ក្នុងពេលមានគភ៌ ស្ត្រីត្រូវឆ្លងកាត់ឧបសគ្គគ្រប់បែបយ៉ាងទំរាំតែដល់ថ្ងៃកើត ក៏ប៉ុន្តែក្នុងដំណាក់ការពពោះនេះ ស្ត្រីមិនត្រូវលាក់រឿងទុកលំបាកក្នុងចិត្តតែម្នាក់ឯងនោះទេ ព្រោះវាអាចប៉ះពាល់ដល់សុខភាព និងកូនក្នុងផ្ទៃទៀងផង។ ដូច្នេះមានរឿងមួយចំនួន ដែលស្ត្រីមានគភ៌គ្រប់រូប គួរតែប្រាប់ដល់ស្វាមី ឲ្យបានដឹងផង។
អារម្មណ៍ភ័យខ្លាច
នៅពេលដែលថ្ងៃសម្រាលកាន់តែខិតចូលមកដល់ ស្ត្រីមានផ្ទៃពោះកាន់តែមានអារម្មណ៍ភ័យខ្លាច ព្រោះដឹងថាខ្លួនត្រូវឆ្លងកាត់ការឈឺចាប់ និងរឿងបុកពោះជាច្រើនទៀត។ ប៉ុន្តែប្រសិនបើអ្នកប្រាប់ស្វាមីឲ្យបានដឹង ពួកគេនឹងជួយលើកទឹកចិត្តឲ្យមានស្មារតីរឹងមាំឡើងវិញ ព្រមទាំងមិនហ៊ានធ្វើអ្វីឲ្យទើសចិត្តឡើយ។
ការប្រែប្រួលនៃអ័រម៉ូនក្នុងរាងកាយ
ធ្លាប់ឮទេ នៅពេលមានផ្ទៃពោះស្ត្រីមានអារម្មណ៍ខុសប្លែកពីមុន ជាពិសេសឆាប់ខឹងឆេឆាវ? នេះក៏ដោយសារតែការប្រែប្រួលនៃកម្រិតអ័រម៉ូនក្នុងរាងកាយ។ នេះក៏ជាចំណុចមួយដែល ស្ត្រីមានគភ៌ចង់ឲ្យស្វាមីបានដឹងដែរ ដើម្បីចាំជួយលួងលោងនាង នៅពេលមានអារម្មណ៍មិនល្អ។
អារម្មណ៍មិនស្រួលក្នុងខ្លួន
ការមានគភ៌ ៩ខែ ១០ថ្ងៃ មិនមែនជារឿងងាយធម្មតាឡើង សម្រាប់ស្ត្រីគ្រប់រូប។ ដូច្នេះហើយ ពួកគេចង់ឲ្យស្វាមី របស់ខ្លួនបានដឹង នៅពេលដែលមានអាការមិនស្រួលដូចជា ការចាញ់កូន គ្មានកម្លាំងកំហែង ការឈឺចាប់ឆ្អឹងខ្នង រមួលក្រពើ និងការហូរទឹករំអិលជាដើម។
ការចេះយល់ចិត្តប្រពន្ធ និងជួយផ្តល់កម្លាំងចិត្ត អំឡុងពេលតាំងគភ៌ពិតជាមានសារៈសំខាន់ខ្លាំងណាស់ ហេតុនេះស្វាមីគ្រប់រូបគួរតែធ្វើឲ្យបាន៕
ស្វាមីទាំងឡាយ ហាមនិយាយពាក្យទាំងនេះដាច់ខាតនៅពេលភរិយាកំពុងពពោះ
ពាក្យសម្តីត្រឹមតែពីរបីម៉ាត់ដែលលោកប្តីនិយាយទៅកាន់ភរិយាដែលកំពុងមានផ្ទៃពោះ ទោះជាតាំងចិត្ត ឬមិនបានតាំងចិត្តក៏ដោយ ពាក្យសម្តីខ្លះអាចធ្វើឱ្យភរិយាតូចចិត្ត និងនាំឱ្យភរិយាពិបាកចិត្តបាន ដូច្នេះពាក្យដែលលោកប្តីមិនគួរនិយាយសោះពេលភរិយាកំពុងពពោះនោះគឺ ៈ
1 . បងមិនយល់សោះ មិនដឹងថាអូនឯងមានអារម្មណ៍នឿយហត់អីក៏ច្រើនសម្បើមម្ល៉េះ!
ការពិតទៅលោកប្តីជាច្រើននាក់ប្រហែលជាមិនយល់ ឬមិនដឹងមែនហ្នឹងឯងថា គ្រាន់តែមានផ្ទៃពោះសោះ ហេតុអីបានភរិយាមានអារម្មណ៍នឿយហត់អីក៏ខ្លាំងម្ល៉េះ? តែពេលនេះសូមជ្រាបទៅថា ដោយសារតែអ័រម៉ូនដែលរាងកាយបញ្ចេញមកដែលធ្វើឱ្យស្ត្រីមានផ្ទៃពោះមានអារម្មណ៍ថា ហត់នឿយ ចង់តែគេងសម្រាកនោះ វាបុកមកតែលើភរិយាតែម្នាក់ឯង វាជារឿងដែលពិបាកអធិប្បាយពន្យល់ឱ្យអ្នកណាដឹងបានណាស់ ដូច្នោះ ស្វាមីសូមកុំនិយាយពាក្យនេះទៅភរិយាអី។
2 . ឃើញពោះអូនឯងចេះតែធំឡើងៗអ៊ីចឹង បងខ្លាចដល់ហើយ…
សម្តីនេះអាចធ្វើឱ្យភរិយាមានអារម្មណ៍ថា ខ្លួនឯងជាមនុស្សគួរឱ្យខ្លាច និងមានអារម្មណ៍ថា ឯកាគ្មានអ្នកយល់ចិត្ត ដែលអារម្មណ៍បែបនេះមិនល្អទាល់តែសោះសម្រាប់ស្ត្រីមានផ្ទៃពោះ តែសូមស្ត្រីជាភរិយាទាំងឡាយកុំយកពាក្យសម្តីនោះមកទុកដាក់ក្នុងចិត្តអី ព្រោះការពិតទៅ លោកប្តីគ្រាន់តែប្រើពាក្យខុសប៉ុណ្ណោះ ដោយសារលោកប្តីប្រហែលជារំភើបជាមួយនឹងការមានបុត្រលើកនេះខ្លាំងពេក ទើបចេះតែលួចសម្លឹងមើលពោះរបស់ភរិយាដែលចេះតែធំឡើងជារឿយៗ ដោយចិត្តនឹកកង្វល់បារម្ភប៉ុណ្ណឹងឯង។
3 . ហេតុអីបានអូនឯងចេះតែយំញឹកញាប់ម្ល៉េះ?
ការពិតទៅស្វាមីមិនគួរនិយាយពាក្យនេះទេ តែគួរត្រេកអរទៅវិញទេ ដែលមិនបានប៉ះនឹងអារម្មណ៍ដែលប្រែប្រួលទៅមកដោយសារតែអ័រម៉ូនដូចភរិយានោះ ព្រោះនៅពេលតាំងគភ៌ រាងកាយ និងអ័រម៉ូនក្នុងរាងកាយនឹងប្រែប្រួលរហ័សណាស់ បន្តិចអ៊ីចេះ បន្តិចអ៊ីចុះ ជួនកាលចង់នៅតែម្នាក់ឯង អផ្សុក ខូចចិត្ត បាក់ទឹកចិត្ត យំខ្សឹកខ្សួល ត្រេកអរ រំភើប គឺអារម្មប្រែប្រួលទៅមកគ្រប់ពេលវេលា។ លោកប្តីមិនចាំបាច់ធ្វីអ្វីច្រើនទេ បើឃើញភរិយាស្ថិតក្នុងអារម្មណ៍បែបនោះ គ្រាន់តែដើរចូលទៅឱបភរិយា ហើយលួងលោមទៅ តែប៉ុណ្ណឹងអាការភរិយានឹងបានធូរស្រាលវិញហើយ។
4 . អាការចង់ញ៉ាំនេះ ចង់ញ៉ាំនោះរបស់អូនឯងកំពុងធ្វើឱ្យបងជិតឆ្កួតហើយ
អូយ!! កុំនិយាយឱ្យសោះអាពាក្យហ្នឹង ព្រោះវានឹងធ្វើឱ្យភរិយាមានអារម្មណ៍ស្អប់លោកប្តីភ្លាមតែម្តង។ ដូចអ្នកគ្រូ ឆវី បានប្រាប់ពីខាងដើមរួចមកហើយថា អ្វីជាច្រើនយ៉ាងដែលភរិយាធ្វើប្លែកៗ ឬចង់ញ៉ាំអីបែបប្លែកៗក្នុងអំឡុងពេលមានគភ៌នោះ គឺជារឿងរបស់អ័រម៉ូនដែលធ្វើឱ្យអារម្មណ៍ឡើងចុះៗទាំងអស់ ដូច្នេះសម្រាប់លោកប្តី អ្វីដែលភរិយាចង់បាន ក៏រកៗមកឱ្យទៅ បើសិនវាមិនលើសពីសមត្ថភាពខ្លួននោះ។
5 . យប់ថ្មើរហ្នឹងហើយ អូននៅចង់ញ៉ាំទៀតឬ?
គឺមនុស្សមានពោះ មានពុង ច្រើនតែភ្ញាក់គ្រប់ពេលវេលា មិនទៀងទាត់ ហើយពេលភ្ញាក់ឡើង ក៏អាចនឹងឃ្លាន ដែលបើសិនជានៅក្នុងផ្ទះមិនបានត្រៀមអ្វីទុកញ៉ាំផងនោះ វាគឺជាភារកិច្ចរបស់លោកប្តីដែលនឹងត្រូវចេញទៅរកចំណីអាហារមកឱ្យភរិយាហើយ ដូច្នេះចូរកុំរអ៊ូ ព្រោះអាការឃ្លាននេះ ឃ្លាននោះមិនចេះចប់នេះ គឺដោយសាររាងកាយរបស់ភរិយា និងកូនក្នុងផ្ទៃកំពុងត្រូវការហើយ៕
តួនាទីរបស់ស្វាមីក្នុងការមើលថែប្រពន្ធមានផ្ទៃពោះ
ការមើលថែទាំសុខភាពខណៈតាំងគភ៌ក្នុងអំឡុងពេលជិតប្រសូត ស្ត្រីមានគភ៌អាចនឹងមានអារម្មណ៍ធុញថប់តានតឹង និងកង្វល់ក្នុងចិត្តជាច្រើនរឿង តែរឿងនេះលោកប្តីអាចជួយបាន។ ថ្ងៃនេះមានគន្លឹះល្អៗក្នុងការមើលថែភរិយាដែលមានផ្ទៃពោះគ្រប់ខែជិតប្រសូត 9ចំណុចងាយៗ ដែលស្វាមីអាចធ្វើបានយ៉ាងពិតប្រាកដ។
1 ចំណីអាហារ ៖ ស្វាមីត្រូវមើលថែទាំរឿងអាហារការហូបចុកសម្រាប់ភរិយាមានគភ៌តាំងពីអំឡុងពេលដំបូងៗ ជាពិសេសការជួយឱ្យភរិយាបានញ៉ាំអាហារគ្រប់5ប្រភេទក្រុមយ៉ាងគ្រប់គ្រាន់ ហើយក្នុងអំឡុងត្រីមាសចុងក្រោយ ត្រូវមើលថែទាំរឿងអាហារយ៉ាងស័ក្តិ-សម ព្រោះអំឡុងពេលចុងក្រោយនៃការតាំងគភ៌ ស្ត្រីមានគភ៌ត្រូវប្រយ័ត្នរឿងទម្ងន់ខ្លួនឡើងខ្លាំងជ្រុល។ គួរញ៉ាំអាហារដែលស្អាត ប្រយ័ត្នមេរោគ និងការឆ្លងមេរោគ រឹតតែបើឆ្លងមេរោគខាងផ្លូវអាហារផងនោះ វាអាចនឹងជំរុញឱ្យប្រសូតមុនកំណត់បាន។
2 ការហាត់ប្រាណ ៖ មុនពេលប្រសូតស្ត្រីមានគភ៌អាចមិនសូវជាស្រួលសប្បាយខ្លួនប៉ុន្មានឡើយ តែក៏នៅតែអាចហាត់ប្រាណស្រាលៗ ដើម្បីសម្រាលអាការចុករួយបានដែរដោយស្វាមីអាចនឹងហាត់ប្រាណកំដរជាមួយ ឬនៅចាំធ្វើម៉ាស្សាខ្នងផ្នែកខាងក្រោម ធ្វើម៉ាស្សា-កស្មា ដើម្បីសម្រាលភាពតានតឹងរបស់សាច់ដុំ ជួយត្រៀមទឹកក្តៅឧណ្ហៗសម្រាប់ត្រាំបាតជើង ធ្វើម៉ាស្សាជើង ក៏នឹងជួយកាត់បន្ថយអាការហើមជើងរបស់ភរិយាបានយ៉ាងល្អដែរ។
3 នៅចាំសង្កេតមើលអាការខុសប្រក្រតីដែលត្រូវប្រញាប់នាំទៅមន្ទីរពេទ្យ ៖ ស្ត្រីមានគភ៌ថ្មីថ្មោងដែលនៅមិនទាន់មានបទពិសោធ ត្រូវអាស្រ័យការសង្កេតមើលពីសំណាក់ស្វាមីផងដែរ ដោយអាការខុសប្រក្រតីដែលបញ្ជាក់ប្រាប់អំពីការប្រសូតមានដូចជា ពោះឡើងរឹង ឈឺពោះជិតប្រសូត និងបែកទឹកភ្លោះជាដើម។ ស្វាមីអាចប្រឹក្សាជាមួយគ្រូពេទ្យឱ្យដឹងច្បាស់ថា តើអាការបែបណាទើបហៅថា បែកទឹកភ្លោះ ឬមានទឹករំអិលឈាមចេញតាមរន្ធស្បូន បញ្ជាក់ពីសភាវដែលមាត់ស្បូនបើកជាដើម។ ក្រៅពីនេះស្វាមីត្រូវនៅចាំសង្កេតមើល បើកូនក្នុងផ្ទៃមិនសូវរើ ឬមិនរើតែម្តង ឬភរិយាមានអាការខុសប្រក្រតីពាក់ព័ន្ធនឹងរោគជ្រៀតជ្រែក ឬជំងឺប្រចាំកាយផង ព្រោះអំឡុងពេលចុងក្រោយរបស់ការមានគភ៌នេះមានភាពប្រថុយប្រថានខ្ពស់ ការប្រែប្រួលខាងរាងកាយ ឬអ័រម៉ូនប្រែប្រួល បើរោគទាំងនោះកម្រើកឡើងអាចហុចផលប៉ះពាល់ដល់ជីវិតរបស់ភរិយា និងកូនបាន។
4 យកចិត្តទុកដាក់យ៉ាងល្មមសមរម្យ ៖ ក្រៅពីនៅចាំសង្កេតមើលអាការខុសប្រក្រតីហើយនោះ គួរសួរនាំពីអាការ និងបបួលភរិយាធ្វើកិច្ចការងាររួមគ្នា ដើម្បីបន្ធូរបន្ថយខាងអារម្មណ៍ ដូចជា ធ្វើម្ហូបម្ហា មើលកុន ស្តាប់ភ្លេងជាមួយគ្នានៅនឹងផ្ទះ ព្រោះភរិយាអាចនឹងមិនងាយស្រួលក្នុងការចេញទៅក្រៅជាដើម។
5 និយាយលេងជាមួយភរិយា និងកូនក្នុងផ្ទៃភរិយា ៖ ក្រៅពីបន្ធូរបន្ថយអារម្មណ៍ភរិយាហើយ នៅជាវិធីជំរុញវិវឌ្ឍនាការរបស់កូនតូចបានទៀតផង។
6 ត្រៀមខ្លួនមុនប្រសូត ៖ ចាប់ផ្តើមពីការប្រឹក្សាជាមួយគ្រូពេទ្យពាក់ព័ន្ធនឹងវិធីការប្រសូត ទោះជាភរិយាចង់ជ្រើសរើសយកការវះប្រសូត ឬប្រសូតតាមធម្មជាតិក៏ដោយ ព្រោះទាំង2បែបមានការត្រៀមខ្លួន និងការមើលថែទាំខុសប្លែកពីគ្នា។
7 ស្វាមីគួរមានចំណែករួមក្នុងការពិចារណាជ្រើសរើសមន្ទីរពេទ្យ ៖ មិនថាតែរឿងរបស់ភរិយាដែលមានជំងឺប្រចាំកាយ ឬរឿងរបស់កូនតូចក្រោយពេលប្រសូតនោះឡើយ។ ការពិចារណាពីមន្ទីរពេទ្យដែលមានអ្វីៗគ្រប់ ជ្រើសរើសក្រុមគ្រូពេទ្យដែលមានអារម្មណ៍ជឿជាក់ក្នុងចិត្ត នឹងជួយឱ្យមានអារម្មណ៍សប្បាយនឹងធូរស្រាលបាន។
8 ជាអ្នកមើលថែទាំភរិយាពេលជិតប្រសូត ៖ ស្វាមីគួរនៅមើលថែទាំភរិយាយ៉ាងជិតដិតគ្រប់ពេលវេលា តែបើមានធុរៈប្រញាប់បន្ទាន់ឬមិនអាចនៅមើលបាន គួរឱ្យសាច់ញាតិជិតស្និទ្ធ ដូចជា ឪពុកក្មេកម្តាយក្មេក បងប្អូនខាងខ្លួនឯង ឬសាច់ថ្លៃ មកជួយមើលថែទាំភរិយាយ៉ាងជិតដិតផង។
9 រៀបចំចាត់ត្រៀមសភាពបរិស្ថានជុំវិញខ្លួនសម្រាប់កូនតូច ៖ មិនថាជាឧបករណ៍ របស់របរប្រើប្រាស់សម្រាប់កូនតូចបន្ទប់គេងរបស់កូន ទីកន្លែងសម្រាប់កូនតូច ចាត់ចែងរៀបចំសភាពខាងក្នុងផ្ទះឱ្យរួចជាស្រេច2ខែមុននឹងដល់កំណត់ប្រសូត៕
