បំបៅដោះកូនដល់៦ខែ ទាំងម្តាយ និងកូន អាចជៀសផុតពីជំងឺកាចៗច្រើនមុខ

0

ការ​បំបៅ​ដោះ​កូន​តែមួយ​មុខ​គត់ មិន​ត្រឹម​តែមាន​សារៈសំខាន់​ចំពោះ​សុខភាព​ទារក​នោះទេ សូម្បីតែ​អ្នក​ម្តាយ​ក៏​ទទួលបាន​អត្ថប្រយោជន៍​ដូចគ្នា ជាពិសេស ​គឺ​គេច​ផុតពី​ជំងឺមហារីក និង​គាំងបេះដូង។

ការស្រាវជ្រាវ​មួយ​បាន​បង្ហាញថា អ្នក​ម្តាយ​ដែល​ចិញ្ចឹម​កូន​ដោយ​ទឹកដោះ អាច​កាត់បន្ថយ​ជំងឺមហារីក​សុដន់ មហារីក​ក្រពេញ​អូវែ ជំងឺ​ទឹកនោមផ្អែម ជំងឺលើសឈាម និង​គាំងបេះដូង។

ចំពោះ​កុមារ​វិញ​ ប្រសិនបើ​បំបៅ​ដោះ​​តែមួយ​មុខ​គត់ គឺអាច​កាត់បន្ថយ​ហានិភ័យ​នៃ​ជំងឺមហារីក​ឈាម ដំបៅ​ពោះវៀន ឈឺក្រពះ ការឆ្លង​មេរោគ​ផ្លូវដង្ហើម ជំងឺ​ធាត់ និង​បញ្ហា​សុខភាពផ្សេងៗទៀត។

ក៏ប៉ុន្តែ​បច្ចុប្បន្ននេះ អ្នក​ម្តាយ​ភាគច្រើន​មិនសូវ​បំបៅកូន​ដោយ​ទឹកដោះ​នោះទេ ដោយសារតែ​ភាព​មមាញឹក​ជាមួយនឹង​ការងារ ហើយ​អ្នកខ្លះ​ខ្លាច​ខូច​សុដន់។

ការមិនបានបៅដោះម្តាយ អាច​ប​ណ្តោ​ល​ឲ្យ​កុមារ​ភាគច្រើន​មាន​រាងកាយ​មិនសូវ​មាំមួន និង​ឧស្សាហ៍​ឈឺ​ញឹក ជាង​កុមារ​ដែល​បៅដោះ​ម្តាយ។

ហេតុនេះហើយ ទើប​អ្នកជំនាញ​បានផ្តល់​អនុ​វ​សាសន៍​ថា ដើម្បី​ទទួលបាន​សុខភាព​ល្អ​ទាំង​ម្តាយ និង​កូន អ្នក​គួរតែ​បំបៅ​ដោះ​កូន​យ៉ាងហោចណាស់​ក៏បាន៦ខែ​ដែរ៕