ការគេងមិនលក់ គឺជាបញ្ហាមួយដែលកើតមានចំពោះស្ត្រីមានផ្ទៃពោះភាគច្រើន ជាពិសេសនៅពេលដែលកូនក្នុងផ្ទៃវិវត្តកាន់តែធំបន្តិចម្តង។ ទោះជាយ៉ាងណា ការគេងមិនលក់របស់ស្ត្រីមានផ្ទៃពោះ អាចដោះស្រាយបាន ដោយគ្រាន់តែអនុវត្តវិធីងាយៗប៉ុណ្ណោះ។
គន្លឹះទី១៖ គេងចំហៀង
នៅពេលអ្នកគេងផ្ងារ ទម្ងន់របស់ទារកនឹងដាក់សំពាធខ្លាំងលើលំហូរឈាម ធ្វើឲ្យការបញ្ចូនឈាមទៅកាន់បេះដូងត្រូវបានកាត់បន្ថយ។ ប៉ុន្តែបើអ្នកគេងចំហៀងវិញនោះ សម្ពាធនឹងត្រូវបានបន្ធូរ។ ដូច្នេះនៅពេលគេង អ្នកម្តាយគួរតែដាក់ខ្នើយនៅត្រងចន្លោះជង្គង់ផង ដើម្បីកល់ជើង និងឆ្អឹងខ្នងឲ្យស្មើគ្នា។
គន្លឹះទី២៖ កាត់បន្ថយការទទួលទានភេសជ្ជៈ៣ម៉ោងមុនពេលចូលគេង
ក្នុងត្រីមាសទី១ ស្បូនកំពុងពង្រីកកន្លែងទំនេរសម្រាប់កូន ហេតុនេះវានឹងបន្ថែមសម្ពាធដល់ប្លោកនោមរបស់អ្នក ធ្វើឲ្យអ្នកនោមញឹក។ នេះហេតុផលមួយដែលធ្វើឲ្យស្ត្រីផ្ទៃពោះទាំងឡាយតែងតែនោមញឹក។
គន្លឹះទី៣៖បង្កើនទម្លាប់ចូលគេង
វាពិតជាមានប្រយោជន៍ណាស់ សម្រាប់អ្នកមានទម្លាប់កំណត់ពេលវេលាក្នុងការចូលគេងបានត្រឹមត្រូវ ព្រោះរាងកាយរបស់អ្នកត្រូវការពេលយ៉ាងតិច ៣០នាទីដើម្បីសម្រាក និងរៀបចំខ្លួនក្នុងការគេង។ ម្យ៉ាងវិញទៀត អ្នកអាចងូតទឹកក្តៅឧណ្ឌៗមុនពេលចូលគេង ក៏អាចជួយឲ្យគេងលក់ស្រួលផងដែរ។
គន្លឹះទី៤៖ ជៀសវាងញ៉ាំអាហារមុនពេលចូលគេង
កុំព្យាយាមញ៉ាំអាហារឲ្យសោះមុនពេលចូលគេង ២ម៉ោង ព្រោះវាអាចបណ្តោលឲ្យអ្នកម្តាយច្រាលអាស៊ីត ឬក្រហាយទ្រូងបាន។ ទីបំផុតអ្នកមិនត្រឹមតែពិបាកក្នុងខ្លួននោះទេ ថែមទាំងគេងមិនលក់ផងដែរ។
ប្រសិនបើអ្នកអាចអនុវត្តតាមការណែនាំទាំងបួនចំណុចនេះបាន អ្នកនឹងគេងលក់ស្រួល គ្មានការរំខានដោយសារសម្ពាធណាមួយឡើយ៕
