ជាធម្មតាម្តាយម្តាយគ្រប់រូប ត្រូវបានក្រុមគ្រូពេទ្យណែនាំឲ្យធ្វើការបំបៅដោះកូន យ៉ាងតិចបំផុតរយៈពេល ៦ខែ។ តើហេតុអ្វីត្រូវចាំបាច់បំបៅកូនដល់ ៦ខែបែបនេះ? តាមពិតទឹកដោះម្តាយ មានផ្ទុកសារធាតុចិញ្ចឹមគ្រប់បែបយ៉ាង ដែលកូនត្រូវការបំផុតដើម្បីលូតលាស់។
ជាពិសេស អាហារូបត្ថម្ភនៅក្នុងទឹកដោះម្តាយ អាចបង្កើនប្រព័ន្ធភាពស៊ាំ ជួយរក្សាទារកឲ្យជៀសឆ្ងាយពីភាពធាត់ បង្ការជំងឺទឹកនោមផ្អែម ខ្វះជាតិទឹក ក្អួត ក្អក រាគ ទល់លាមក រលាកពោះវៀនធំ រលាកទងសួត ជំងឺបេះដូង និង ថ្លើម នៅពេលពួកគេពេញវ័យ។
ការបំបៅដោះកូនដោយទឹកដោះម្តាយ ក៏មានអត្ថប្រយោជន៍សម្រាប់សុខភាពចំពោះអ្នកម្តាយផងដែរ។ បើយោងតាមការស្រាវជ្រាវបានបង្ហាញថា ស្ត្រីដែលមិនបានបំបៅដោះកូនដោយទឹកដោះ មានហានិភ័យខ្ពស់វិវត្តទៅរកជំងឺទឹកនោមផ្អែម ជំងឺពុកឆ្អឹង មហារីកសុដន់ មហារីកអូវែ និងមហារីកស្បូន។
ដូច្នេះ ការចិញ្ចឹមកូនដោយទឹកដោះ មិនត្រឹមតែជួយឲ្យទារកលូតលាស់បានល្អនោះទេ វាក៏អាចធានាដល់សុខភាពចំបោះអ្នកម្តាយផងដែរ។ ម្យ៉ាងវិញទៀត ដើម្បីធ្វើឲ្យសុដន់ផលិតទឹកដោះបានច្រើន សម្រាប់ផ្គត់ផ្គងទារក អ្នកម្តាយត្រូវសុំយោបល់ពីក្រុមគ្រូពេទ្យអំពីរបបអាហារដែលត្រូវទទួលទាន៕
មូលហេតុដែលធ្វើឲ្យអ្នកម្តាយខ្វះទឹកដោះឲ្យកូនបៅ
របំបៅដោះកូនគឺជារឿងធម្មជាតិមួយដែលអ្នកម្តាយគ្រប់រូបត្រូវតែធ្វើហើយការបំបៅដោះកូនដោយទឹកដោះម្តាយពិតជាមានសារៈសំខាន់ខ្លាំងណាស់សម្រាប់សុខភាពទារកទាំងពេលបច្ចុប្បន្ន និងទៅថ្ងៃអនាគត់។ ប៉ុន្តែតើអ្នកដឹងទេ ហេតុអ្វីបានជាមនុស្សស្រីមួយចំនួនគ្មានទឹកដោះគ្រប់គ្រាន់ឲ្យកូនបៅ?
បើយោងតាមគេហទំព័រ boldsky បានចុះផ្សាយថា ស្ត្រីដែលខ្វះទឹកដោះឲ្យកូនបៅ អាចបណ្តោលមកពីសុដន់គ្មានក្រពេញកោសិកាគ្រប់គ្រាន់ ដែលមិនអាចផលិតទឹកដោះឲ្យកូនតាមត្រូវការបានឡើយ។ ជាពិសេសអ្នកត្រូវចាំថា ប្រសិនបើក្នុងកំឡុងពេលមានផ្ទៃពោះសុដន់របស់អ្នកមិនរីកធំជាងមុន ច្បាស់ជាមានបញ្ហានេះកើតឡើងហើយ។
មួយវិញទៀត សម្រាប់ស្ត្រីដែលបានថ្នាំគ្រាប់ពន្យាកំណើត វះកាត់សុដន់ និងទម្លាប់ជក់បារី ក៏អាចប្រឈមនឹងបញ្ហាខ្វះទឹកដោះសម្រាប់ទារកជាទីស្រឡាញ់ផងដែរ៕
