លំហាត់ប្រាណពិតជាមានសារៈសំខាន់ខ្លាំងណាស់អំឡុងពេលមានផ្ទៃពោះ ព្រោះវាអាចជួយឲ្យអ្នកម្តាយនឹងកូនមានសុខភាពល្អ ហើយមានភាពងាយស្រួលក្នុងការសម្រាលថែមទៀត។ ក៏ប៉ុន្តែមានលំហាត់ប្រាណមួយចំនួន ស្ត្រីមានផ្ទៃពោះមិនគួរអនុវត្តឡើយ ព្រោះវាអាចបង្កឲ្យមានគ្រោះថ្នាក់មិននឹកស្មានដល់ឡើយ។
លំហាត់ប្រាណដើម្បីសម្រកទម្ងន់
ការឡើងទម្ងន់ចាប់ពី ២៥ ទៅ ៣៥ផោន លើទម្ងន់ពីមុនជារឿងចាំបាច់បំផុតសម្រាប់ស្ត្រីមានផ្ទៃពោះ ព្រោះវាជាសញ្ញាបញ្ជាក់ថាកូនក្នុងផ្ទៃកំពុងតែវិវត្តយ៉ាងមានសុខភាពល្អ។ ក៏ប៉ុន្តែស្ត្រីមិនគួរ ព្យាយាមធ្វើលំហាត់ប្រាណសម្រកទម្ងន់អំឡុងពេលមានផ្ទៃពោះនោះទេ ដោយសារតែវាទាមទារឲ្យអ្នកប្រើកម្លាំងខ្លាំងដែលអាចនាំមកនូវគ្រោះថ្នាក់ដល់កូន។
លំហាត់ប្រាណទាក់ទងទៅនឹងការលេងកីឡា
អ្នកគួរតែជៀសវាងរាល់កីឡាលោតផ្លោះ ហត់ ឬរត់ ដូចជាបាល់បោះ ឬជិះស្គីលើទឹកកក ព្រោះវាអាចធ្វើឲ្យអ្នកប្រឈមនឹងហានិភ័យដួល ដែលនាំគ្រោះថ្នាក់ដល់កូនក្នុងផ្ទៃ។ ហេតុនេះគ្រូពេទ្យបានណែនាំឲ្យអ្នកលេងកីឡាស្រាលបំផុត បន្ទាប់ពីត្រីមាសទី១ នៅពេលដែលពោះរបស់អ្នកកាន់តែធំ។
សកម្មភាពឱនទៅមុខ
វាជាការចាំបាច់ណាស់ដែលអ្នកគួរជៀសវាងសកម្មភាពដែលអតុល្យភាពដូចជា ជិះស្គី ជិះសេះ ហើយសូម្បីតែការជិះកង់ ក៏មានគ្រោះថ្នាក់ខ្លាំង។ ក្នុងករណីដែលអ្នកចង់ធ្វើលំហាត់ប្រាណជិះកង់ គួរតែពិគ្រោះជាមួយគ្រូពេទ្យសិន ដើម្បីការពារសុវត្ថិភាពចំពោះទារកក្នុងផ្ទៃ។
ធ្វើលំហាត់ប្រាណហួសកម្រិត
អ្នកមិនគួរធ្វើលំហាត់ប្រាណច្រើនហួសហេតុពេកទេ ក្នុងអំឡុងពេលមានផ្ទៃពោះ ព្រោះវាអាចកាត់បន្ថយលំហូរឈាមទៅកាន់ទារក និងប៉ះពាល់ខ្លាំងដល់សុខភាពទារក៕
