នៅសប្តាហ៍ដំបូងបន្ទាប់ពីទារកចាប់កំណើត អ្នកត្រូវមានភារកិច្ចផ្លាស់ប្តូរខោទឹកនោម ឬកន្ទបទារកញឹកញាប់បំផុត ដោយសារតែប្លោកនោមរបស់ពួកគេតូច ឆាប់បញ្ចេញនោមណាស់។ អ្នកមិនគួរទុកវាអោយនៅសើម ឬកខ្វក់យូរពេកទេ ពុំដូច្នោះទេស្បែករបស់ពួកគេនឹងមានសុខភាពមិនល្អ។
ដើម្បីផ្លាស់ប្តូរ កន្ទប ឬខោទឹកនោមទារកឲ្យមានសុវត្ថិភាព អ្នកគួរអនុវត្តដូចខាងក្រោម៖
- លាងសម្អាតដៃរបស់អ្នកមុន និងក្រោយពេលផ្លាស់ប្តូរខោទឹកនោមម្តងៗ
- ដាក់ទារកអោយគេងនៅលើផ្ទៃស្អាត កម្ពស់ប្រហែលត្រឹមចង្កេះរបស់អ្នក
- ដៃរបស់អ្នកត្រូវកាន់ទារកថ្នមៗគ្រប់ពេល ដើម្បីការពារកុំអោយពួកគេធ្លាក់ចុះក្រោម
- ដាក់របស់របរប្រើប្រាស់សម្រាប់ទារកនៅជិតខ្លួនដើម្បីងាយស្រួលយោងយក (ដូចជាក្រដាស់អនាម័យ ឬកូនកន្សែងស្អាតជាដើម)
- ចំពោះទារិកា ប្រសិនបើពួកគេបន្ទោរបង់ ឬនោមអ្នកត្រូវជូតសម្អាតពីផ្នែកខាងមុខទៅមុន ដើម្បីជៀសវាងការបង្ករោគក្នុងផ្លូវទឹកនោម ឬទ្វារមាស
ប្រសិនបើអ្នកសម្អាតទារកឲ្យបានស្អាតល្អ ហើយមានសភាពស្ងួតជានិច្ច ស្បែកពួកគេគ្មានបញ្ហាកន្ទួលរមាស់ ឬឆ្លងមេរោគផ្តេសផ្តាស់ឡើយ៕
