អរម៉ូនទីរ៉ូអ៊ីតត្រូវបានបញ្ចេញពីក្រពេញទីរ៉ូអ៊ីត ដែលមានរាងដូចមេអំបៅ ស្ថិតនៅផ្នែកខាងមុខនៃដើមក ដើម្បីទ្រទ្រង់ជីវិតមនុស្ស។ ការកើនឡើងលើសពីប្រក្រតីនៃអរម៉ូននេះ បង្កឲ្យមានវិបត្តិសុខភាពធ្ងន់ធ្ងរ។ ការកើនឡើងលើសប្រក្រតីនៃអរម៉ូនទីរ៉ូអ៊ីតលើស្ត្រីមានផ្ទៃពោះ មានអត្រារហូតដល់ ០,២%នៃស្ត្រីមានផ្ទៃពោះ ហើយវាអាចបង្កគ្រោះថ្នាក់ធ្ងន់ធ្ងរដល់ម្តាយ និងទារកក្នុងផ្ទៃបើពុំបានទទួលការព្យាបាលឲ្យបានត្រឹមត្រូវ និងទាន់ពេលវេលាទេនោះ។
ក) រោគសញ្ញា៖
– ការស្រកទម្ងន់ ឬមិនឡើងទម្ងន់ក្នុងកំឡុងពេលមានផ្ទៃពោះ ជាសញ្ញាមួយដែលធ្វើឲ្យយើងគិតដល់ជំងឺនេះ
– ការក្អួតខ្លាំង (ចាញ់កូនខ្លាំង)
– អស់កំលាំង
– បេះដូងដើរញាប់
– ហត់
– ឆាប់ខឹង ឆាប់មួម៉ៅ
ខ) មូលហេតុ៖
– ជំងឺ Basedow ជាមូលហេតុដែលជួបប្រទះញឹកញាប់ជាងគេ វាកើតឡើងដោយសារការបញ្ចេញអង់ទីករ ភ្ញោចទៅលើក្រពេញទីរ៉ូអ៊ីត (Anticorps Anti-Récepteur de la TSH)
– ការកើនឡើងអ័រម៉ូនទីរ៉ូអ៊ីតក្នុងរយៈពេលខ្លី កើតឡើងដោយការភ្ញោចអ័រម៉ូនរបស់គ៌ភ (β-HCG) ទៅលើក្រពេញទីរ៉ូអ៊ីត ហើយវាត្រលប់ទៅរកភាពប្រក្រតីវិញនៅទ្រីមាសទី២ និងទី៣
– ដុំពកកច្រើន (Goitre multinodulaire toxique)
– ដុំពកក (Adénome toxique)
– ការរលាកក្រពេញទីរ៉ូអ៊ីតផ្សេងៗទៀត (Thyroïdites)
គ) ផលវិបាក៖
– ផលវិបាកលើម្តាយៈ
- រលូតកូន (Fausses couches spontanées)
- កូនកើតមិនគ្រប់ខែ (Prématurité)
- ការឡើងសំពាធឈាមពេលមានផ្ទៃពោះ (HTA gravidique)
- ក្រលាភ្លើង (Pré-éclampsie)
- ខ្សោយបេះដូង (Insuffisance cardiaque)
– ផលវិបាកលើទារកក្នុងផ្ទៃៈ
- រូបរាងមិនប្រក្រតី (Malformation congénitale)
- ការលូតលាស់យឺតយ៉ាវ (Retard de Croissance)
- កូនស្លាប់ក្នុងផ្ទៃ (Mort in utéro)
- ការលើសអរម៉ូនទីរ៉ូអ៊ីតលើកូន (Hyperthyroïdie foetale)
ឃ) រោគវិនិច្ឆ័យ៖
ការធ្វើរោគវិនិច្ឆ័យជំងឺនេះ គឺផ្អែកលើការពិនិត្យឈាមមើលកំរិតអរម៉ូនក្នុងឈាម
– ការកើនឡើងនៃ T4 libre
– ការថយចុះនៃ TSH
– ការស្វែងរកមូលហេតុតាមរយៈការធ្វើអេកូសាស្ត្រលើក្រពេញទីរ៉ូអ៊ីត និងការពិនិត្យឈាមរកអង់ទីករ ដែលភ្ញោចទៅលើក្រពេញទីរ៉ូអ៊ីត (TRAK)
ង) ការព្យាបាល ៖
ចំពោះការព្យាបាល ត្រូវបានធ្វើឡើងដោយប្រើថ្នាំ ដើម្បីបន្ថយអរម៉ូនទីរ៉ូអ៊ីត ទៅតាមកម្រិតរបស់វា។
ច) ដំបូន្មាន៖
– ស្ត្រីមានផ្ទៃពោះគ្រប់រូបគួរតែតេស្តឈាមមើលកំរិតអរម៉ូនទីរ៉ូអ៊ីតឲ្យបានឆាប់រហ័ស និងទាន់ពេលវេលា
– ស្ត្រីដែលត្រូវបានធ្វើរោគវិនិច្ឆ័យថា មានលើសអ័រម៉ូនទីរ៉ូអ៊ីត ត្រូវប្រញាប់មកពិគ្រោះ និងព្យាបាលជំងឺជាមួយគ្រូពេទ្យឯកទេសផ្នែកជំងឺក្រពេញឲ្យបានឆាប់ជាទីបំផុត និង គោរពតាមដំបូន្មានគ្រូពេទ្យជំនាញឲ្យបានខ្ជាប់ខ្ចួន ដើម្បីសុវត្តិភាពម្តាយ និងកូន។
ប្រភព៖Calmette Hospital
