រឿងការមានសុខភាពដែលល្អនោះ ពិតជារឿងមួយដែលចាំបាច់ណាស់របស់មនុស្សស្រីមានគភ៌ ព្រោះនោះវាមានន័យថានៅពេលអ្នកមានសុខភាពល្អបរិបូណ៍ឥតខ្ចោះហើយនោះ ជីវិតតូចមួយនៅក្នុងពោះ ក៏នឹងមានវិវឌ្ឍនាការចម្រើនធំធាត់តាមអាយុដែលល្អទៅតាមនោះដែរ ដូច្នេះយើងនឹងមើលឃើញថា គ្រូពេទ្យនឹងណែនាំអនាគតអ្នកម្តាយដែលកំពុងមានគភ៌ទាំងឡាយឱ្យឧស្សាហ៍មើលថែទាំខ្លួនឯង ទាំងក្នុងរឿងសុខភាព រួមទៅដល់ជីវិតចិត្តគំនិតទៀតផង យើងនាំគ្នាមកមើលថា តើវិធីឆ្ពោះទៅរកការមានសុខភាពដែលល្អនោះ អាចធ្វើបានយ៉ាងណាខ្លះ។
– អ្នកម្តាយគួរទទួលទានបន្លែ ផ្លែឈើ អាហារស៊ីរៀល បាយអង្ករអូត គ្រាប់ធញ្ញជាតិ និងអាហារដែលមានកាកសរសៃច្រើន
ដើម្បីចៀសវាងពីអាការទល់លាមក ព្រោះអ័រម៉ូនដែលប្រែប្រួលនឹងហុចផលប៉ះពាល់ដល់ពោះវៀនធំរបស់អ្នកម្តាយ ដែលអាហារកាកសរសៃអាចជួយបានច្រើនចំពោះរឿងនេះ។
– អ្នកម្តាយត្រូវតែបានទទួលសារធាតុដែកពីសាច់សត្វ យ៉ាងហោចណាស់ 1 សប្តាហ៍ 3 ដង ដែលមិនចាំបាច់ត្រូវទទួលទានច្រើនពេកទេ តែគ្រប់គ្រាន់ចំពោះតម្រូវការរបស់រាងកាយ ហើយសារធាតុដែកដែលមាននៅក្នុងបន្លែនោះ ជាប្រភេទដែលមិនមែនហ៊ីម៉ូក្លូប៊ីននោះទេ ធ្វើឱ្យរាងកាយពិបាកបឺតជ្រាប។
– ដើម្បីជួយបង្កើនខួរក្បាលដល់កូនតូច អ្នកម្តាយត្រូវទទួលទានអាស៊ីតខ្លាញ់ អូមេហ្កា 3 តែចូរចៀសវាងសត្វទឹកដែលមានសំបកប្រភេទងាវគ្រំខ្យងខ្ចៅ ព្រោះនឹងបង្កឱ្យកើតគ្រោះថ្នាក់ទាំងអ្នកម្តាយ និងទារកក្នុងផ្ទៃអាចឆ្លងមេរោគបាក់តេរី លីស្ទេរៀបាន។
– បើអ្នកម្តាយពិបាកវេទនាជាមួយអាការក្អួតចង្អោរ ចូរទទួលទានខ្ញី ព្រោះមើមខ្ញីជួយកែអាការក្អួតចង្អោរបានល្អ ដោយអាចហាន់មើមខ្ញីស្រស់ជាចំណិតដាក់ចូលទៅក្នុងទឹកក្តៅ រួចទទួលទានក៏បាន។
– អ្នកម្តាយត្រូវបានទទួលបរិមាណភ្លូអ័ររ៉ាយឱ្យបានគ្រប់គ្រាន់ ព្រោះសំខាន់ដល់ការសាងធ្មេញរបស់កូនតូច៕
អស្ចារ្យយ៉ាងណាទៅ ទើបម្នាក់ៗចង់ញ៉ាំពងក្ងានក្នុងពេលមានផ្ទៃពោះ?
តើហេតុអ្វីបានមនុស្សម្នាក់ៗចង់ឲ្យស្ត្រីមានផ្ទៃពោះញ៉ាំពងក្ងាន? តើពងក្ងានផ្តល់ប្រយោជន៍អ្វីខ្លះទៅ? បើយោងតាមការស្រាវជ្រាវបានរកឃើញថា ពងក្ងានមួយគ្រាប់ មានផ្ទុកប្រូតេអ៊ីនចំនួន ២០ក្រាម ខ្លាញ់ ១៩,១ក្រាម កូលេស្តេរ៉ុល ១២២៦,៩មីលីក្រាម សូដ្យូម ១៩៨មីលីក្រាម ប៉ូតាស្យូម ៣០២,៤មីលីក្រាម កាបូនអ៊ីដ្រាត ១,៩ក្រាម និងកាឡូរីរហូតដល់ ២៦៦,៦កាឡូរី រួមជាមួយនឹងសារធាតុចិញ្ចឹមសំខាន់ជាច្រើនមុខទៀត។
ទាំងនេះហើយជាមូលហេតុដែលគេចាត់ទុកពងក្ងាន គឺជាអាហារដែលល្អបំផុតសម្រាប់ស្ត្រីមានផ្ទៃពោះ ជាពិសេសវាអាចជួយជំរុញដល់ការបង្កកំណើត ហេតុនេះសម្រាប់ស្ត្រីដែលចង់ឆាប់មានកូនដូចបំណងគួរតែសាកល្បងទទួលទានពងក្ងាន។
អ្វីដែលសំខាន់នោះ គឺពងក្ងាន អាចជួយឲ្យកូនរបស់អ្នកកើតមានមានប្រាជ្ញាឆ្លាតលើសគេ ដោយសារតែសារធាតុចិញ្ចឹម ក៏ដូចជាអាហារូបត្ថម្ភដែលមាននៅក្នុងពងក្ងាន ជាអ្នកជំរុដល់ការរលូតលាស់ខួរក្បាលទារកក្នុងផ្ទៃ និងរហូតដល់ពេលកុមារមានអាយុ ៣ឆ្នាំ។
តែទោះជាយ៉ាងណាក៏ដោយ ស្ត្រីមានផ្ទៃពោះ គួរតែមានការប្រុងប្រយ័ត្នចំពោះការទទួលទានពងក្ងានបន្តិច ព្រោះវាក៏ផ្តល់គុណវិបត្តិវិញផងដែរ ប្រសិនបើទទួលទានច្រើនពេក។ ដោយសារតែ ជាតិខ្លាញ់ និងកូលេស្តេរ៉ុលខ្ពស់ របស់វា អាចធ្វើឲ្យអ្នកម្តាយ ឬមនុស្សទូទៅជួបបញ្ហាសុខភាពបាន៕
