ការផ្លាស់ប្តូរកន្តប ឬខោទឹកនោមទារក ពិតជាមានសារយៈសំខាន់ខ្លាំងណាស់ចំពោះសុខភាពទារក ព្រោះប្រសិនបើអ្នកទុកយូរពេកទឹកនោមនឹងពេញហៀរចេញមកក្រៅ ហើយអាចបង្កបញ្ហាដល់ស្បែកទារកថែមទៀត។ ជាពិសេសនៅពេលទារកបន្ទោរបង់ ត្រូវផ្លាស់ប្តូរចេញភ្លាម ដើម្បីកុំអោយស្បែកទារកមានភាពរលាក និងបង្ករោគផ្សេងៗដល់តំបន់ឯកជន។
ប៉ុន្តែទន្ទឹមនឹងការផ្លាស់ប្តូរកន្ទប ឬខោទឹកនោមនេះ អ្នកម្តាយទាំងឡាយក៏ត្រូវដឹងពីរបៀបលាងសម្អាតចំពោះកូនប្រុស ឬកូនស្រីផងដែរ ដើម្បីសុវត្ថិភាព។
របៀបលាងសម្អាតអោយកូនស្រី ពេលប្តូរខោទឹកនោម
នៅពេលផ្លាស់ប្តូរខោទឹកនោមអោយកូនស្រី អ្នកត្រូវប្រើទឹកស្អាតដើម្បីលាងជម្រះភាពកខ្វក់ចេញ ដោយលាងពីផ្នែកខាងមុខទៅក្រោយ ហើយកុំបញ្ជ្រាស់មកវិញអោយសោះ។ ការធ្វើបែបនេះ ដើម្បីការពារការឆ្លេងមេរោគពីទ្វារធំ មកកាន់ទ្វារមាសរបស់ពួកគេ។
របៀបលាងសម្អាតអោយកូនប្រុស ពេលប្តូរខោទឹកនោម
ការផ្លាស់ប្តូរខោទឹកនោម សម្រាប់កូនប្រុសមិនមានអ្វីគួរអោយព្រួយបារម្ភដូចកូនស្រីនោះទេ សំខាន់អ្នកត្រូវប្រើទឹកលាងជម្រះភាពកខ្វក់អោយតែអស់ចេញពីតំបន់គូថ និងពងស្វាសទៅវាជាការស្រេច។ ប៉ុន្តែប្រសិនបើអ្នកលាងសម្អាតលិង្គទារក មិនគួរប្រើកម្លាំងដៃធ្ងន់នោះទេ ជាពិសេសស្បែកគ្របចុងលិង្គ។
សូមចាំថា ការរក្សាផ្នែកខាងក្រោមទារកអោយស្ងួតជានិច្ច គឺជារឿងដ៏ប្រសើរបំផុតក្នុងដើម្បីញ្ចៀសការឆ្លងមេរោគ និងបញ្ហារលាកស្បែក៕
