ការចិញ្ចឹមកូនត្រូវពឹងផ្អែកទៅលើសុដន់ជាអ្នកផលិតទឹកដោះទាំងស្រុង ក៏ប៉ុន្តែប្រសិនបើក្បាលសុដន់លឹបចូលក្នុង ឬគេហៅថាដោះខ្វាក់វិញនោះ កូនរបស់អ្នកច្បាស់ជាបៅមិនកើតឡើយ។
សុដន់ខ្វាក់នេះ កើតមានឡើងទាំងបុរសនិងស្ត្រី ហើយជារឿយៗ វាត្រូវបានគេរកឃើញតាំងពីកំណើតមកម្ល៉េះ។ មូលហេតុដែលបណ្តោលឲ្យសុដន់ខ្វាក់ គឺក្បាលសុដន់មានភាពស្អិតជាមួយនឹងជាលិកានៅក្រោមសុដន់ ឬក៏បំពង់ទឹកដោះមានប្រវែងខ្លី ដែលធ្វើឲ្យក្បាលសុដន់ត្រូវបានទាញលឹបចូលក្នុង។ បញ្ហានេះត្រូវបានគេរកឃើញថា កើតមានឡើងចំពោះស្ត្រីប្រមាណជា ១០ ទៅ ២០ភាគរយតែប៉ុណ្ណោះ។
តើមានវិធីអាចជួយពន្លៀនក្បាលសុដន់ឲ្យលាចេញមកក្រៅវិញបានឬទេ? វិធីមាន គ្រាន់តែអ្នកអនុវត្តដូចខាងក្រោម៖
១.អ្នកត្រូវយកម្រាមដៃច្បូតពីលើក្បាលសុដន់ចុះមកក្រោមតិចៗរហូតដល់គល់សុដន់។
២.ប្រើម្រាមដៃចាប់ទាញក្បាលសុដន់តិចៗចេញមក ហើយធ្វើវាឡើងវិញឲ្យបាន ២ទៅ ៣ដង។
៣.នៅពេលងូតទឹក អ្នកអាចយកម្រាមដៃម៉ាស្សាជុំវិញក្បាលសុដន់ ហើយទាញឲ្យបានច្រើនដង។
សូមព្យាយាមអនុវត្តបច្ចេកទេសទាំងនេះ ក្បាលសុដន់របស់អ្នកនឹងលៀនចេញមកវិញ ហើយកូនរបស់អ្នកនឹងអាចបៅបានជាធម្មតា៕
