ការបំបៅកូនដោយទឹកដោះមានសារៈសំខាន់សម្រាប់សុខភាពទារកទើបនឹងកើត ព្រោះទឹកដោះម្តាយមានផ្ទុកអង្គបដិប្រាណដែលជួយការពារទារកពីជំងឺទូទៅមួយចំនួន ហើយវាក៏ផ្តល់ថាមពល និងសារធាតុចិញ្ចឹមដែលទារកទើបនឹងកើតត្រូវការសម្រាប់រយៈពេលប៉ុន្មានខែដំបូនៃជីវិត។ អង្គការសុខភាពពិភពលោក WHO បានណែនាំឲ្យម្តាយបំបៅដោះកូនដោយទឹកដោះតែមួយមុខគត់រយៈពេល ៦ខែ ហើយបន្តបំបៅរួមជាមួយនឹងអាហារបំប៉នបន្ថែមដែលមានជីវជាតិរហូតដល់អាយុ ២ឆ្នាំ ឬលើសនេះ។
ទោះជាយ៉ាងណាការបំបៅដោះកូនដោយទឹកដោះ អាចជាការពិបាកសម្រាប់អ្នកម្តាយខ្លះដែលមានបញ្ហាសុខភាព អ្នកម្តាយខ្វះទឹកដោះ ឬអ្នកម្តាយដែលត្រូវចូលបំពេញការងារឡើងវិញ…។ នេះជាមូលហេតុដែលត្រូវបង្ខំឲ្យពួកគេជ្រើសរើសទឹកដោះគោមកជំនួស ប៉ុន្តែនៅពេលប្តូរឲ្យកូនបៅដោយប្រើដបជ័រទឹកជំនួស ពេលដំបូងៗអាចមានបញ្ហាខ្លះ ព្រោះពួកគេបដិសេធមិនព្រមបៅ។
តាមពិតមានហេតុផលនៅពីក្រោយខ្នងមួយចំនួនដែលធ្វើឲ្យកូនបដិសេធមិនព្រមបៅទឹកដោះគោ ពេលផ្តាច់ដោះដំបូង។
១.កូនរបស់អ្នកចង់បៅដោះម្តាយបន្តទៀត។
២.កូនរបស់អ្នកមិនចូលចិត្តសភាពនៃក្បាលមឹមរបស់ដបជ័រ។
៣.ការដាក់ទីតាំងឲ្យកូនបៅមិនបានត្រឹមត្រូវ ឬមិនស្រួល។
៤.កូនរបស់អ្នកមិនទាន់ឃ្លាន។
៥.កូនរបស់អ្នកមិនស្រួលខ្លួន ឬមិនចង់បៅទឹកដោះគោតែម្តង។
៦.កូនរបស់អ្នកមិនចូលចិត្តរសជាតិនៃទឹកដោះគោ។
ជាទូទៅនៅកូនមិនចង់បៅទឹកដោះគោ ពួកគេនឹងបញ្ចេញកាយវិការដូចខាងក្រោម៖
១.កូនរបស់អ្នកចាប់ផ្តើមយំនៅពេលអ្នកដាក់ឲ្យពួកគេបៅ។
២.កូនគេងលក់នៅពេលអ្នកដាក់ឲ្យពួកគេបៅ។
៣.កូនរបស់អ្នកបែរក្បាលចេញ ពេលដែលអ្នកព្យាយាមឲ្យពួកគេបៅ។
៤.បើអ្នកនៅតែព្យាយាមរុញក្បាលមឹមចូលក្នុងមាត់ ពួកគេនឹងរើបំរាស់ ហើយក្អក។
៥.កូនមិនព្រមលេបទឹកដោះគោទេ តែពួកគេព្យាយាមបង្ហៀរចេញពីមាត់។
៦.កូនបិទមាត់មិនព្រមបៀបក្បាលមឹមឡើយ។
ដូច្នេះដើម្បីឲ្យកូនបៅដោយគ្មានការបដិសេធ អ្នកត្រូវរងចាំឲ្យពួកគេឃ្លានសិន ហើយត្រូវរៀបកន្លែងកូនបៅឲ្យបានត្រឹមត្រូវ។ ចំពោះក្បាលមឹម អ្នកត្រូវជ្រើសរើសជ័រដែលទន់ៗមិនរឹងពេក ហើយបំបៅដោះរាល់ ៣ទៅ៤ម៉ោងម្តង៕
