អ្វីជាសញ្ញាដំបូងនៃជំងឺហឺតចំពោះទារក? ជំងឺហឺត អាចមានគ្រោះថ្នាក់ណាស់ប្រសិនបើមិនត្រូវបានព្យាបាលទាន់ពេលវេលា។ ដូច្នេះកត្តាសំខាន់ អ្នកត្រូវរកមើលរោគសញ្ញាដំបូងរបស់វា ដើម្បីការពារកុំឲ្យទារកមានបញ្ហាធ្ងន់ធ្ងរ។ ទារកមានផ្លូវដង្ហើមតូចជាងមនុស្សពេញវ័យ ដែលធ្វើឲ្យប្រឈមនឹងគ្រោះថ្នាក់ខ្លាំង ហើយខាងក្រោមនេះជារោគសញ្ញាដំបូងនៃជំងឺហឺតចំពោះទារក៖
ពិបាកដកដង្ហើម
ប្រសិនបើអ្នកសម្គាល់ឃើញទារក ប្រឹងដកដង្ហើមខុសធម្មតា វាអាចជាសញ្ញាមួយនៃជំងឺហឺត។ ម្យ៉ាងវិញទៀតជាទូទៅក្រពះរបស់ទារក គួរត្រូវបានចូលរួមក្នុងដំណើរការដង្ហើម ហេតុនេះប្រសិនបើអ្នកឃើញក្រពះរបស់ទារកធ្វើចលនាច្រើនក្នុងពេលដកដង្ហើម គួរតែប្រញាប់នាំកូនទៅមន្ទីរពេទ្យភ្លាម។
ក្អកញឹក
នេះជាសញ្ញាទូទៅមួយទៀតដែលបង្ហាញពីការចាប់ផ្តើមនៃជំងឺហឺត។ ការក្អក ជាសកម្មភាពសម្អាតផ្លូវដង្ហើម ប៉ុន្តែបើការក្អកច្រើនពេក បង្ហាញថាមានអ្វីមួយរារាំង ឬផ្លូវដង្ហើមអាចហើមជាដើម។
ដកដង្ហើមលាន់ដូចស្រម៉ុក
ប្រសិនបើអ្នកសម្គាល់ឃើញ ទារកពិបាកក្នុងការដកដង្ហើមគ្រប់ពេល ហើយមានលឺសំលេងក្រេតក្រតដូចមនុស្សស្រម៉ុក គួរនាំគេទៅពិនិត្យសុខភាពឲ្យបានឆាប់។
ពិបាកក្នុងការញ៉ាំអាហារ
ទារកមិនអាចមានសកម្មភាពក្នុងការញ៉ាំ ឬជញ្ជក់អ្វីបន្ថែមទៀតទេ ព្រោះវាអាចបន្ថយការទទួលយកអុកស៊ីសែន។ ដូច្នេះ នេះក៏ជាចំណុចមួយដែលឪពុកម្តាយគ្រប់រូបត្រូវប្រុងប្រយ័ត្នផងដែរ៕
