ពេលរដូវវស្សាចូលមកដល់ ឪពុកម្តាយទាំងឡាយគួរតែដឹងរឿងអ្វីខ្លះដែលត្រូវធ្វើ ដើម្បីថែរក្សាសុខភាពកូនតូចៗឲ្យបានល្អ។ ដោយសារតែអាកាសធាតុនារដូវនេះ មានការផ្លាស់ប្តូរញឹកញាប់ មានទាំងសំណើម និងភ្លៀងធ្លាក់ច្រើន។ ថ្ងៃនេះ BabayAndMom នឹងធ្វើការបង្ហាញពីវិធីសស្ត្រ៤យ៉ាង ដើម្បីត្រៀមការពារកូនពីជំងឺផ្តាសាយក្នុងរដូវវស្សា។
១.ត្រូវទិញឧបករណ៍ការពារភ្លៀងទុកជានិច្ច
ចូលដល់រដូវវស្សាភ្លៀងអាចចាប់ផ្តើមធ្លាក់គ្រប់ពេល ដោយមិនបានជូនដំណឹងយើងជាមុននោះទេ ប្រសិនបើអ្នកយកកូនចេញទៅក្រៅផ្ទះ អ្នកត្រូវមានឆ័ត្រ ឬអាវភ្លៀងតាមខ្លួនជានិច្ច។ ការប្រើប្រាស់ឧបករណ៍ទាំងនេះអាចជួយឲ្យកូនរបស់អ្នកមិនទទឹក ឬសើម ដែលជាមូលហេតុបង្កទៅជាជំងឺផ្តាសាយ។ ជាពិសេសត្រូវប្រើកន្សែងជូតកូនភ្លាម ប្រសិនបើអ្នកឃើញមុខរបស់ពួកគេសើម ហើយត្រូវបន្តពាក់អាវភ្លៀងរហូតដល់ទីសុវត្ថិភាព។
២.ពាក់ស្បែកជើងកវែង
ជារឿយៗនៅពេលមានភ្លៀងធ្លាក់ទឹកនឹងហូរកាត់តាមផ្លូវដែលធ្វើឲ្យជើងរបស់កូនទទឹក ហើយពេលកូនដើរឆ្លងកាត់ទឹកភ្លៀងត្រូវប្រឈមនឹងការឆ្លងមេរោគដែលនៅកកកុញក្នុងទឹក ដែលជាបុព្វហេតុនៃជំងឺផ្សេង។ ដូច្នេះសូមណែនាំឲ្យឪពុកម្តាយទិញស្បែកជើងកវែងឲ្យកូនពាក់ ដើម្បីការពារការទទឹកជើង និងភាពកខ្វក់នៅលើផ្លូវ។
៣.កុំឲ្យកូនសើម
ប្រសិនបើអ្នកយកកូនមកពីសាលា ហើយឃើញខ្លួនពួកគេមានសភាពសើមដោយសារភ្លៀង គួរប្រញាប់ឲ្យគេងូតទឹក ហើយប្តូរសម្លៀកបំពាក់ភ្លាម។ ព្រោះបើរាងកាយសើមយូរពេកនឹងធ្វើឲ្យកូនកើតជជំងឺផ្តាសាយ និងងាយគ្រុនក្តៅ។
៤.ពាក់ម៉ាសជានិច្ច
ដូចដែលអ្នកដឹងស្រាប់ហើយជំងឺផ្តាសាយងាយនឹងឆ្លងណាស់ ជាពិសេសពេលនៅជិតមនុស្សដែលផ្ទុកជំងឺ។ ដូច្នេះអ្នកជំនាញបានណែនាំឲ្យឪពុកម្តាយអនុវត្តពាក់ម៉ាស់ឲ្យកូនៗជានិច្ចពេលចេញទៅក្រៅផ្ទះ។ ការធ្វើបែបនេះអាចកាត់បន្ថយហានិភ័យនៃការឆ្លងជំងឺផ្តាសាយ ឬជំងឺ COVID-19 ដែលកំពុងតែរីករាលដាល។
តាមពិតវិធីសាស្ត្រថែទាំងកុមារក្នុងរដូវវស្សាមានភាពសាមញ្ញៗបំផុត តែអ្នកត្រូវព្យាយាមអនុវត្តឲ្យបានជាប់លាប់ កុំធ្វេសប្រហែលឲ្យសោះ៕
