ស្របពេលដែលភាពសប្បាយរីករាយនឹងការជិតបានធ្វើជាម្តាយរបស់គេ ស្ត្រីមានផ្ទៃពោះទាំងឡាយត្រូវប្រុងប្រយ័ត្នចំពោះបញ្ហាសុខភាពផងដែរ ព្រោះអ្នកអាចប្រឈមនឹងបញ្ហាសុខភាពច្រើនយ៉ាង រួមទាំងឬសដូងបាតផងដែរ។ តែបើយោងតាមគេហទំព័រ pregnancyvideo បានបង្ហាញថា ជំងឺឬសដូងបាត អាចដោះស្រាយបាន ប្រសិនបើអ្នកអនុវត្តរូបមន្តមួយចំនួនដូចខាងក្រោម៖
១.ឧស្សាហ៍ទទួលទានអាហារសម្បូរជាតិសរសៃ
ស្ត្រីមានផ្ទៃពោះទាំងឡាយ គួរតែឧស្សាហ៍ទទួលទានអាហារសម្បូរជាតិសរសៃដូចជា បន្លែ ផ្លែឈើ និងគ្រាប់ធញ្ញជាតិឲ្យបានច្រើន ព្រោះវាអាចជួយសម្រួលដល់ចលនាពោះវៀន និងជួយឲ្យលាមកទន់ងាយស្រួលក្នុងការបន្ទោរបង់។
២.ញ៉ាំទឹកឲ្យបានច្រើន
ការទទួលទានទឹកយ៉ាងហោចណាស់មួយថ្ងៃ ២លីត្រ ក៏អាចជួយកាត់បន្ថយបញ្ហាទល់លាមកដែរ ព្រោះការទល់លាមកញឹកញាប់ជាមូលហេតុមួយដែលនាំឲ្យកើតជំងឺឬសដូងបាត។
៣.មួយថ្ងៃធ្វើលំហាត់ប្រាណ ៣០នាទី
ការធ្វើលំហាត់ប្រាណមួយថ្ងៃបាន ៣០នាទី អាចជួយជំរុញដល់ការរំលាយអាហារឲ្យដំណើរការបានល្អ។ ចំពោះការធ្វើលំហាត់ប្រានដ៏ល្អបំផុត គឺយូហ្គា ហែលទឹក ដើរ ឬពិគ្រោះជាមួយអ្នកជំនាញអំពីលំហាត់ប្រាណដែលត្រឹមត្រូវ។
៤.ត្រាំទឹកក្តៅឧណ្ឌៗ
ការងូតទឹក ហើយត្រាំក្នុងទឹកក្តៅឧណ្ឌៗរយៈពេល ១៥នាទី អាចជួយបន្ថូរបន្ធយផលប៉ះពាល់តំបន់ទ្វារធំ និងត្រគាកបាន។
៥.ប្រើទឹកកក
ស្ត្រីមានផ្ទៃពោះ អាចប្រើប្រាស់ទឹកកកអនាម័យ ពីរទៅបីដុំ រុំនឹងកន្សែង រួចស្អំត្រង់តំបន់គូថ ដើម្បីកាត់បន្ថយការហើម និងការឈឺចាប់។
ក្នុងករណីដែលអ្នកកើតជំងឺឬសដូងបាតយូរ ឬក៏ឬសដូងបាតមានការឈឺចាប់ខ្លាំង ហើយឧស្សាហ៍ធ្លាក់ឈាមទៀតនោះ គួរតែប្រញាប់ទៅជួបជាមួយនឹងអ្នកជំនាញ ដើម្បីរកវិធីព្យាបាលជាបន្ទាន់៕
