ទៀប គឺជាផ្លែឈើធម្មជាតិមួយប្រភេទដែលមានភាពពេញនិយមបំផុតសម្រាប់មនុស្សជាច្រើន ព្រោះវាមានរសជាតិផ្អែមឆ្ងាញ់ ហើយផ្តល់អត្ថប្រយោជន៍សម្រាប់សុខភាពថែមទៀត។ បើយោងតាមអ្នកជំនាញបានបង្ហាញថា ផ្លែទៀប ក៏អាចផ្តល់អត្ថប្រយោជន៍អស្ចារ្យសម្រាប់ស្ត្រីមានផ្ទៃពោះផងដែរ ព្រោះវាមានផ្ទុកវីសាធាតុ ខនិជ ជាតិស្ករ ជាតិសរសៃ អាស៊ីតអាមីណូ ខ្លាញ់ និងសាធាតុសំខាន់ៗជាច្រើនទៀត ដែលជួយថែរក្សាទារក និងអ្នកម្តាយឲ្យមានសុខភាពល្អ។
ការពារបញ្ហារលូតកូន
ការសិក្សាជាច្រើនបានរកឃើញថា សារធាតុទង់ដែងដែលមាននៅក្នុងផ្លែទៀប មានសមត្ថភាពអាចជួយការពារបញ្ហារលូតកូនយ៉ាងមានប្រសិទ្ធភាព។ មិនតែប៉ុណ្ណោះ សារធាតុសំខាន់មួយនេះ អាចជួយដល់ការលូតលាស់សាច់ដុំ ស្បែក ព្រមទាំងសរសៃឈាម របស់ទារកផងដែរ។
កាត់បន្ថយការឡើងទម្ងន់
ប្រភពជាតិស្ករធម្មជាតិ ដែលមាននៅក្នុងផ្លែទៀប អាចជួយកាត់បន្ថយហានិភ័យឡើងទម្ងន់សម្រាប់ស្ត្រីមានផ្ទៃពោះ។ អ្នកត្រូវចាំថា ការឡើងទម្ងន់ខ្លាំងក្នុងពេលមានផ្ទៃពោះ មិនមែនជារឿងល្អសម្រាប់សុខភាពឡើយ ហើយស្ត្រីមានផ្ទៃពោះក៏ងាយប្រឈមនឹងជំងឺទឹកនោមផ្អែមផងដែរ។
ជួយជំរុញដល់ការអភិវឌ្ឍខួរក្បាល និងភាពស៊ាំរបស់ទារក
សារធាតុចិញ្ចឹមសំខាន់ៗពីរប្រភេទដូចជា វីតាមីន C និងវីតាមីន B6 នៅក្នុងផ្លែទៀប អាចជួយជំរុញដល់ការលូតលាស់ខួរក្បាល ឆ្អឹង សាច់ដុំ ស្បែក និងពង្រឹងប្រព័ន្ធភាពស៊ាំឲ្យមានសុខភាពល្អ។ ការសិក្សាបង្ហាញផងដែរថា ស្ត្រីមានផ្ទៃពោះ ដែលខ្វះវីតាមីន C ធ្ងន់ធ្ងរ អាចបណ្តោលឲ្យប៉ះពាល់ដល់ខួរក្បាលធ្ងន់ធ្ងរ។
ការពារបញ្ហាទល់លាមក
ស្ត្រីភាគច្រើនតែងតែជួបញ្ហាទល់លាមកក្នុងអំឡុងពេលមានផ្ទៃពោះ ដែលធ្វើឲ្យពួកគេពិបាកក្នុងការបត់ជើងម្តង។ ទោះជាយ៉ាងណាផ្លែទៀតប អាចជួយដោះស្រាយទុកលំបាកមួយនេះបាន ព្រោះវាសម្បូរជាតិសរសៃច្រើនបំផុត។
កាត់បន្ថយការចាញ់គភ៌
នេះគឺជារឿងមួយទៀត ដែលស្ត្រីមានផ្ទៃពោះមួយភាគធំតែងតែជួបប្រទះ ជាពិសេសអំឡុងពេល ៣ខែដំបូង។ ប៉ុន្តែ ផ្លែទៀបអាចជួយកាត់បន្ថយបញ្ហាក្អួត ចង្អោរ ដោយសារតែការចាញ់គភ៌របស់ស្ត្រីមានផ្ទៃពោះបាន ប្រសិនបើពួកគេទទួលទានជាប្រចាំ៕
មានគភ៌ញ៉ាំផ្លែទុរេនបានឬទេ?
អ្នកជំនាញការបានចង្អុលបង្ហាញថា ហ្វូលិក អាស៊ីត ឬ ហ្វូលែត (Folic acide or Folate = គឺ វីតាមីនក្នុងក្រុមវិតាមីន Bដែលរលាយក្នុងទឹក) ចាំបាច់ចំពោះរាងកាយមនុស្សគ្រប់អំឡុងវ័យ និងបានណែនាំឱ្យទទួលទានផ្លែឈើខ្មែរយើង ទាំងទុរេន ចេកពងមាន់ ខ្នុរ គូលែន -ល- ព្រោះសម្ពូរណ៍ទៅដោយហ្វូលែតច្រើន ដែលជួយការពារភាពពិការនៅលើទារក បង្អាក់សភាវៈអាល់ហ្សៃមើរ៍ តែត្រូវញ៉ាំអាហារឱ្យបានច្រើនយ៉ាង និងស័ក្តិសម មានតុល្យការ។
អ្នកស្រីវេជ្ជបណ្ឌិត Rachhanee សាស្ត្រាចារ្យប្រចាំស្ថាប័នភោជនាហារ និងសុខភាពប្រចាំប្រទេសថៃ បានរៀបរាប់ថា ហ្វូលែតជាសារធាតុអាហារដែលមានភាពសំខាន់ចំពោះមនុស្សគ្រប់ក្រុមអាយុ តាំងពីមុនតាំងគភ៌ អ្នកម្តាយក៏ត្រូវការហ្វូលែតច្រើនដែរព្រោះជាអាហារដែលជួយបញ្ឈប់សភាវៈពិការតាំងពីកំណើតរបស់ទារកបាន ធ្វើឱ្យកោសិកាចាប់កំណើតរបស់ទារកចម្រើនធំធាត់បានយ៉ាងប្រក្រតី កាត់បន្ថយសភាវៈមាត់ឆែប និងឆ្អឹងកងខ្នងមិនបិទជិតបាន ខណៈដែលទារកក៏ត្រូវការហ្វូលែតដើម្បីអភិវឌ្ឍន៍កោសិកាខួរក្បាលដែរ ចំណែកមនុស្សចាស់វិញនឹងជួយកាត់បន្ថយសភាវៈអាល់ហ្សៃមើរ៍(Alzheimer=រោគខួរក្បាលចុះខ្សោយ)បាន ក្រៅពីនេះ ហ្វូលែតនៅជួយបង្ហូរសារធាតុស៊ីរ៉ូថូនីន ដែលជួយគ្រប់គ្រងការគេង ការឃ្លាន ការចង់ និងអាការសោកសៅបានទៀតផង។
ហ្វូលែតដែលមាននៅក្នុងបន្លែស្លឹកបៃតង នឹងត្រូវបំផ្លាញបានយ៉ាងងាយដោយកំដៅ ដូច្នេះទើបការទទួលទានឱ្យបានហ្វូលែតតាមបរិមាណដែលរាងកាយត្រូវការ គឺមួយថ្ងៃ 300 ម៉ៃក្រូក្រាមនោះក្លាយជារឿងពិបាក តែ តាមរយៈការស្រាវជ្រាវវិភាគដើម្បីរកកម្រឹតសារធាតុអាហារនៅក្នុងអាហារប្រភេទនីមួយៗនោះ បានរកឃើញថា ហ្វូលែតក្រៅពីមាននៅក្នុងបន្លែស្លឹកបៃតងហើយនោះ នៅមាននៅក្នុងផ្លែឈើក្នុងតំបន់ផងដែរ ដូចជា ទុរេន ចេកពងមាន់ ខ្នុរ ល្ហុង និងគូលែន -ល- ដែលផ្លែឈើទាំងអស់នេះយើងអាចញ៉ាំបានស្រស់ៗដោយមិនចាំបាច់ឆ្លងកាត់ការចម្អឹនឡើយ ធ្វើឱ្យទទួលបានបរិមាណហ្វូលែតយ៉ាងពេញទំហឹង ដូចជាផ្លែទុរេន គឺជាប្រភពដែលមានហ្វូលែតច្រើនបំផុត អាចញ៉ាំត្រឹមតែ 2 គ្រាប់ ក៏ស្មើនឹង 50% របស់បរិមាណដែលបានណែនាំក្នុងមួយថ្ងៃទៅហើយ។
អ្នកម្តាយមានគភ៌អាចបរិភោគផ្លែទុរេនបាន តែក្នុងបរិមាណដែលស័ក្តិសម និងមានតុល្យភាពជាមួយរាងកាយ និងរឿងដែលសំខាន់នោះគឺ អ្នកម្តាយមានគភ៌គួរញ៉ាំអាហារដែលមានគុណប្រយោជន៍ឱ្យបានសម្បូរណ៍បែប ច្រើនយ៉ាង ច្រើនប្រភេទដើម្បីសុខភាពដ៏ល្អរបស់ទាំងខ្លួនឯង និងកូនក្នុងផ្ទៃ៕
