ប៉ុន្មានឆ្នាំមុន មានផ្ទុះជំងឺពងបែកដៃ-ជើង-មាត់ជាពិសេសនៅប្រទេសចិន និងហុងកុង គេក៏ឃើញមានកើតឡើងនៅស្រុកខ្មែរយើងដែរ។ ទោះបីជាគ្មានការផ្ទុះជំងឺទៀតក៏ដោយក៏សង្កេតឃើញក្មេងកើតជំងឺនេះ ជាពិសេសនៅរដូវក្តៅ។ ជំងឺពងបែកដៃ-ជើង-មាត់ បង្ករដោយពួកវីរុស( EV71 or Coxakivirus A16)ដែលភាគច្រើនបាត់ទៅវិញក្នុងរយះពេលមួយសប្តាហ៍ បើមិនមានផលវិបាកអ្វីកើតឡើងនោះទេ។ វាភាគច្រើនកើតលើកូនក្មេង និងមានករណីមួយចំនួនតូចកើតលើមនុស្សចាស់ផងដែរ។
តើជំងឺពងបែកដៃ-ជើង-មាត់មានលក្ខណះកត់សំគាល់អ្វីខ្លះ?
ជំងឺពងបែកដៃ-ជើង-មាត់ គឺកើតឡើងនូវពងបែក និងកន្ទួលក្រហមនៅ លើបាតជើង ជើង បាតដៃ និងក្នុងមាត់។ បើទោះជាពាក្យថា ពងបែកដៃ-ជើង-មាត់ វាក៏អាចកើតឡើងនៅគូដ និងពេលខ្លះនៅជុំវិញប្រដាប់ភេទ។ ពងបែកដែលចេញនៅមាន ធ្វើអោយក្មេងថយចុះការបៅ ឬមិនចង់ញុំាបាយចំនី ពីព្រោះក្មេងឈឺមាត់ដោយសារពងបែកទាំងនេះ។ ជំងឺពងបែកដៃ-ជើង-មាត់ក៏ធ្វើអោយក្មេងក្តៅខ្លួនផងដែរ។
តើជំងឺពងបែកដៃ-ជើង-មាត់ ឆ្លងដោយវិធីណា?
វីរុសជំងឺពងបែកដៃ-ជើង-មាត់ឆ្លលងចូលទៅក្នុងទឹកមាត់ ទឹកសំបោរ កំហាក នៅក្នុងពងទឹកដែលចេញលើដៃជើងនិងមាត់ ហើយយនិងនៅក្នុងលាមក។ ដូចនេះ ការឆ្លងគឺដោយសារការប៉ះពាល់ផ្ទាល់និងពពួកទឹកដែលបានរៀបរាបខាងលើ។ ការឆ្លងខ្លាំងកើតនៅរយះពេលមួយសប្តាហ៍ដំបូងនៃជំងឺ។
តើជំងឺពងបែកដៃ-ជើង-មាត់ ធ្វើរោគវិនិច្ឆយ័ដូចម្តេច?
គ្មានការបូមឈាមទៅមើលដើម្បីរកមេរោគទេ។ គ្រូពេទ្យអាចមើលលក្ខណះ របស់ពងបែកដៃ-ជើង-មាត់ និងអាចធ្វើរោគវិនិច្ឆ័យបាន។
តើការព្យាបាលជំងឺពងបែកដៃ-ជើង-មាត់ដោយរបៀបណា?
មិនមានថ្នាំសំលាប់មេរោគប្រភេទនេះទេ ហើយថ្នាំផ្សះក៏មិនមានប្រសិទ្ធិភាពដែរ ព្រោះជំងឺពងបែកដៃ-ជើង-មាត់បង្ករដោយពួកវីរុស ដែលពួកនេះអាចនឹងងាប់ខ្លួនឯង ៣ទៅ៤ថ្ងែ ហើយនឹងជាក្នុងរយះមួយអាទិត្យ។ ថ្នាំបាត់ឈឺចាប់និងបញ្ចុះកំដៅដូចជាប៉ារ៉ាសេតាមុល និងអាយបុយព្រហ្វែ ( paracetamol or ibuprofen) អាចត្រូវបានប្រើ។
លើកទឹកកចិត្តក្មេងអោយញុំា និងផឹក តែបើករណីក្មេងពិបាកញុំា និងបៅដោយសារឈឺមាត់ ក្មេងអាចនឹងត្រូវដេកពេទ្យ ដើម្បីការតាមដាន។ បើមានបញ្ហាបារម្មណ៍ អាចយកកូនទៅពិភាក្សាជាមួយពេទ្យបាន៕
រៀបរាងដេាយ DrPromVireak(012 621 619)
ប្រភព៖បន្ទប់ពិគ្រោះជំងឺកុមារសៀមរាប
