ជំងឺកែកជើង គឺជាភាពមិនធម្មតានៃជើងពីកំណើត ដែលជើងរបស់ទារកទើបនឹងកើតត្រូវបានរមួលទៅម្ខាងឆ្ពោះទៅជើងម្ខាងទៀត។ យោងតាមអ្នកជំនាញបានបង្ហាញថា ទារកម្នាក់ក្នុងចំណោមទារក ១០០០នាក់ កើតមកមានជំងឺកែកជើង ដែលបណ្តោលឲ្យពួកគេមានបញ្ហារូបរាងជាច្រើនដំណាក់ក្នុងជីវិត ប្រសិនបើមិនបានព្យាបាលទាន់ពេល។
បញ្ហាកែកជើងនេះ អាចកើតឡើងតែម្ខាង ឬទាំងសងខាង ហើយមិនបណ្តោលឲ្យទារកមានការឈឺចាប់នោះទេ ប៉ុន្តែអាចបណ្តោលឲ្យពួកគេមានផលលំបាកក្នុងការដើរនៅពេលធំឡើង។ កែកជើងកើតឡើងចំពោះទារកទើបនឹងកើត នៅពេលដែលសរសៃពួររបស់ពួកគេ(ភ្ជាប់ជាលិការ) រវាងជើង និងកែងជើងខ្លីជាងធម្មតា ដែលបណ្តោលឲ្យជើងរមួលចូល។
រោគសញ្ញា
ជំងឺកែកជើង អាចមានលក្ខណៈស្រាល ឬធ្ងន់ធ្ងរ ហើយលេចចេញរោគសញ្ញាដូចខាងក្រោម៖
១.ប្រអប់ជើង និងជើងខ្លីជាងធម្មតា។
២.ជើងរមួលចូលទៅខាងក្នុង និងបត់ចុះក្រោម។
៣.សាច់ដុំកំភួនជើងលែងអភិវឌ្ឍទៀតហើយ។
៤.បើកែកជើងតែម្ខាង នោះជើងម្ខាងទៀតនឹងខ្លីជាងបន្តិច។
៥.កែងជើងនឹងតូចជាធម្មតា។
កត្តាហានិភ័យនៃជំងឺកែកជើង
បើប្រៀបធៀប ក្មេងប្រុស កើតមកមានហានិភ័យច្រើនជាងក្មេងស្រីទ្វេរដង។ ចំពោះហានិភ័យផ្សេងផ្សេងៗទៀតមានដូចខាងក្រោម៖
ជំងឺសរសៃប្រសាទ៖ ស្ថានភាពពីកំណើតដូចជាជំងឺខួរក្បាល និងខួរឆ្អឹងខ្នង អាចបង្កើនហានិភ័យនៃការក្រិនសាច់ដុំចំពោះទារកទើបនឹងកើត។
ប្រវត្តិគ្រួសារ៖ ទោះបីជាស្ថានភាពនេះត្រូវបានគេចាត់ទុកថា មិនមែនជាបញ្ហាធំ ប៉ុន្តែវាអាចកើមានចំពោះទារកទើបនឹងកើតដែលមានប្រវត្តិគ្រួសារកើតជំងឺនេះ។
ការជក់បារី៖ ការជក់បារីរបស់អ្នកម្តាយអំឡុងពេលមានផ្ទៃពោះ អាចបង្កើនហានិភ័យកែងជើង។
កង្វះទឹកភ្លោះ៖ ការថយចុះនៃទឹកភ្លោះ ក៏ជាបញ្ហាមួយដែលបណ្តោលឲ្យកើតមានជំងឺកែកជើងចំពោះកូនផងដែរ។
វិធីការពារជំងឺកែកជើង
ដោយសារតែមូលហេតុពិតប្រាដកនៃជំងឺកែកជើងដែលកើតចំពោះទារកទើបនឹងកើត មិនទាន់មានអ្នកជំណាញវេជ្ជសាស្ត្ររូបណារកឃើញឲ្យបានច្បាស់លាស់ក៏ដោយ ប៉ុន្តែយើងអាចចាត់វិធានការការពារបាន។
១.ហាមជក់បារីក្នុងអំឡុងពេលមានផ្ទៃពោះ
២.ជៀសវាងការសេពគ្រឿងស្រវឹងក្នុងពេលមានផ្ទៃពោះ
៣.កុំប្រើថ្នាំគ្មានវេជ្ជបញ្ជារអំឡុងពេលមានផ្ទៃពោះ៕
