រាប់​ចង្វាក់​ដង្ហើម​អាច​ដឹងថា កូន​មាន​ជំងឺ​រលាក​សួត​ឬ​អត់?

0

ជំងឺ​រលាក​សួត ត្រូវបាន​គេ​ចាត់ទុកជា​ឃាតករ​សម្ងាត់ ដែល​អាច​សម្លាប់​កុមារតូចៗរាប់លាន​នាក់​ជា​រៀងរាល់ឆ្នាំ​នៅ​ទូទាំង​ពិភពលោក។ យោងតាម​ស្ថិតិថ្មីៗនេះ​បាន​បង្ហាញថា ជំងឺ​រលាក​សួត ប​ណ្តោ​ល​ឲ្យ​មនុស្ស​ស្លាប់​ប្រមាណ​ជា ២លាន​នាក់​ក្នុង​មួយឆ្នាំ​នៅ​ទូទាំង​ពិភពលោក ច្រើនជាង​ចំនួន​អ្នកស្លាប់​ដោយសារ​ជំងឺ​អេស​ដ៍ គ្រុនចាញ់ និង​ក​ញ្ជ្រិ​ល​បូក​បញ្ចូល​គ្នា​ទៅទៀត។ វា​ត្រូវបាន​គេ​ប៉ាន់​ស្មានថា ជា​រៀងរាល់ថ្ងៃ​មាន​កុមារ​ប្រមាណ ៤.៣០០នាក់ បាន​ស្លាប់​ដោយសារ​ជំងឺ​រលាក​សួត នៅ​ទូទាំង​ពិភពលោក មានន័យថា​រាល់ ២០វិនាទី​កុមារ​ម្នាក់​បាន​ស្លាប់​ដោយសារ​ជំងឺ​នេះ។

ហេតុដូច្នេះ​ការដឹង​ពី​រោគសញ្ញា អាច​នាំ​កូន​ទៅ​សង្គ្រោះបាន​ទាន់ពេលវេលា។

ជារឿយ​កុមារ​មាន​អាការ​ក្អក និង​ក្តៅខ្លួន​ភាគច្រើន ប៉ុន្តែ​វិធី​ដើម្បី​កំណ​ត​ជំងឺ​រលាក​សួត គឺ​ការរាប់​អត្រា​ដង្ហើម​របស់​កុមារ។ ប្រសិនបើ​កុមារ​មាន​ដង្ហើមញាប់​ជាង​ធម្មតា វា​ជា​រោគសញ្ញា​ដំបូង​នៃ​ជំងឺ​រលោក​សួត​ចំពោះ​កុមារ។

ការរាប់​អត្រា​ចង្វាក់​ដង្ហើម​របស់​កុមារ ដែល​ឪពុកម្តាយ​គួរតែ​ធ្វើតាម​ការណែនាំ៖

សម្រាប់​កុមារ​ដែលមាន​អាយុ​ក្រោម ២ខែ ប្រសិនបើ​ចង្វាក់​ដង្ហើម​លើសពី ៦០ដង​ក្នុង​មួយ​នាទី ត្រូវបាន​គេ​ចាត់ទុកជា​ការដក​ដ្ហើ​ម​ញាប់។

សម្រាប់​កុមារ​ចាប់ពី​អាយុ ២ខែ ដល់១២ខែ ប្រសិនបើ​ចង្វាក់​ដង្ហើម​លើសពី ៥០ដង​ក្នុង​មួយ​នាទី ត្រូវបាន​គេ​ចាត់ទុកជា​ការដកដង្ហើម​ញាប់។

ចំពោះ​កុមារ​អាយុ​ចាប់ពី ១ទៅ ៥ឆ្នាំ ប្រសិនបើ​ចង្វាក់​ដង្ហើម​លើស ៤០ដង ក្នុង​មួយ​នាទី​ត្រូវបាន​គេ​ចាប់​ទុកជា​ការដក​ដង្ហើមញាប់។

នៅពេល​រាប់​ដង្ហើម​អ្នក​ត្រូវ​លាត់​អាវ​កុមារ​ឡើង ដើម្បី​ងាយស្រួល​មើល​ក្បាលពោះ និង​ដើមទ្រូង។ គួរ​ដាក់​ឲ្យ​កូន​គេង​ចុះ តែ​មិនបាច់​ខំប្រឹង រាប់​ពេលដែល​កូន​មាន​អារម្មណ៍​មួម៉ៅ​នៅ​មិន​ស្ងៀម​នោះទេ។ តាម​ស្តង់ដារ​ឪពុកម្តាយ​គួររាប់ចំ​នួន១៥វិនាទី ហើយ​គុណ​នឹង៤ដង ប៉ុន្តែ​ចំពោះ​ទារកតូចៗត្រូវ​រាប់​ឲ្យ​បាន​ពេញ​មួយ​នាទី ព្រោះ​ដង្ហើម​ពួកគេ​ខ្លី។ ដើម្បី​ឲ្យ​កាន់តែច្បាស់​ចំពោះ​ដង្ហើម​មិន​ទៀងទាត់​របស់​កុមារ ត្រូវ​រាប់​ឡើងវិញ​ឲ្យ​បាន​ចំនួន៣ដង។

ជាពិសេស​កុមារ​ដែលមាន​ដង្ហើមញាប់ អ្នកនឹង​ឃើញ​ព្រំប្រទល់​ដើមទ្រូង និង​ពោះ​របស់​ពួកគេ​ផតប៉ោងៗ ដូចជា​ពិបាក​ដកដង្ហើម​ខ្លាំងណាស់ នេះ​ជាស​ញ្ញា​នៃ​ជំងឺ​រលាក​សួត​ចំពោះ​ទារក​ទើបនឹង​កើត។

ឪពុកម្តាយ​ត្រូវ​ស្តាប់​ដង្ហើម​របស់​កូន​ដោយ​ឲ្យ​បាន​ដិតដល់​បំផុត ព្រោះ​ជំងឺ​រលាក​សួត​ក៏​អាចធ្វើ​ឲ្យ​កុមារ​ពិបាក​ដក​ដ្ហើ​ម ឬ​លាន់​សំលេង​ពេល​ដកដង្ហើម។

ក្នុងករណី​កុមារ​មាន​អាការ​ក្អក តឹង​ច្រមុះ ហៀរ​សំបោរ គ្រុនក្តៅ ប៉ុន្តែ​ដង្ហើម​មិន​ញាប់ មិន​ញ័រ​ទ្រូង ជាទូទៅ​កុមារ​មិនមាន​ជំងឺ​រលាក​សួត​ទេ៕