អ្នកស្រាវជ្រាវសហរដ្ឋអាមេរិក បានរកឃើញថា អ្នកដែលធ្វើលំហាត់ប្រាណជាប្រចាំមានហានិភ័យទាបក្នុងការវិវត្តទៅរកជំងឺមហារីក ១៣ប្រភេទ។ លើសពីនេះ ការធ្វើទៀងទាត់ ក៏អាចជួយលើកកម្ពស់ដល់សុខភាពផ្លូវកាយ និងផ្លូវចិត្តផងដែរ។
អ្នកវិទ្យាសាស្ត្របានវិភាគទិន្នន័យពីជនជាតិអាមេរិក និងជនជាតិអឺរ៉ុប ចំនួន១,៤លាននាក់ មានអាយុចាប់ពី ១៩ដល់៩៨ឆ្នាំ ចំនួន១២លើក ចាប់ពីឆ្នាំ ១៩៨៧ ដល់ ២០០៤ បានរកឃើញថា មានជំងឺមហារីក ១៣ប្រភេទក្នុងចំណោម ២៦ប្រភេទ បានធ្លាក់ចុះយ៉ាងហោចណាស់ ១០ទៅ ៤២ភាគរយ។ អ្នកស្រាវជ្រាវបានរកឃើញប្រសិទ្ធភាពខ្ពស់នៃលំហាត់ប្រាណដែលអាចកាត់បន្ថយជំងឺកាចសាហាវនេះបាន គឺការដើរ និងរត់។
ការធ្វើលំហាត់ប្រាណបែបនេះបានទៀងទាត់ អាចកាត់បន្ថយហានិភ័យនៃជំងឺមហារីកដូចជា៖
- ជំងឺមហារីកបំពង់អាហារ ៤២ភាគរយ
- ជំងឺមហារីកថ្លើម ២៧ភាគរយ
- ជំងឺមហារីកសួត ២៦ភាគរយ
- ជំងឺមហារីកតម្រងនោម ២៣ភាគរយ
- ជំងឺមហារីកក្រពះ ២២ភាគរយ
- ជំងឺមហារីកស្បូន ២១ភាគរយ
- ជំងឺមហារីកឈាម ២០ភាគរយ
- ជំងឺមហារីកខួរឆ្អឹង ១៧ភាគរយ
- ជំងឺមហារីកពោះវៀនធំ ១៦ភាគរយ
- ជំងឺមហារីកក្បាល និងក ១៥ភាគរយ
- ជំងឺមហារីកប្លោកនោម ១៣ភាគរយ
- មហារីកសុដន់ ១០ភាគរយ
មិនតែប៉ុណ្ណោះ ក្រុមអ្នកស្រាវជ្រាវក៏បានរកឃើញដែរថា ការធ្វើលំហាត់ប្រាណរាល់ថ្ងៃ អាចជួយពង្រីកអាយុបុរសជាមធ្យម ៧ឆ្នាំ។ លទ្ធផលនៃការស្រាវជ្រាវនេះបានសង្កត់ធ្ងន់ថា ការធ្វើលំហាត់ប្រាណទៀងទាត់ អាចជួយឲ្យរាងកាយមានសុខភាពល្អប្រសើរជាងមុន៕
