ចម្ងល់៖ តើស្ត្រីចាប់ផ្ដើមតាំងគភ៌ គួរតែបន្តធ្វើការងារ ឬឈប់សម្រាក?

0

ក្នុង​យុគសម័យ​បច្ចុប្បន្ន ស្ត្រី​យើង​ទោះជា​រៀបការ​ហើយក៏​ដោយ ក៏​នៅតែ​ត្រូវ​ចេញទៅ​ធ្វើការ​ក្រៅ​ផ្ទះ​ដើម្បី​ជួយ​សម្រាល​បន្ទុក​ការចាយវាយ​ក្នុង​គ្រួសារ​ដែរ តែ​នៅពេលណា​ដែល​ស្ត្រី​យើង​ចាប់ផ្ដើម​គិត​ចង់បាន​បុត្រ ឬ​ដឹងខ្លួន​ថា ចាប់ផ្ដើម​មានគភ៌​ហើយ​នោះ ក្ដីកង្វល់​ដែល​តែងតែ​កើតមាន​នោះ​គឺថា តើ​ការចេញ​ទៅធ្វើ​ការងារ​ក្នុងខណៈដែល​ខ្លួនឯង​តាំង​គភ៌​នោះ នឹងមាន​ផលប៉ះពាល់​ដល់​ទារក​ក្នុង​គភ៌​ដែរឬទេ? ថ្ងៃនេះ Baby and Mom មាន​ចម្លើយ​មក​ជម្រាបជូនដូចខាងក្រោមនេះ។

 

នៅក្នុង​ផ្នែក​វេជ្ជសាស្ត្រ​នៅ​មិនទាន់មាន​ការបញ្ជាក់​យ៉ាងច្បាស់​លាស់​ថា ហាម​ស្ត្រី​ដែល​កំពុង​មានគភ៌​ធ្វើការ​អ្វី​នោះឡើយ មាន​​ត្រឹមតែ​ពាក្យ​ណែនាំ​ថា មិនគួរ​លើក​របស់ធ្ងន់ៗ និង​មិនគួរ​មាន​សភាវ​តានតឹង​ធុញថប់​ក្នុង​អារម្មណ៍​ឡើយ ព្រោះ​នៅពេល​រាងកាយរបស់​ស្ត្រី​មានគភ៌​តានតឹង​ធុញថប់(អាច​បណ្ដាលមកពី​រឿង​ការងារ ឬ​មួម៉ៅ​ធុញថប់​ដោយសារតែ​រឿង​ធ្វើដំណើរ​តាម
ផ្លូវ​ដែល​កកស្ទះ​ខ្លាំង​)រាងកាយ​នឹង​បញ្ចេញ​សារធាតុ​ម្យ៉ាង​ចេញមក ដែល​បើសិនជា​ការតាំង​គភ៌​ក្នុង​រយៈពេល3ខែ​ដំបូង​ផង​នោះ អាច​នឹងមាន​ឱកាស​រ​លូត​បុត្រ​បាន។

ក្រៅពីនោះ តាម​ធម្មជាតិ​វិញ ក្នុងអំឡុង3ខែ​ដំបូង​នៃ​ការតាំង​គភ៌ ស្ត្រី​មានគភ៌​នឹងមាន​អារម្មណ៍​ថា​ទន់​ល្វើយ​អស់កម្លាំង ដោយសារតែ​ជា​អំឡុង​ពេលដែល​ទារក​ក្នុង​គភ៌​កំពុង​វិ​វ​ឌ្ឍ និង​ធំធាត់​ឡើង ដែលជា​រឿង​ប្រក្រតី ដូច្នេះ​ទើប​ការ​សម្រាក​របស់​ស្ត្រី​មានគភ៌​ត្រូវមាន​ច្រើនជាង​មនុស្ស​ប្រក្រតី។ បើ​រាងកាយ​នឿយ​ល្វើយ​ហើយនៅ​ត្រូវ​ទៅធ្វើ​ការ ហើយ​ត្រូវ​ជួបនឹង​សភាវ​ធុញថប់​តានតឹងផ្សេងៗទៀត
ផង​នោះ ក៏​នឹង​រឹតតែ​ធ្វើឱ្យ​រាងកាយ​លែង​បាន​សម្រាក និង​អស់កម្លាំង​ខ្លាំង​លើស​ដើម​ទៅទៀត។

 

 

ដូច្នេះ​អ្នក​ដែល​ឆ្លើយតប​នឹង​សំណួរ​ខាងលើ​បានល្អ​បំផុត​នោះ​គឺ ស្ត្រី​មានគភ៌​ខ្លួនឯង​ដែល​គួរតែ​គិតថា ការងារ​ដែល​ទៅធ្វើ​នោះ បើ​ធ្វើ​ហើយ​មាន​សេចក្ដីសុខ ក៏​អាចធ្វើ​តទៅទៀតបាន ព្រោះ​បើ​រាងកាយ​មាន​សេចក្ដីសុខ ក៏​នឹងមាន​ផល​ល្អ​ដល់​ទារក​ក្នុង​គភ៌​ដែរ តែបើ​ដឹងខ្លួន​ថា ធ្វើ​ហើយ​គ្មាន​សេចក្ដីសុខ ត្រូវ​មួម៉ៅ​ធុញថប់ ក៏​គួរតែ​សម្រាក​បន្តិច​ទៅ ហើយក៏​គួរតែ​ជ្រើស​រើសយក​កូន​ជា​រឿង​សំខាន់​ជាង​វិញ​ប្រសើរ​ជាង។

ក្រៅពីនេះ​នៅមាន​រឿង​ដែល​គួរ​ប្រយ័ត្នប្រយែង​នៅក្នុង​កន្លែងធ្វើការ រួមទាំង​ការធ្វើដំណើរ​ក្នុងខណៈ​តាំង​គភ៌​ដូចតទៅ ៖

 

1. ស្ត្រី​ដែល​កំពុង​តាំង​គភ៌ គួរ​ចៀសវាង​ការធ្វើការងារ​ណា​ដែល​ពាក់ព័ន្ធ​ជាមួយ​ម៉ាស៊ីន X-Ray យ៉ាង​ដាច់ខាត ព្រោះ​ទារក​នៅក្នុង​គភ៌​នឹងមាន​ឱកាស​ពិការ ឬ​កើត​មហារីក​ក្នុង​គ្រាប់​ឈាមស​ដែល​បណ្ដា​លមកពី​កាំរស្មី​បាន។

2. បើ​លក្ខណៈ​ការធ្វើការងារ​ត្រូវ​ឈរ ឬ​អង្គុយក្នុង​រយៈពេលយូរៗ ក៏​គួរតែ​ផ្លាស់ប្ដូរ​ឥរិយាបថ​រៀងរាល់1ម៉ោង​ម្ដង ជាពិសេស​នៅពេល​ចាប់ផ្ដើម​តាំង​គភ៌​ក្នុងអំឡុងពេល6ខែ​តទៅ ដូចជា ​អាច​ប្រើ​ការដើរ​ទៅមក ឆ្លាស់គ្នា​នឹង​ការ​អង្គុយ​សម្រាក​ជាដើម។

3. ការចង់​កម្រើកខ្លួន ឬ​ប្ដូរ​ឥរិយាបថ ត្រូវ​ប្រយ័ត្ន​ខ្លួន​ជាពិសេស ព្រោះ​អាច​កើតការ​ពង្រឹង​ខ្លួន​របស់​ស្បូន​បាន បើសិនជា​ផ្លាស់ប្ដូរ​ឥរិយាបថ​លឿន​រហ័ស​ជ្រុល​ពេក។

4. សម្រាប់​ការធ្វើដំណើរ​ទៅធ្វើ​ការ ឡា​រ៉ែ​ន​ មិន​ណែនាំ​ឱ្យ​ជិះ​ម៉ូតូ​ទេ ទោះជា​តាំង​គភ៌​ប៉ុន្មាន​ខែ​ក៏ដោយ។

 

 

5. បើ​មិនចាំបាច់ មិនគួរ​ធ្វើដំណើរ​ទៅណាឆ្ងាយៗឡើយ ព្រោះ​ការ​ជិះឡានយូរដោយ​មិន​ផ្លាស់ប្ដូរ​ឥរិយាបថ នឹងធ្វើ​ឱ្យ​ឈឺ​ខ្នង ស្ពឹក​តាម​ដៃ-ជើង ព្រោះ​ប្រព័ន្ធ​ឈាម​រត់​អាច​នឹងធ្វើ​ការមិន​បាន​ល្អ​ដូច​ពេល​រាងកាយ​ប្រក្រតីនោះទេ។

6. គួរ​តម​ការបើកបរ​រថយន្ត​ដោយ​ខ្លួនឯង ព្រោះ​ការបើកបរ​រថយន្ត ក្រៅតែពី​ធ្វើឱ្យមាន​អារម្មណ៍​តានតឹង​ធុញថប់​ហើយ នៅមាន​ផល​ដល់​ការពង្រឹង​ខ្លួន​របស់​ស្បូន​ទៀតផង។

7. ហាម​ទប់​បត់ជើងតូច​ជាដាច់ខាត ព្រោះ​ការ​ទប់​មិន​ព្រមទៅ​បត់ជើងតូច​នឹងធ្វើ​ឱ្យរ​លាក​ប្លោកនោម។ ការ​ទៅធ្វើ​ការ​ក្រៅ​ផ្ទះ ពេលខ្លះ​អាច​នឹង​មិនសូវ​ងាយស្រួល​ក្នុង​ការចូល​បន្ទប់ទឹក ទើប​ស្ត្រី​ជាច្រើន​ជ្រើស​រើសយក​ការ​ទ្រាំ ដូច្នេះ​ស្ត្រី​មានគភ៌​ត្រូវ​រៀបចំ​ផែនការ​រឿង​ការ​បន្ទោបង់​នេះ​ឱ្យ​បានល្អ៕

 

 

ពេល​មាន​ផ្ទៃពោះ ​ហើយ​ត្រូវ​ឈរ​ធ្វើការយូរៗ អាចធ្វើឱ្យស្ត្រីពពោះ……

 

 

មនុស្ស​ជាច្រើន​ប្រហែលជា​ធ្លាប់​បានឮ​រួចមកហើយ​ថា ពេល​មានគភ៌ ​មិនគួរ​ឈរ​យូរពេក​ទេ ព្រោះ​អាច​កើត​សភាវ​ហើមជើង ឈឺ​ខ្នង ឬ​វៀច​សរសៃឈាម​បាន​ងាយ​ជាង​ប្រក្រតី តែ​ស្ត្រី​មានគភ៌​ខ្លះ​ក៏​អាច​ធ្វើការ​បែប​ឈរ​បាន​រហូត​ពេញ​មួយថ្ងៃ​ដោយ​មិនមាន​កើត​អ្វី​ធ្ងន់ធ្ងរ​ឡើយ។ ភាគច្រើន​បញ្ហា​ដែល​ពាក់ព័ន្ធ​នឹង​ការ​ឈរ​ធ្វើការ​រហូត​ធ្វើឱ្យ​កើត​សភាវ​ទាំងនោះ នឹង​កើតឡើង​ចំពោះ​ស្ត្រី​មានគភ៌​ក្នុងអំឡុង​ត្រីមាស​ចុងក្រោយ ព្រោះ​ត្រូវ​ទទួល​ទ្រ​ទម្ងន់​ដែល​កាន់តែ​ច្រើនឡើង និង​ក្បាលពោះ​ក៏​ធំ​ឡើង អាចធ្វើឱ្យ​កើត​អា​ការឈឺ​ខ្នង​ខ្លាំង​បំផុត។

ស្ត្រី​មាន​ផ្ទៃពោះ​ដែល​ត្រូវ​ឈរ​ធ្វើការយូរៗ គួរ​ធ្វើយ៉ាងណា?

បើ​ស្ត្រី​មាន​ផ្ទៃពោះ​ចៀសវាង​ការធ្វើ​ការដែល​ត្រូវ​ឈរ​រហូត​មិនបាន​មែនទែន​នោះ ស្ត្រី​មានគភ៌​គួរតែ​រក​ពេល​អង្គុយ ឬ​ដើរ ដើម្បី​បន្ធូរបន្ថយ​សាច់ដុំ​ឱ្យបាន​ញឹកញាប់​បំផុត ព្រោះ​នៅពេល​ឈរ​ធ្វើការ​ច្រើន ទឹក​ក្នុង​រាងកាយ​ដែលមាន​ច្រើនជាង​ប្រក្រតី​ក្នុងអំឡុងពេល​តាំង​គភ៌ នឹង​ហូរ​ចុះ​តាម​កម្លាំង​ទំនាញផែនដី​មករក​ជើង និង​បាតជើង​ច្រើនជាង​ផ្នែក​ដទៃ រហូត​ធ្វើឱ្យ​ម្តុំ​បរិវេណ​នោះ​ត្រូវ​ច្របាច់​ណែន​ដោយ​ឈាម និង​ទឹក ធ្វើឱ្យ​កើត​អាការ​ហើម​នៅលើ​ជើង និង​បាតជើង​ខ្លាំងជាងគេ​បំផុត​លើ​រាងកាយ។

 

 

ការប្តូរ​ផ្លាស់​ស្បែកជើង​ក៏​ជា​រឿង​សំខាន់​ដែរ គួរ​ផ្លាស់ប្តូរ​ស្បែកជើង​ឱ្យ​សមល្មម​នឹង​ជើង​ដែល​រីកធំឡើង​តាម​អំឡុង​អាយុ​គភ៌ ព្រោះ​វា​នឹង​ជួយ​កាត់បន្ថយ​អាការ​ហើម​បាន។

នៅពេល​សម្រាក​ពី​ការងារ ស្ត្រី​មានគភ៌​អាច​កាត់បន្ថយ​អាការ​ហើមជើង​បាន ​ដោយ​ការ​អង្គុយ​ត្រាំ​ជើង​នឹង​ទឹក​ក្តៅឧណ្ហៗ និង​គេង​ដាក់​ជើង​ឱ្យ​ខ្ពស់ជាង​កម្ពស់​ដងខ្លួន ហើយ​ត្រូវ​តម​អាហារ​ដែលមាន​រសជាតិ​ប្រៃ តែបើ​ស្ត្រី​មានគភ៌​សង្កេតឃើញថា មាន​អាការ​ហើមជើង​ខ្លាំង​ខុស​ប្រក្រតី គួរ​ប្រញាប់​ទៅ​ប្រឹក្សា​ជាមួយ​លោកគ្រូ​ពេទ្យ​ជាបន្ទាន់ ព្រោះ​អាច​នឹងមាន​អាការ​ជ្រៀតជ្រែក​ពីស​ភាវ​ដទៃ​បាន ដូចជា​សភាវ​លើសឈាម​ជាដើម៕