ឪពុកម្តាយធ្លាប់ឃើញកូនយំឡើងស្វាយបបូរមាត់ ឬស្លេក បាត់សំលេងដែរឬទេ? នេះហើយគេហៅថា ការយំគាំង ដែលជាធម្មតាកើតមានចំពោះក្មេងអាយុ ១ឆ្នាំកន្លះ រហូតដល់អាយុ ៦ឆ្នាំ។ ការយំគាំងនេះ កើតឡើងដោយសារតែ កុមារទទួលអារម្មណ៍រន្ធត់ចិត្ត ការឈឺចាប់ខ្លាំងនៅពេលត្រូវរបួស ភាពភ័យខ្លាច ឬនៅពេលនរណាម្នាក់ររាំងមិនឲ្យពួកគេធ្វើអ្វីមួយដែលពួកគេចង់ធ្វើ។
ដូច្នេះ នៅពេលកូនយំគាំងបាត់សំលេង តើអ្នកគួរធ្វើដូចម្តេច?
នៅពេលកូនយំគាំងបាត់សំលេង អ្នកត្រូវដាក់ឲ្យគេងផ្អៀងនៅលើគ្រែ ហើយត្រូវសង្កេតមើលស្ថានភាពរបស់ពួកគេឲ្យមែនទែន ក្រែងមានអាការមិនស្រួល។ ក្រោយពេលកូនមានសភាពធម្មតាវិញហើយ អ្នកមិនត្រូវគំរាម ឬធ្វើតាមចិត្តរបស់ពួកគេឡើយ បើពុំដូច្នោះទេពួកគេនឹងមានទម្លាប់បែបនេះរហូតទាល់តែធំ។ ម្យ៉ាងវិញទៀត នៅពេកកូនយំគាំង អ្នកមិនត្រូវលើកពួកគេអង្រួន យកវត្ថុផ្សេងៗញាត់ចូលមាត់ ឲ្យបៅដោះ ឬទឹកឡើយ ព្រោះវាអាចធ្វើឲ្យពួកស្ទះផ្លូវដង្ហើម។
សូមចាំថាការយំគាំងនេះក៏អាចបាត់ទៅវិញខ្លួនឯងដែរ ក្នុងរយៈពេល ៣០ទៅ ៦០វិនាទី។ ក៏ប៉ុន្តែក្នុងករណីដែលកូនរបស់អ្នកមានបញ្ហាយំគាំងច្រើនដងក្នុងមួយថ្ងៃ អាចជាសញ្ញាមិនស្រួល ហេតុនេះត្រូវនាំពួកគេទៅកាន់មន្ទីរពេទ្យភ្លាម៕
