ការស្រាវជ្រាវបានបង្ហាញថា ក្រៅពីញ៉ាំអាហារដែលមានផាសុខភាព និងធ្វើលំហាត់ប្រាណប្រចាំថ្ងៃ ការគេងបានគ្រប់គ្រាន់ក៏អាចជួយគ្រប់គ្រងភាពធាត់លើសទម្ងន់សម្រាប់កុមារផងដែរ។ ចំពោះកុមារ និងមនុស្សវ័យជំទង់ ដែលខ្វះនៃការគេង ត្រូវអ្នកជំនាញព្រមានហានិភ័យខ្ពស់នៃការឡើងទម្ងន់។
ក្នុងចំណោមកុមារដែលគេងមិនបានគ្រប់គ្រាន់ទាំងអស់ មានរហូតដល់ទៅ ៥៨ភាគរយ ហាក់ដូចជាឡើងទម្ងន់ ឬធាត់ ដែលជាកត្តាហានិភ័យទូទៅសម្រាប់ជំងឺមេតាប៉ូលិស។
អ្នកជំនាញ Michelle Miller មកពីសាកលវិទ្យាល័យ Warwick ប្រទេសអង់គ្លេសបាននិយាយថា ការលើសទម្ងន់អាចបណ្តោលឲ្យកើតជំងឺសរសៃឈាមបេះដូង និងជំងឺទឹកនោមផ្អែមប្រភេទទី២ ចំពោះកុមារ។ លទ្ធផលនៃការស្រាវជ្រាវបានបង្ហាញទៀតថា ការគេងអាចជាកត្តាហានិភ័យខ្លាំងសម្រាប់ជំងឺធាត់នៅពេលអនាគត់ចំពោះកុមារ។
ការសិកស្សានេះបានធ្វើលើទារកចំនួន ៤២នាក់ រួមទាំងកុមារ និងក្មេងវ័យជំទង់ដែលមានអាយុពី ០ដល់ ១៨ឆ្នាំ សរុប ៧៥,៤៩៩នាក់។ លោក Miller និយាយថា លទ្ធផលគួរឲ្យបារម្ភ ព្រោះហានិភ័យភាពធាត់បានកើនឡើងទាំងទារក និងមនុស្សវ័យជំទង់។
អត្រាភាពធាត់កើនឡើងទូទាំងពិភពលោក ហើយអង្គការសុខភាពពិភពលោក WHO បានប្រាកាសថា វាជារោគរាតត្បាតជាសកល ដែលគួរឲ្យបារម្ភ។
យោងតាមសមាគមន៍អាមេរិក បានឲ្យដឹងថា កុមារដែលមានអាយុចាប់ពី ៤ទៅ ១១ខែ ត្រូវការគេងចាប់ពី ១២ទៅ ១៥ម៉ោងក្នុងមួយថ្ងៃ ហើយកុមារអាយុ ១ទៅ២ឆ្នាំ ត្រូវការគេងចាប់ពី ១១ ទៅ ១៤ម៉ោង។
កុមារអាយុ ៣ទៅ ៥ឆ្នាំ ត្រូវការគេងចាប់ពី ១០ទៅ ១៣ម៉ោង ហើយចំណែកឯកុមារមានអាយុ ៥ទៅ ១៣ឆ្នាំត្រូវការគេងចាប់ពី ៩ទៅ ១១ម៉ោងក្នុងមួយថ្ងៃ។ សម្រាប់ក្មេងវ័យជំទង់ ដែលមានអាយុចាប់ពី ១៤ដល់ ១៧ឆ្នាំវិញ ត្រូវការគេងចាប់ពី ៨ ទៅ១០ម៉ោងក្នុងមួយថ្ងៃ៕
