បើចង់ថែរក្សាកូនក្នុងផ្ទៃឲ្យមានសុខភាពល្អ គ្មានវិធីអ្វីល្អប្រសើរជាងការពិនិត្យតាមដានការអភិវឌ្ឍគភ៌ជាប្រចាំនោះទេ ជាពិសេសត្រូវសុំប្រឹក្សាយោបល់ជាមួយអ្នកជំនាញនៅជិតអ្នកបំផុត អំពីរបៀបថែទាំងខ្លួនដែលត្រឹមត្រូវបំផុត។
តើមូលហេតុអ្វី ដែលបណ្តោលឲ្យកូនស្លាប់ក្នុងផ្ទៃ?
ទំរាំតែអាចពពោះបាន មានគូស្នេហ៍មួយចំនួនត្រូវចំណាពេលយូរណាស់ ដោយសារតែលក្ខខណ្ឌសុខភាពបន្តពូជមិនអំណោយផលដូចគេ។ ប៉ុន្តែ ដំណាក់កាលពពោះមិនប្រាដកថា ទារកមានសុវត្ថិភាពមួយរយភាគរយនោះទេ លុះត្រាតែកូនកើតមកឃើញពន្លឺថ្ងៃសិន។
ក្នុងរយៈពេល៩ខែពេញនេះ ស្ត្រីមួយចំនួនមិនអាចពពោះបានជោគជ័យនោះទេ ដោយតែមូលហេតុផ្សេងៗដូចជារលូត ឬកូនស្លាប់ក្នុងផ្ទៃជាដើម។ តាមពិតមូលហេតុសំខាន់ៗដែលធ្វើឲ្យកូនស្លាប់ក្នុងផ្ទៃ មានតែ៣ចំណុច ដែលអ្នកគួរតែស្វែងយល់។
១.សុកមានភាពទន់ខ្សោយ មិនអាចផ្តល់អាហារបំប៉នឲ្យទារកបាន ដូច្នេះទារកអាចគ្មានការលូតលាស់ ហើយទីបំផុតត្រូវស្លាប់ដោយសារការអត់អាហារ។
២.ស្ត្រីមានផ្ទៃពោះធ្វើការធ្ងន់ហួសកម្លាំង ទទួលអាហារូបត្ថម្ភមិនគ្រប់គ្រាន់ ឬការប៉ះទង្គិចពោះដោយចៃដន្យ ក៏អាចបណ្តោលឲ្យទារកស្លាប់ដែរ។
៣.ភាពមិនប្រក្រតីនៃការលូតលាស់របស់ទារក មិនត្រឹមធ្វើឲ្យទារកមានសុខភាពមិនល្អនោះទេ ពួកគេក៏អាចប្រឈមនឹងការស្លាប់ផងដែរ។
អាស្រ័យហេតុនេះ សូមស្ត្រីមានផ្ទៃពោះទាំងឡាយឧស្សាហ៍ពិនិត្យពោះឲ្យបានទៀងទាត់ ក្នុងករណីដែលកូនស្លាប់ក្នុងផ្ទៃត្រូវយកចេញភ្លាម បើទុកយូរទាំងគ្រោះថ្នាក់ដល់ជីវិតអ្នកម្តាយទៀត៕
