នៅពេលមានផ្ទៃពោះ ស្ត្រីត្រូវការអាហារបន្ថែមកើនឡើងទ្វេដង ដើម្បីផ្គត់ផ្គង់ដល់ការលូតលាស់របស់ទារកក្នុងផ្ទៃ។ ក៏ប៉ុន្តែដំណាក់កាលនេះស្ត្រីមានផ្ទៃពោះក៏គួរតែប្រុងប្រយ័ត្នចំពោះអាហារមួយចំនួនផងដែរ ព្រោះវាអាចបណ្តោលឲ្យគ្រោះថ្នាក់បើទទួលទានមិនចេះគិត ជាពិសេសអាចរលូតបាន។
ខាងក្រោមនេះ គឺជាប្រភេទអាហារដែលស្ត្រីមានផ្ទៃពោះទាំងឡាយគួរតែជៀសវាង៖
អាហារឆៅ
ពពួកអាហារដូចជា ស៊ុត សាច់ និងបន្លែ ប្រសិនបើចម្អិនមិនត្រឹមត្រូវទេ អ្នកកុំទទួលទានឲ្យសោះ ព្រោះវាអាចមានផ្ទុកជាតិពុល ព្រមទាំងបាក់តេរីដែលបណ្តោលឲ្យមានគ្រោះថ្នាក់។
ត្រីឆ្អើរ
តើអ្នកណាខ្លះចូលចិត្តយកត្រីឆ្អើរធ្វើម្ហូប? ចំពោះមនុស្សទូទៅវាគ្មានចោទជាបញ្ហាអ្វីនោះទេ ក៏ប៉ុន្តែសម្រាបើស្ត្រីដែលកំពុងតែមានផ្ទៃពោះវិញគួរប្រយ័ត្ន ព្រោះអាហារប្រភេទនេះមានជាប់ផ្សែងពុល នឹងជាឱកាសល្អសម្រាប់មេរោគរាប់លានចូលលាក់ខ្លួននៅលក្នុងស្រកា។ ដូច្នេះ អ្នកគួរតែជៀសវាងត្រីឆ្អើរ ទោះឃ្លានយ៉ាងណាក៏ដោយ ដើម្បីសុវត្ថិភាពកូនក្នុងផ្ទៃ។
គ្រឿងសមុទ្រក្លាសេយូរ
គ្រឿងសមុទ្រដែលក្លាសេទុកយូរក៏មានផ្ទុកមេរោគច្រើន ដែលអាចបណ្តោលឲ្យស្ត្រីមានផ្ទៃពោះអាចជួបនឹងបញ្ហារលូតកូនដូចជាត្រីឆើរដែរ។ បើសិនជាចង់មានសុវត្ថិភាព អ្នកគួរតែទទួលទានអាហារសមុទ្រស្រស់ៗ តែកុំញ៉ាំច្រើនពេក។
ថ្លើមសត្វ
សរីរាង្គសត្វមួយប្រភេទនេះ ពិតជាមានរសជាតិឆ្ងាញ់ ហើយជាទីពេញនិយមខ្លាំងណាស់សម្រាប់មនុស្សភាគច្រើន។ តែទោះជាយ៉ាងណា អ្នកត្រូវដឹងថា ថ្លើមជ្រូក ឬថ្លើមគោជាដើម សុទ្ធតែជាអាហារដែលសម្បូរជាតិពុល និងខ្លាញ់ ដែលបង្កផលប៉ះពាល់កូនកំពុងតែលូតលាស់។
ម្នាស់
នេះជាផ្លែឈើធម្មជាតិដែលមានរសជាតិជូរអែម គួរឲ្យចង់ទទួលទាន និងមានប្រយោជន៍បំផុតសម្រាប់សុខភាព។ ទោះជាយ៉ាងណា នៅដំណាក់កាលដំបូននៃការមានផ្ទៃពោះ អ្នកកុំទទួលទានឲ្យសោះ ព្រោះវាអាចធ្វើឲ្យកូនក្នុងផ្ទៃប្រឈមនឹងការរលូត។ ផ្ទុកទៅវិញ បើអ្នកញ៉ាំនៅពេលជិតសម្រាល វានឹងជួយពង្រឹងដល់សាច់ដុំនៃស្បូន ដែលអាចធ្វើឲ្យកូនសម្រាលមកស្រួល។
ល្ហុងខ្ចី
ជាអាហារដែលគេពេញនិយមបន្ថែមនៅក្នុងស៊ុត ត្រាំ ធ្វើម៉ាំ ឬបុកល្ហុង ជាដើម។ ក៏ប៉ុន្តែល្ហុងខ្ចី មានផ្ទុកអង់ហ្ស៊ីមម្យ៉ាងដែលបណ្តោលឲ្យស្បូនរបស់ស្ត្រីជួបបញ្ហាធ្ងន់ធ្ងរ ជាពិសេសការទទួលទានល្ហុងឆៅតែម្តង៕
