ក្នុងនាមជាឪពុកម្តាយ តែងតែចង់ឃើញកូនមានការលូតកម្ពស់ត្រូវស្តង់ដារ នៅពេលធំពេញវ័យ។ ប៉ុន្តែក្នុងពេលបច្ចុប្បន្ននេះ មានកុមារជាច្រើនតែងតែជួបបញ្ហាលូតកម្ពស់មិនសមស្របទៅតាមអាយុឡើយ ឬអាចនិយាយបានថាកុមារជួបបញ្ហាក្រិនមិនព្រមធំ។ អាស្រ័យហេតុនេះ ប្រសិនបើអ្នកចង់ឲ្យកូនលូតកម្ពស់ខ្ពស់ដូចបំណង អ្នកត្រូវស្វែងរកវិធីជំនួយតាំងពីនៅវ័យកុមារ។
វិធីទី១៖ ជ្រើសរបបអាហារដែលមានតុល្យភាពសម្រាប់ការអភិវឌ្ឍរាងកាយទាំងមូល
ជំហ៊ានដំបូងដើម្បីសម្រេចបានការលូតកម្ពស់ អ្នកត្រូវជ្រើសរបបអាហារឲ្យមានតុល្យភាព។ ប្រសិនបើអ្នកពិតជាចង់ឲ្យកូនមានកម្ពស់ខ្ពស់ គួរដកហាំប៊ឺហ្គឺ ភេសជ្ជៈកំប៉ុងមានផ្ទុកជាតិផ្អែម និងអាហារចៀនឬបំពងចេញ។
ការផ្លាស់ប្តូររបបអាហារដែលមានតុល្យភាព សម្បូរទៅដោយសារធាតុចិញ្ចឹមគ្រប់ប្រភេទរួមមានប្រូតេអ៊ីន កាបូនអ៊ីដ្រាត និងខ្លាញ់។ អ្នកអាចផ្តល់ឲ្យកុមារញ៉ាំអាហារទាំងនេះក្នុងកម្រិតមធ្យម ប៉ុន្តែគួរជៀសវាងការញ៉ាំកាបូនអ៊ីដ្រាត និងខ្លាញ់ក្នុងពេលតែមួយ។
បន្ថែមពីលើរបបអាហារមានផាសុខភាព អ្នកគួរទទួលទានប្រូតេអ៊ីន សាច់គ្មានខ្លាញ់ រួមមានសាច់មាន់ និងសាច់ផ្សេងៗទៀត សណ្តែក ត្រី ផលិតផលទឹកដោះគោ…។ ប្រូតេអ៊ីននៅក្នុងអាហារទាំងនេះ អាចជួយពង្រឹងសាច់ដុំ ឆ្អឹង និងជំរុញដល់ការលូតលាស់របស់រាងកាយ។
ក្រៅពីនេះអ្នកក៏ត្រូវប្រើវីតាមីន D និងកាល់ស្យូមផងដែរ។ បន្លែបៃតង និងផលិតផលទឹកដោះគោ គឺជាប្រភពសម្បូរបែបនៃជាតិកាល់ស្យូម។
ការសិក្សាបានបង្ហាញថា ស័ង្កសី អាចជួយជំរុញដល់ការអភិវឌ្ឍរាងកាយយ៉ាងមានប្រសិទ្ធភាព។ ដូច្នេះ សូមបន្ថែមស្រូវសាលី គ្រាប់ល្ពៅ សណ្តែក ក្តាមសមុទ្រ …ទៅក្នុងរបបអាហារកុមារជាប្រចាំ។
វិធីទី២៖ ការធ្វើលំហាត់ប្រាណ
ការធ្វើឲ្យសាច់ដុំលាតសន្ធឹង គឺជាវិធីដ៏មានប្រសិទ្ធភាពមួយ ដើម្បីបង្កើនកម្ពស់សម្រាប់កូនរបស់អ្នក។ ការហាត់ប្រាណសាមញ្ញដែលទាក់ទងនឹងការសម្រាកនៃសាច់ដុំ គឺជាភាពចាំបាច់បំផុត។ នៅក្នុងចំណោមលំហាត់ប្រាណមួយ ដែលត្រូវបានណែនាំឲ្យកុមារអនុវត្ត គឺការឈរឲ្យត្រង់ជាប់ទៅនឹងជញ្ជាំង។
រួចប្រាប់ឲ្យកូនរបស់អ្នកលើកដៃឡើងឲ្យខ្ពស់ ហើយក្តាប់ដៃទាំងពីរឲ្យណែតតាមដែលអាចធ្វើទៅបាន។ ជំហ៊ានបន្ទាប់គឺ ខ្នងត្រូវពិតលើជញ្ជាំង និងឈរចម្អើតជើង ដើម្បីឲ្យសាច់ដុំជើងលាឲ្យអស់។ ការធ្វើលំហាត់ប្រាណនេះ ត្រូវធ្វើឡើងវិញឲ្យបាន១០ដងក្នុងមួយថ្ងៃ។
ការធ្វើលំហាត់ប្រាណដ៏អស្ចារ្យមួយផ្សេងទៀត គឺអ្នកត្រូវណែនាំឲ្យកូនអង្គុយនៅលើឥដ្ឋ ដោយជើងរបស់ពួកគេសណ្តូកឲ្យត្រង់ និងកន្ធែកចេញពីគ្នាឲ្យអស់។ បន្ទាប់មកធ្វើការបង្វិលចង្កេះ ឲ្យបានច្រើនជុំ នេះជាវិធីធ្វើលំហាត់ប្រាណដ៏មានប្រសិទ្ធភាព ព្រោះវាអាចជួយពង្រឹងឆ្អឹងខ្នង និងបង្កើនឥរិយាបថរបស់កុមារ។
ក្រៅពីនេះ អ្នកអាចជំរុញឲ្យកូនធ្វើលំហាត់ប្រាណដូចជា រត់ ហែលទឹក លោតអន្ទាក់ និងហាត់យូហ្គា… ដើម្បីឲ្យឆ្អឹងលូតលាស់បានល្អ៕
