បន្ទាប់ពីសម្រាលកន្លងផុតទៅយ៉ាងល្អប្រសើរហើយនោះ បញ្ហាដែលអ្នកម្ដាយច្រើនតែកង្វល់ចិត្តនោះ គឺរឿងរូបរាង ជាពិសេសអ្នកម្ដាយណាដែលពូកែញ៉ាំក្នុងអំឡុងពេលតាំងគភ៌ផងនោះ គឺរឹតតែមានឱកាសក្នុងការកើតដុំខ្លាញ់នៅតាមផ្នែកផ្សេងៗរបស់រាងកាយ នៅសេសសល់ក្រោយពីការសម្រាល ដែលនាំឱ្យបាត់បង់ភាពទាក់ទាញ ហើយក៏មិនដឹងថា នឹងសម្រកទម្ងន់យ៉ាងម៉េចដែរ។ ញ៉ាំថ្នាំសម្រកទម្ងន់ តើល្អដែរទេ? តើញ៉ាំហើយនឹងហុចផលយ៉ាងណាខ្លះទៅ? ថ្ងៃនេះ យើងសូមបង្ហាញពីវធីសម្រកទម្ងន់ក្រោយពេលសម្រាល ដែលទទួលបានផលល្អបំផុត និងមិនមានសុវត្ថិភាពចំពោះអ្នកម្តាយ។
១.បំបៅដោះកូន
នេះជាវិធីដែលងាយ និងល្អបំផុតទាំងចំពោះខ្លួនអ្នកម្ដាយ និងកូនតូច។ ហេតុដែលការបំបៅដោះកូន អាចសម្រកទម្ងន់បាននោះ គឺដោយសារតែក្នុងដំណាក់កាលសាងទឹកដោះនឹងមានការទាញយកជាតិខ្លាញ់ក្នុងផ្នែកផ្សេងៗរបស់រាងកាយម្ដាយ មកប្រើធ្វើជាចំណែកផ្សំចម្បង ទើបធ្វើឱ្យទម្ងន់ខ្លួនរបស់ម្ដាយ អាចស្រកចុះបានយ៉ាងងាយ។ ចំណែកឯកូនតូចវិញ ក៏នឹងបានទទួលបានសារធាតុចិញ្ចឹមគ្រប់គ្រាន់ពីទឹកដោះ និងមានភាពស៊ាំរឹងមាំផងដែរ។
២.ហាត់ប្រាណ
គ្មានវិធីណាដែលនឹងជួយបញ្ចុះទម្ងន់បានល្អស្មើនឹងការហាត់ប្រាណទៀតទេ។ ទោះបីអ្នកម្តាយទើបតែសម្រាល និងរាងកាយនៅមិនទាន់ស្រួលបួលប៉ុន្មានក៏ដោយ ក៏អាចចាប់ផ្ដើមដោយការហាត់ប្រាណតិចៗ ស្រាលៗដូចជា ធ្វើការងារផ្ទះ ការដើរហាត់ប្រាណ និងហ្វឹកយ៉ូហ្គាជាដើម។
៣.ចៀសវាងអាហារដែលមានខ្លាញ់ និងអាហារដែលគ្មានប្រយោជន៍
អ្នកម្ដាយមួយចំនួន នៅពេលសម្រាលហើយក៏ប្រញាប់ទទួលទានអាហារច្រើនៗប្រភេទដែលខ្លួនចង់ញ៉ាំ ដោយមិនបានចាប់អារម្មណ៍ពីបរិមាណជាតិខ្លាញ់ និងកាឡូរីដែលខ្លួនបានទទួលបានឡើយ ទើបមិនមែនជារឿងប្លែកឡើយដែលទម្ងន់របស់អ្នកម្តាយមិនព្រមស្រកចុះ។
អ្នកម្ដាយថ្មោងថ្មី ដែលកំពុងស្វែងរកវិធីសម្រកទម្ងន់ ក្រោយពេលសម្រាល ក៏អាចនាំយកវិធីផ្សេងៗដែល បានបង្ហាញពីខាងលើ។ ប៉ុន្តែហាមទិញថ្នាំសម្រកទម្ងន់មកទទួលទានដោយខ្លួនឯងដាច់ខាត ព្រោះអាចហុចផលឱ្យកើតមានគ្រោះថ្នាក់ធ្ងន់ធ្ងរ ទាំងខ្លួនឯង និងកូនតូចបាន។
ហេតុអ្វីក្រោយពេលសម្រាល អ្នកម្តាយមិនគួរលេបថ្នាំសម្រកទម្ងន់?
អ្នកម្ដាយថ្មោងថ្មី ប្រហែលជាមានអារម្មណ៍មិនចូលចិត្តរូបរាងរបស់ខ្លួន ក្រោយពេលសម្រាលប៉ុន្មានទេ។ អ្នកខ្លះក៏ខ្លាចថា ប្ដីនឹងលែងស្រឡាញ់ ហើយលួចទៅមានស្រីថ្មី ទើបបណ្តោលចិត្តឲ្យទៅទិញថ្នាំសម្រកទម្ងន់មកទទួលទាន ដើម្បីឱ្យមានរូបរាងស្វែលស្អាត ដូចកាលពីមុនពេលមានគភ៌ជាថ្មីម្ដងទៀត។ តែពេលញ៉ាំចូលទៅហើយ ភាគច្រើននឹងមានអារម្មណ៍ថា ញ័រដើមទ្រូង វិលមុខ គេងមិនលក់ អ្នកខ្លះអាចដល់ថ្នាក់គាំងបាត់ស្មារតីតែម្ដងក៏មាន។
បើសិនមានការបំបៅដោះកូនផងនោះ ក៏មានឱកាសដែលឥទ្ធិពលថ្នាំប្រភេទខ្លះនឹងទៅប៉ះពាល់ដល់ទារកដូចគ្នា និងអាចហុចផលឱ្យកើតមានភាពខុសប្រក្រតីនៅលើកូនតូចបានទៀតផង។ ដូច្នេះទើបមិនគួរទិញថ្នាំសម្រកទម្ងន់មកទទួលទានដោយខ្លួនឯងជាដាច់ខាត មិនថាមានសេចក្ដីត្រូវការក្នុងការសម្រកទម្ងន់ក្រោយពេលសម្រាលខ្លាំងប៉ុនណាក៏ដោយ៕
