ជាទូទៅបើឈានដល់វ័យបន្តពូជហើយ ស្ត្រីនៅតែមានកម្ពស់តូចជាង ១,៥០សង់ទីម៉ែត្រទៀត គេចាត់ទុកជាមនុស្សដែលមានមាឌតូច។ តើស្ត្រីដែលមានមាឌបែបនេះ អាចមានផលវិបាកក្នុងការបង្កើតកូនដែរឬទេ?
តាមពិតមិនដូចអ្វីដែលមនុស្សមួយចំនួនបានគិតទាំងអស់នោះឡើយ ស្ត្រីដែលមានមាឌតូចក៏អាចសម្រាលកូនបានស្រួលដែល ក្នុងករណីអាងត្រគាតរបស់ពួកគេលូតលាស់ល្អ។ លើសពីនេះ ទារកដែលកើតចេញពីស្ត្រីដែលមានមាឌតូច ក៏មានសុខភាពល្អដូចគ្នាទៅនឹងស្ត្រីដែលមានមាឌធំដែរ។
ប៉ុន្តែក្នុងករណីដែលស្ត្រីមាឌតូច ហើយធាត់ អាចប្រឈមនឹងបញ្ហាពិបាកសម្រាល ដោយសារតែអាងត្រគាកតូច និងគល់ភ្លៅធំ ធ្វើឲ្យទ្វាមាសត្បៀត ដែលជាហេតុកូនកើតមិនរួច រហូតឈានដល់ការវះកាត់ក៏មានដែរ។
ប្រសិនបើអ្នកចង់សម្រាលដោយធម្មជាតិ អាចធ្វើទៅបានដោយអាស្រ័យទៅលើការជួយសង្គ្រោះពីអ្នកជំនាញ ដូចជាការបូម ក៏ប៉ុន្តែទារកកើតមកមិនសូវមានសុខភាពល្អនោះទេ ព្រោះវាអាចប៉ះពាល់ដល់ខួរក្បាល ឬមានលក្ខណៈមិនប្រក្រតី៕
ផលវិបាកនៃការសម្រាលកូនដោយវះកាត់អាចឆក់យកអាយុជីវិតអ្នកម្តាយបាន
ជាទូទៅ ស្ត្រីត្រូវបានលើកទឹកចិត្តអោយសម្រាលបុត្រតាមផ្លូវធម្មជាតិ ព្រោះផលវិបាកនៃការសម្រាលតាមធម្មជាតិ មានតិចតួចជាងការវះកាត់។ ករណីក្រុមគ្រូពេទ្យសម្រេចធ្វើការវះកាត់ លុះត្រាតែការសម្រាលតាមធម្មជាតិអាចមានគ្រោះថ្នាក់ចំពោះម្តាយ និងកូន។ ប៉ុន្តែបច្ចុប្បន្ននេះអត្រានៃការសម្រាលបុត្រដោយការវះកាត់ មានការកើនឡើងជាលំដាប់គួរអោយព្រួយបារម្ភ ជាពិសេសការវះកាត់ដោយគ្មានមូលហេតុត្រឹមត្រូវ។ ស្ត្រីមួយចំនួនយល់ខុសថា ការសម្រាលកូនដោយវះកាត់ មាន ភាពងាយស្រួល ដោយមិនចាំបាច់ឆ្លងកាត់ការឈឺពោះសម្រាល និងមើលរំលងផលវិបាកផ្សេងៗទៅថ្ងៃអនាគត ដែលបណ្តាលមកពីការវះកាត់នេះ។ ដូច្នេះ តើមានផលវិបាកអ្វីខ្លះអំឡុង និងក្រោយពេលការវះកាត់សម្រាលកូន?
ក) ផលវិបាកអំឡុងពេលវះកាត់៖
– ផលវិបាកនៃថ្នាំសណ្តំ (Syndrome de Mendelson)
– ការបាត់បង់ឈាមច្រើនពេលវះកាត់
– ការដាច់រហែកកស្បូនខ្លាំង
– របួសប្លោកនោម ឬពោះវៀន ដែលទាមទារការសម្រាកពេទ្យរយៈពេលយូរ
ខ) ផលវិបាកក្រោយពេលវះកាត់ភ្លាមៗ ១០% ទៅ ៤២%៖
– ការបង្ករោគផ្សេងៗ មានដូចជាៈ ការរលាកប្លោកនោម រលាកភ្នាសក្នុងរបស់ស្បូន រលាកស្រោមពោះ ឬអាចដល់បង្ករោគក្នុងសរសៃឈាម។
– ការហូរឈាមក្រោយពេលវះកាត់ មានកកឈាមលើស្នាមរបួសស្បូន ឬក្រោមរបួសស្បែក
– ភាពស្លេកស្លាំង
– ផលវិបាកស្ទះសរសៃឈាមតូចៗ ជាពិសេសសរសៃឈាមក្នុងសួតធ្វើអោយមានវិបត្តិផ្លូវដង្ហើម
គ) ផលវិបាកក្រោយពេលវះកាត់ នៅពេលមានផ្ទៃពោះលើកក្រោយ ស្ត្រីអាចប្រឈមនឹង៖
– ការវះកាត់យកកូនសារជាថ្មី
– ការធ្លាយស្បូន
– សុកពាំងមាត់ស្បូន
– សុកចាក់ឬសក្នុងសាច់ស្បូន ឬចាក់ដល់ប្លោកនោម
ផលវិបាកទាំងអស់នេះមិនសូវកើតមានជាញឹកញាប់ទេ តែករណីខ្លះអាចគំរាមគំហែងដល់អាយុជីវិតស្ត្រីបាន។ ដូច្នេះរាល់ការសម្រាលទាំងអស់ ស្ត្រីគួរពិភាក្សាជាមួយគ្រូពេទ្យជំនាញជាមុន ដើម្បីជ្រើសរើសការសម្រាលមួយដ៏ សមស្រប និងមានសុវត្ថិភាពទាំងម្តាយ និងកូន។
“ក្រុមវេជ្ជបណ្ឌិតជំនាញផ្នែកសម្ភពនិងរោគស្ត្រី នៃមន្ទីរពេទ្យកាល់ម៉ែត នឹងផ្តល់ដំបូន្មាន និងពត៌មានលំអិតបន្ថែម ជូនលោកអ្នក ក្នុងការជ្រើសរើសវិធីសម្រាលបុត្រ”។
