ធម្មតាការហើមដៃ ជើង និងមុខ ពេលតាំងគភ៌កើតឡើងដោយសារតែការប្រមូលផ្តុំជាតិទឹកក្នុងរាងកាយច្រើនពេក ទោះជាយ៉ាងណា អ្នកជំនាញនៅទីក្រុង បុមបៃ បានបង្ហាញថា ស្ត្រីមិនត្រូវកាត់បន្ថយការទទួលទានទឹកនោះទេ។
នៅក្នុងរាងកាយរបស់មនុស្សគ្រប់រូបត្រូវការទឹករហូតដល់ ៨០ភាគរយ ប៉ុន្តែការទទួលទានទឹកតិចជ្រុល ឬលើសជ្រុល អាចរាំងស្ទះដល់ការបូមឈាម ដែលបង្កឲ្យមានបញ្ហាហើមកើតមានឡើង។ លើសពីនេះទៅទៀត ការបញ្ចេញអ័រម៉ូន Progesterone ពេលតាំងគភ៌ច្រើនពេក អាចធ្វើឲ្យជាតិទឹកត្រូវបានឃាត់ទុកនៅក្នុងរាងកាយ ហើយករណីហើមក៏កើតមានឡើងដូចគ្នាដែរ។
យ៉ាងណាក៏ដោយ ការប្រមូលផ្តុំសារធាតុរាវនៅក្នុងរាងកាយមិនមែនជាមូលហេតុតែមួយគត់ដែលបង្កឲ្យមានអាការហើមនោះទេ។ នៅមានការមូលហេតុផ្សេងៗទៀត រួមបញ្ចូលទាំងកង្វះប្រូតេអ៊ីន ខ្វះឈាម កើតជំងឺបេះដូង និងកំណកឈាម ជាដើម។
មួយវិញទៀត អ្នកជំនាញបានផ្តល់អនុសាសន៍ថា ស្ត្រីមានផ្ទៃពោះគួរតែទទួលទានទឹកយ៉ាងហោចណាស់ ១០ ទៅ ១២កែវ ក្នុងមួយថ្ងៃ ទើបគ្រប់គ្រាន់។ អាស្រ័យហេតុនេះ សូមចាំថា នៅពេលមានអាការហើម កើតឡើង មិនត្រូវកាត់បន្ថយទឹកឡើយ៕
