តាមការសិក្សាថ្មីមួយ ដែលធ្វើឡើងដោយអ្នកវិទ្យាសាស្ត្រនៅសាកលវិទ្យាល័យ Oxford University បានរកឃើញថា ស្ត្រីដែលមានគូថធំប្រឈមនឹងជំងឺរ៉ាំរ៉ៃតិច ហើយមានកូនឆ្លាតជាងមនុស្សស្រីដែលមានគូថតូច ឬមធ្យម។
ការស្រាវជ្រាវបានរកឃើញទៀតថា ស្ត្រីគូថធំមានកម្រិតកូឡេស្តេរ៉ុលក្នុងរាងកាយទាប ដោយសារតែអ័រម៉ូនរបស់ពួកគេជួយជំរុញដល់ដំណើរការរំលាយជាតិស្ករបានយ៉ាងលឿន។ មិនតែប៉ុណ្ណោះ ពួកគេមានហានិភ័យនៃជំងឺទឹកនោមផ្អែម ឬបញ្ហាសរសៃឈាមបេះដូង តិចតួចបំផុត បើធៀបទៅនឹងមនុស្សស្រីដែលមានគូថតូច។ នេះក៏ដោយសារតែនៅក្នុងរាងកាយពួកគេមានផ្ទុកអាស៊ីតខ្លាញ់អូមេហ្គា៣ ច្រើន ទើបអំណោយផលយ៉ាងប្រសើរដល់មុខងារខួរក្បាល។
អ្នកដឹងនាំការសិក្សាលោកសាស្ត្រាចារ្យ Konstantinos Manolopoulos បានថ្លែងថា ស្ត្រីដែលមានជាលិកាខ្លាញ់ក្នុងគូថច្រើន ជាតិស្ករ និងជាតិខ្លាញ់ក្នុងរាងកាយមានកម្រិតទាប។
ការសន្និដ្ឋាននេះពឹងផ្អែកទៅលើការវិភាគស្ត្រីជាង ១៦.០០០នាក់ ហើយប្រសិនបើគូថរបស់ពួកគេកាន់តែធំ កម្រិតអ័រម៉ូន Leptin នៅក្នុងរាងកាយនឹងធម្មតា។ អ័រម៉ូននេះហើយ គឺជាអ្នកទទួលខុសត្រូវចំពោះបញ្ហាឡើងទម្ងន់ ព្រមទាំងមានមុខងារប្រឆាំងនឹងជំងឺទឹកនោមផ្អែម ការរលាក និងការពារសរសៃឈាម។
មួយវិញទៀត អ្នកស្រាវជ្រាវបានបន្ថែមថា មនុស្សស្រីដែលមានចង្កេះតូច ត្រគាកធំ គូថធំ អាចមានអាយុវែង៕
