ជាធម្មតា នៅពេលដែលលួងកូនឲ្យឈប់យំ តែពួកគេមិនព្រមឈប់យំ ឪពុកម្តាយភាគច្រើនតែងតែរកវិធីផ្សេងៗ ដូចជាស្រែកកំហក ប្រើរំពាត់ ឬការនិយាយរឿងខ្មោចបន្លាច ដើម្បីឲ្យកូនខ្លាចហើយឈប់យំ។ ក៏ប៉ុន្តែ បើយោងតាមអ្នកជំនាញបាននិយាយថា ទង្វើបែបនេះមិនល្អនោះទេ ព្រោះវា អាចធ្វើឲ្យកូនចង់ចាំជាប់ក្នុងអារម្មណ៍ ហើយប៉ះពាល់ដល់ផ្លូវចិត្តថែមទៀត។
១.ធ្វើឲ្យកូនមានអារម្មណ៍ភ័យខ្លាចជានិច្ច
ក្នុងករណីដែលកូនរបស់មានអារម្មណ៍ភ័យខ្លាច វានឹងដកជាប់ក្នុងអារម្មណ៍ពួកគេជានិច្ច បើទោះបីជាមានវត្តមានអ្នកនៅជាមួយក៏ដោយ។ ប្រសិនបើអ្នកមិនកែទម្លាប់មួយនេះទេ ខួរក្បាលរបស់ពួកគេនឹងគិតតែរឿងមិនល្អ ហើយបាត់បង់ទំនុកចិត្តលើខ្លួនឯង។
២.មានបញ្ហាផ្លូវចិត្ត
ក្មេងងាយនឹងមានអារម្មណ៍ភ័យខ្លាចខ្លាំងណាស់ ជាពិសេសការបន្លាចដែលមានភាពរន្ធត់ខ្លាំង ពួកគេអាចចាំំមួយជីវិតតែម្តង។ ដូច្នេះពួកគេអាចមានបញ្ហាផ្លូវចិត្តកើតមានឡើងនៅពេលធំពេញវ័យ ហើយប្រសិនបើមានហេតុការណ៍នេះកើតឡើងម្តងទៀត ពួកគេអាចបាក់ស្បាតតែម្តង។
៣.ដុះគំនិតអវិជ្ជមាន
សូមចាំថា ក្មេងឆាប់ជឿលើអ្វីដែលឪពុកម្តាយ ឬអ្នកដទៃនិយាយបន្លាចខ្លាំងណាស់។ ប្រសិនបើអ្នកធ្វើទង្វើមួយនេះដាក់គេដដែលៗ វាអាចធ្វើឲ្យពួកគេកើតមានគំនិតអវិជ្ជមានចំពោះអ្នកដទៃ នៅពេលគេធំដឹងក្តីឡើង៕
