អ្នកជំនាញនៅសាកលវិទ្យាល័យ Washington សហរដ្ឋអាមេរិកបានបង្ហាញថា ឪពុកម្តាយគួរតែបន្ថែមស៊ុតឲ្យកុមារទទួលទានជាប្រចាំ ព្រោះវាជាប្រភពនៃសារធាតុចិញ្ចឹមដែលអាចជួយជំរុញដល់ការលូតលាស់ទារកបានល្អ និងកាត់បន្ថយភាពក្រិនផងដែរ។
ការសិក្សាដែលបានចុះផ្សាយនៅក្នុងទស្សនាវដ្តីមួយ បានបង្ហាញថា កុមារដែលទទួលទានស៊ុតមួយថ្ងៃមួយគ្រាប់ អាចកាត់បន្ថយភាពក្រិនរហូតដល់ទៅ ៤៧ភាគរយ និងបញ្ហាមិនព្រមធំឡើងទម្ងន់ដល់ទៅ ៤៧ភាគរយដូចគ្នា។
ការស្រាវជ្រាវនេះ អ្នកស្រាវជ្រាវបានពិសោធន៍ទៅលើក្មេងដែលមានអាយុចាប់ពី ៦ទៅ៩ខែ ដោយមួយក្រុមបន្ថែមស៊ុតមួយថ្ងៃមួយគ្រាប់ក្នុងរបបអាហារ ហើយមួយក្រុមទៀតមិនបន្ថែមស៊ុតនោះទេ។ ក្រោយការតាមដានអស់រយៈពេល៦ខែ កុមារដែលបានទទួលទានស៊ុត ជាមធ្យមមានការលូតលាស់០,៦៣ភាគរយនៃទំហំរាងកាយទាំងមូល ចំពោះកុមារដែលមិនបានទទួលទានស៊ុតមានការលូតលាស់ត្រឹមតែ ០,៣៩ភាគរយប៉ុណ្ណោះ។
អ្នកជំនាញបានបន្ថែមទៀតថា ស៊ុតជាប្រភពអាហារូបត្ថម្ភដ៏ល្អបំផុត ដែលត្រូវបានផ្តល់អនុសាសន៍ឲ្យកុមារទទួលទានរាល់ថ្ងៃ។ ដូច្នេះ ប្រសិនបើឪពុកម្តាយទាំងឡាយមានបំណងចង់ឲ្យកូនលូតកម្ពស់បានល្អ ហើយជៀសផុតពីបញ្ហាក្រិន កុំភ្លេចបន្ថែមស៊ុតទៅក្នុងរបបអាហារកុមារជាប្រចាំ៕
