់ម៉ែតដែលមានផ្នែកសំរាល និងផ្នែកសង្គ្រោះទារក មានក្រុមគ្រូពេទ្យជំនាញ និងបច្ចេកវិទ្យាវេជ្ជសាស្ត្រទំនើបៗ ត្រៀមជួយសង្គ្រោះកូនរបស់លោកអ្នក ប្រកបដោយជោគជ័យ និងទំនុកចិត្តខ្ពស់»
ប្រភព៖Calmette Hospital
