វាពិតជាគួរឲ្យបារម្ភណាស់ បាក់តេរីនៅតាមចន្លោះប្រហោងធ្មេញអាចបណ្តោលឲ្យធ្មេញពុក ដែលភាគច្រើនត្រូវបានគេរកឃើញថាជាបាក់តេរី ដូចគ្នាទៅនឹងបាក់តេរីនៅក្នុងមាត់របស់ឪពុកម្តាយដែរ។ រហូតដល់គេសន្និដ្ឋានថា ការខាំ ការផ្តុំ ឬទំពារអាហារបញ្ចុកកូន គឺជាដើមហេតុដែលនាំឲ្យកូនកើតមានបញ្ហាពុកធ្មេញ។
ការថែរក្សាមាត់ធ្មេញត្រូវបានអនុវត្តតាំងពីទារកស្ថិតក្នុងស្បូនម្ល៉េះ ព្រោះថាប្រសិនបើអ្នកទទួលបានសារធាតុចិញ្ចឹមគ្រប់គ្រាន់រួមទាំងកាល់ស្យូម ផូស្វ័រ វីតាមីន នឹងធ្វើឲ្យធ្មេញល្អតាំងពីកំណើត។ ម្យ៉ាងវិញទៀត ការថែរក្សាមាត់ធ្មេញរបស់កូនឲ្យមានសុខភាពល្អ សូមព្យាយាមសង្កេតមើលធ្មេញ និងអណ្តោតរបស់កូនមុនពេលចូលគេង ថាបានសម្អាតល្អហើយឬនៅ។ កុំអនុញ្ញាតឲ្យមានកំទេចកំទីអាហារនៅលើអណ្តោត ឬធ្មេញឲ្យសោះ ប្រសិនបើវានៅជាប់គាំងយូរអាចប្រឈមនឹងបញ្ហាពុកធ្មេញ។
សូម្បីតែការដុសធ្មេញ និងថែទាំងមាត់ធ្មេញមិនបានត្រឹមត្រូវក៏អាចបង្កដល់បញ្ហាពុកធ្មេញរបស់កុមារផងដែរ ប៉ុន្តែសំខាន់ជាងនេះទៅទៀតគឺការចម្លងបាក់តេរីពីម្តាយទៅកូន។ ប្រសិនបើអ្នកម្តាយចូលចិត្តផ្លុំអាហារ ឬទំពារអាហារបញ្ចុកកូន អាចបង្កើតហានិភ័យនៃការបង្កឲ្យមានធ្មេញពុកដោយមិនដឹងខ្លួន។
វិធីការពារបញ្ហាពុកធ្មេញ
១.គ្រប់គ្រងអនាម័យមាត់របស់ឪពុកម្តាយ និងអ្នកមើលថែទាំងអស់នៅជិតកូន តាមរយៈការដុសសម្អាតធ្មេញឲ្យបានត្រឹមត្រូវជាប្រចាំ និងទៅជួបពេទ្យធ្មេញរៀងរាល់ ៦ខែម្តង។
២.ត្រូតឹងរឹងជាមួយមនុស្សគ្រប់គ្នាដែលចិញ្ចឹមកូន ដោយកុំឲ្យផ្លុំអាហារ កុំប្រើស្លាបព្រារួមគ្នា ឬទំពារអាហារបញ្ចុកកូនឲ្យសោះ។
៣.ចំពោះកុមារដែលមិនទាន់មានធ្មេញអាចសម្អាតបានដោយប្រើកន្សែងស្អាតរុំនៅលើចង្អុលដៃ ហើយជ្រលក់ទឹកក្តៅឧណ្ឌៗមកជូតសម្អាតនៅលើអញ្ចាញធ្មេញ និងអណ្តោត។
ចំពោះកុមារដែលមានការសម្អាតលើកដំបូងអាចមានផលលំបាកខ្លះ ប៉ុន្តែសូមព្យាយាមដើម្បីមាត់ធ្មេញរបស់កូនមានសុខភាពល្អ និងមិនមានជំងឺពុកធ្មេញ៕
