ជាការពិតណាស់ នៅក្នុងរដូវរងាយមនុស្សភាគច្រើនតែងតែជួបបញ្ហាសុខភាព ជាពិសេសជំងឺផ្តាសាយ និងរលាកផ្លូវដង្ហើមតែម្តង។ ប៉ុន្តែសម្រាប់មនុស្សពេញវ័យមិនសូវចោទជាបញ្ហាប៉ុន្មាននោះទេ ក្រុមមនុស្សដែលប្រឈមខ្លាំងជាងគេគឺ កុមារ ព្រោះប្រព័ន្ធភាពស៊ាំពួកគេមានភាពទន់ខ្សោយខ្លាំងណាស់។ ដូច្នេះ ដើម្បីពង្រឹងប្រព័ន្ធភាពស៊ាំកុមារឲ្យរឹងមាំ ជៀសផុតពីបញ្ហាផ្សេងៗ អ្នកគួរតែធ្វើរឿងមួយចំនួនដូចខាងក្រោម៖
១.បន្លែមបន្លែ ផ្លែឈើទៅក្នុងរបបអាហារកុមារឲ្យបានច្រើន
លោក William Sears អ្នកជំនាញផ្នែកអាហាររូបត្ថម្ភបាននិយាយថា អ្នកម្តាយត្រូវបន្ថែមបន្លែផ្លែឈើ ឲ្យកុមារឲ្យបានច្រើន ដោយសារតែសារធាតុចិញ្ចឹមនៅក្នុងផ្លែឈើ អាចជួយផលិតកោសិកាឈាមក្រហម និងប្រយុទ្ធប្រឆាំងការឆ្លងមេរោគផ្សេង។
ការ៉ុត សណ្តែកខៀវ និងក្រូច សុទ្ធតែមានសារធាតុចិញ្ចឹមដូចជា វីតាមីន C និង ការ៉ូទីន ដែលអាចជួយបង្កើតប្រព័ន្ធភាពស៊ាំឲ្យកាន់តែរឹងមាំ។ ក្រៅពីនេះវាអាចជួយប្រយុទ្ធប្រឆាំងនឹងជំងឺមហារីក និងជំងឺបេះដូង នៅពេលកុមារធំពេញវ័យថែមទៀត។
២.គេងឲ្យបានគ្រប់គ្រាន់
លោកវេជ្ជបណ្ឌិត Kemper បាននិយាយថា ទារកតូចៗត្រូវការគេងរហូតដល់ ១៨ម៉ោងក្នុងមួយថ្ងៃ កុមារទើបនឹងចេះដើរត្រូវការគេង ១២ ទៅ១៣ម៉ោងក្នុងមួយថ្ងៃ ហើយកុមារធំជាងនេះត្រូវការគេង ១០ម៉ោងក្នុងមួយថ្ងៃ។
កង្វះនៃការគេង អាចបណ្តោលឲ្យកុមារងាយនឹងឆ្លងជំងឺផ្សេងៗ ព្រមទាំងការលូតលាស់ ដោយសារតែចំនួនកោសិកាត្រូវបានកាត់បន្ថយ ក៏ដូចជាប្រព័ន្ធភាពស៊ាំចុះខ្សោយផងដែរ។
៣.បង្រៀនឲ្យកូនធ្វើលំហាត់ប្រាណ
ការធ្វើលំហាត់ប្រាណ អាចជួយបង្កើនប្រព័ន្ធភាពស៊ាំកុមារឲ្យរឹងមាំ ហេតុនេះអ្នកម្តាយត្រូវព្យាយាមបង្រៀនកូនឲ្យមានទម្លាប់មួយនេះជាប្រចាំ។
៤.រក្សាអនាម័យឲ្យស្អាតជានិច្ច
អនាម័យល្អ មិនត្រឹមតែជាវិធីការពារប្រព័ន្ធភាពស៊ាំកុមារ មិនឲ្យមានភាពទន់ខ្សោយនោះទេ វាក៏អាចបញ្ជៀសពីបញ្ហាឆ្លងមេរោគផ្សេងៗផងដែរ។
ឪពុកម្តាយទាំងឡាយ គួរតែលាងសម្អាតដៃកុមារជាមួយនឹងសាប៊ូ រាល់មុនពេលញ៉ាំអាហារ និងបន្ទាប់ពីការលេងវត្ថុផ្សេងៗ ព្រោះភាពកខ្វក់ ឬមេរោគយើងមិនអាចមើលនឹងភ្នែកទទេបាននោះទេ៕
